05-Feb-2026

ବଲାଙ୍ଗିର(ପ୍ରେରଣା ଖବର)-ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକର ଐତିହାସିକ ଗ୍ରାମ ଜରାସିଂହାର ପିଏମଶ୍ରୀ ହାଇସ୍କୁଲର ୭୫ବର୍ଷ ପୂର୍ତ୍ତିରେ ପ୍ଲାଟିନମ ଜୁବୁଲି ପାଳିତ ହେଉଛି । ଆଜି ଏହାର ଉଦଘାଟନୀ ଉତ୍ସବରେ ମୁଖ୍ୟଅତିଥି ଭାବରେ ବଲାଙ୍ଗୀର ବିଧାୟକ କଳିକେଶନାରାୟଣ ସିଂଦେଓ,ବରେଣ୍ୟ ଅତିଥି ଭାବରେ ପୂର୍ବତନ ମନ୍ତ୍ରୀ ତଥା ନୟାଗଡ ବିଧାୟକ ଡ.ଅରୁଣ କୁମାର ସାହୁ ଓ ମୁଖ୍ୟବକ୍ତା ଭାବରେ ସମ୍ବାଦଗ୍ରୁପର ଅଧ୍ୟକ୍ଷ ତଥା ପୂର୍ବତନ ସାଂସଦ ସୌମ୍ୟରଂଜନ ପଟ୍ଟନାୟକ ଯୋଗ ଦେଇ ଦେବୀ ପାଟଖଣ୍ଡା,ପୂର୍ବତନମୁଖ୍ୟମନ୍ତ୍ରୀ ନବକୃଷ୍ଣ

ଚୌଧୁରୀ ଓ ସ୍କୁଲର ପ୍ରତିଷ୍ଠାତା ଲାଲଜଗନ୍ନାଥ ପ୍ରସାଦ୍ ସିଂଦେଓଙ୍କ ପ୍ରତିକୃତିରେ ମାଲ୍ୟାର୍ପଣକରି ଉତ୍ସବକୁ ଆନୁଷ୍ଠାନିକ ଭାବରେ ଉଦଘାଟନ କରିଥିଲେ ।  ବିଦ୍ୟାଳୟର ପୁରାତନ ଛାତ୍ରସଂସଦ ପକ୍ଷରୁ ଜୁବୁଲିପାଳନ କମିଟିର ଅଧ୍ୟକ୍ଷ ଲକ୍ଷ୍ମଣ କୁମାର ମେହେରଙ୍କ ସଭାପତିତ୍ୱ ଓ ସଂଯୋଜନାରେ ଅନୁଷ୍ଠିତ ଏହି ଉତ୍ସବରେ କମିଟିର ଉପଦେଷ୍ଟା ପୁରାତନଛାତ୍ର ତଥା ପୂର୍ବତନ ବିଧାୟକ ଯଜେ୍ଞଶ୍ୱର ବାବୁ ଜୁବୁଲିର ଉଦ୍ଦେଶ୍ୟ ଜ୍ଞାପନ କରି ବିଦ୍ୟାଳୟର ଐତିହ୍ୟଉପରେ ବକ୍ତବ୍ୟ ରଖିଥିଲେ । ମୁଖ୍ୟଅତିଥି ଶ୍ରୀ ସିଂଦେଓ ଜରାସିଂହା ମାଟି ସହ ତାଙ୍କର ପାରିବାରିକ ସମ୍ପର୍କ ରହିଥିବା ଓ ଏଠିକାର ସାମଗ୍ରୀକ ବିକାଶ ତାଙ୍କର ଲକ୍ଷ୍ୟ ବୋଲି କହିଥିଲେ । ପୁରାତନଛାତ୍ରମାନେ ହେଉଛନ୍ତି ଶିକ୍ଷାନୁଷ୍ଟାନମାନଙ୍କର ସମ୍ପତ୍ତି । ସ୍କୁଲକଲେଜରେ ପାଠପଢିବାଠାରୁ ରାଜନୀତି କରିବା ପର୍ଯ୍ୟନ୍ତ ସମୟରେ ସେ ଅନେକ ସୁଖଦ ଓ ତିକ୍ତ ଅନୁଭବ ରଖିଛନ୍ତି । ସ୍କୁଲକଲେଜ ମାନଙ୍କରେ ଉତ୍ସବ ପାଳିତ ହେଲେ ଛାତ୍ରଛାତ୍ରୀମାନଙ୍କର ଭବିଷ୍ୟତ ପାଇଁ ଏକ ସୁଖଦ ଅନୁଭୁତି ରହିଥାଏ ଓ ବୌଦ୍ଧିକ ବିକାଶ ହୁଏ । ତେବେ ଅନେକ ଗାଁମାନଙ୍କରେ ରାଜନୀତି କାରଣରୁ ସ୍କୁଲକଲେଜ ମାନଙ୍କରେ ଉତ୍ସବ ପାଳିତ ହୋଇ ପାରୁନାହିଁ ବୋଲି କହିବା ସହିତ ଶିକ୍ଷାନୁଷ୍ଠାନରେ ଉନ୍ନତ ଶିକ୍ଷାରେ ସମସ୍ତଙ୍କର ସହଭାଗିତା ରହିବା ଆବଶ୍ୟକ ବୋଲି ମତଦେଇଥିଲେ । ଯେଉଁମାନେ ପାଠପଢିଥିବା ଅନୁଷ୍ଠାନ ପ୍ରତି ଅନୁରକ୍ତି ନାହିଁ ସେମାନେ ସମାଜ ପାଇଁ କେବେ ବି ମଙ୍ଗଳକର ନୁହଁନ୍ତି ବୋଲି ଡ.ଅରୁଣ ସାହୁ କହିଥିଲେ । ଠିକ ସେହିପରି ସମ୍ବାଦଗ୍ରୁପର ଅଧ୍ୟକ୍ଷ ସୌମ୍ୟରଂଜନ ପଟ୍ଟନାୟକ ତାଙ୍କ ବକ୍ତବ୍ୟରେ ମାଁ,ମାଟି,ମାତୃଭାଷାକୁ ସମ୍ମାନ ଜଣାଇ ମଦମୁକ୍ତ

ଓଡିଶା ଗଠନ ପାଇଁ ଛାତ୍ରଛାତ୍ରୀ ଜୀବନର ଲକ୍ଷ୍ୟରଖନ୍ତୁ ବୋଲି ପରାମର୍ଶ ଦେଇଥିଲେ । ଜୀବନରେ ଉନ୍ନତି କରିବାକୁ ହେଲେ ନିଜକୁ ନୀରୋଗୀ,ନୀର୍ଭିକ,ନିରାଡମ୍ବର ଓ ନିଶାମୁକ୍ତ ହେବାକୁ ପଡିବ ବୋଲି କହିଥିଲେ । ସ୍କୁଲମାନଙ୍କରେ ଶିକ୍ଷାର ଗୁଣାତ୍ମକ ମାନ ବଢାଇବାକୁ ହେଲେ ଅଭିଭାବକ, ପୁରାତନ ଛାତ୍ରମାନଙ୍କୁ ଅଧିକ କ୍ରୀୟାଶୀଳ ହେବାକୁ ସେ ପରାମର୍ଶ ଦେଇଥିଲେ । ଏହି ଅବସରରେ ସ୍କୁଲରେ ପାଠପଢି ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଡ.ହରିଶ୍ଚନ୍ଦ୍ର ନାୟକଙ୍କ ସମେତ ଅନ୍ୟାନ୍ୟ ବିଶିଷ୍ଟବ୍ୟକ୍ତିଙ୍କୁ ସମ୍ମର୍ଦ୍ଧିତ କରାଯାଇଥିଲା । ଅନ୍ୟମାନଙ୍କମଧ୍ୟରେ ସ୍ମରଣିକା କମିଟିର  ଅଧ୍ୟକ୍ଷ ଉମାଶଙ୍କର ସିଂ, ଉପସଭାପତି କନିୟରଲାଲ ସାମଲ,କୋଷାଧ୍ୟକ୍ଷ ଚିତ୍ତରଂଜନ ଥନାପତି,ପ୍ରଚାରପ୍ରସାର କମିଟିର ଅଧ୍ୟକ୍ଷ ଦେବୀ ପ୍ରସାଦ ନାୟକ,ଅର୍ଥକମିଟିର ଅଧ୍ୟକ୍ଷ କର୍ତ୍ତାରସିଂ କୁମ୍ଭାର, ସମିତିସଭ୍ୟ ଅମିତ ତ୍ରୀପାଠୀ ମଞ୍ଚାସୀନ ଥିଲେ । ଶେଷରେ କମିଟିର ଉପସଭାପତି ସତ୍ୟନାରାୟଣ ପାଣି ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ । ସାଂସ୍କୃତିକ ସଭାପରେ ଛାତ୍ରଛାତ୍ରୀଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା ।