13-Jan-2026

ବଲାଙ୍ଗିର/ସଇଁତଳା: ବଲାଙ୍ଗୀର ଜିଲ୍ଲାରେ ରାଜନୈତିକ ଅସହିଷ୍ଣୁତା ଦେଖାଦେଉଛି । ଅତିଥିକରି ଡାକୁଛନ୍ତି କିନ୍ତୁ ଫଳକରେ ନାମ ଦେଉନାହାଁନ୍ତି । ଦଳଦେଖି ଫଳକରେ ନାମ ଲେଖାଯାଉଛି । ସୋମବାର ଦିନ ସଇଁତଳାରେ ଏଭଳି ଏକ ଅପ୍ରିତିକର ପରିସ୍ଥିତି ଉପୁଜିଥିଲା ଓ ଉତ୍ୟକ୍ତ ଲୋକେ ଉଦଘାଟନୀ ଫଳକକୁ ଭାଙ୍ଗିଦେଲେ । ଫଳକ ଭାଙ୍ଗିଥିବା ସରପଞ୍ଚକୁ ପୋଲିସ ଗିରଫକରି କୋର୍ଟ ଚାଲାଣ କରିଦେଲା । ପ୍ରତିବାଦରେ ଆଜି ଜନପ୍ରତିନିଧିମାନେ ଥାନାଘେରି ଆନ୍ଦୋଳନ କରିଥିଲେ । ନବୀନ ସରକାର ଅମଳରେ ଟୁକୁନି ସାହୁ ପରିବହନ ବିଭାଗରମନ୍ତ୍ରୀ ଥିବା ବେଳେ ୫କୋଟି ଟଙ୍କା ମଞ୍ଜୁର କରାଇ ସଇଁତଳାର ଏହି ବସଷ୍ଟାଣ୍ଡ ନିର୍ମାଣ କରାଇଥିଲେ । କିନ୍ତୁ ଏବେ ବିଜେପିସରକାର ରଙ୍ଗମାରିଦେଇ ବାହାବା ନେଉଛି ବୋଲି ବିଜେଡିନେତାମାନେ ଅଭିଯୋଗ କରିଛନ୍ତି । 
       ସୋମବାର ଦିନ ମୁଖ୍ୟମନ୍ତ୍ରୀ ମୋହନଚରଣ ମାଝୀ ଆଭାସୀ ମାଧ୍ୟମରେ ଜିଲ୍ଲାର କେତେକ ଉନ୍ନୟନ ପ୍ରକଲ୍ପ ସହିତ ସଇଁତଳାର ନବନିର୍ମିତ ବସଷ୍ଟାଣ୍ଡକୁ ଉଦଘାଟନ କରିଥିଲେ । ଓଏସଆରଟିସି ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ସଇଁତଳା ବିଡିଓ,ତହସିଲଦାରଙ୍କ ସମେତ ସଇଁତଳା ବ୍ଲକ ଅଧ୍ୟକ୍ଷା ମୋନିକା ସିଂଭୋଇ,ଉପାଧ୍ୟକ୍ଷ ଗୁଣସାଗର ମାଝୀ,ଜିଲ୍ଲାପରିଷଦ ସଭ୍ୟପ୍ରମୋଦ ଭୋଇ,ହିମାଞ୍ଚଳ ବୁଡେକ,ରୀତାରାଣୀ ହାତୀ, ସରପଞ୍ଚ ସୁବ୍ରତ ନାଗଙ୍କୁ ଅତିଥିଭାବରେ ଡକାଯାଇଥିଲା । ସଠିକ ସମୟରେ ଏହାର ଉଦଘାଟନ ମଧ୍ୟ ହେଲା । କିନ୍ତୁ ଉଦଘାଟନୀ ଫଳକରେ କେବଳ ବିଜେପିନେତାଙ୍କ ନାମ ଥିବା ବେଳେ ବ୍ଲକଅଧ୍ୟକ୍ଷା ମୋନିକା ସିଂଭୋଇଙ୍କ ନାମ ନଥିଲା । ଉଦଘାଟନୀ ଫଳକରେ ମୁଖ୍ୟମନ୍ତ୍ରୀ ମୋହନଚରଣ ମାଝୀ,ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓ,ମନ୍ତ୍ରୀ ଡ.ମୁକେଶ ମହାଲିଙ୍ଗ,ସାଂସଦ ସଂଗୀତାକୁମାରୀ ସିଂଦେଓ,ପରିବହନମନ୍ତ୍ରୀ ବିଭୁତିଭୁଷଣ ଜେନା ଓ ଟିଟିଲାଗଡ ବିଧାୟକ ନବୀନ ଜୈନଙ୍କ ନାମ ଲେଖାଯାଇଥିଲା । ଫଳରେ ବ୍ଲକଅଧ୍ୟକ୍ଷାଙ୍କ ସମର୍ଥକମାନେ ଅସନ୍ତୋଷ ବ୍ୟକ୍ତ କରି ହୋହଲ୍ଲା କରିଥିଲେ । ବାଦବିବାଦ ଭିତରେ ଉତ୍ତେଜନା ପ୍ରକାଶ ପାଇଥିଲା । ଡୁଙ୍ଗୁରୀପାଲି ସରପଞ୍ଚ ଗଜପତି ସାହୁ ଉତ୍ତେଜିତ ହୋଇଥିଲେ ଓ ବିଜେଡିଶାସନ ସମୟର ପ୍ରକଲ୍ପରେ ବିଜେପି ସରକାର କେବଳ ରଙ୍ଗମାରିଦେଇ ନିଜନେତାଙ୍କ ନାମ ଦେଇଛନ୍ତି କହି ଫଳକକୁ ଭାଙ୍ଗିଦେଇଥିଲେ । କିଛି ସମୟ ଉଦଘାଟନୀସ୍ଥଳରେ ହୋହଲ୍ଲା ହୋଇଥିଲା । ପରେ ସଇଁତଳା ପୋଲିସ ଆସି ସରପଞ୍ଚ ଗଜପତି ସାହୁଙ୍କୁ ଗିରଫ କରି ସଇଁତଳା କୋର୍ଟକୁ ଚାଲାଣ କରିଥିଲା । ଏନେଇ ସଇଁତଳା ଥାନାରେ ମାମଲା ନମ୍ବର ୧୦/୨୬ ରୁଜୁ କରାଯାଇଛି । ଏହାର ପ୍ରତିବାଦରେ ଆଜି ସରପଞ୍ଚ ଓ ସମିତିସଭ୍ୟମାନଙ୍କ ମିିଳିତ ଆନୁକୂଲ୍ୟରେ ଥାନାକୁ ଘେରାଉ କରାଯାଇଥିଲା । ଘଟଣାସ୍ଥଳକୁ ଟିଟିଲାଗଡ ଏସଡିପିଓ ଯଶୋବନ୍ତ ପଧାନୀ ଓ ଆଇଆଇସି ଖଗପତି ବିଶ୍ୱାଳ ପହଞ୍ଚି ଆନ୍ଦୋଳନକାରୀଙ୍କୁ ବୁଝାଶୁଝା କରିଥିଲେ । ଥାନା ସମ୍ମୁଖରେ କିଛିସମୟ ପୋଲିସ ଓ ଆନ୍ଦୋଳନକାରୀଙ୍କ ମଧ୍ୟ ଉଚ୍ଚବାଚ ମଧ୍ୟ ହୋଇଥିଲା । ଏସଡିପିଓ ଶ୍ରୀ ପ୍ରଧାନୀଙ୍କ ସହ ଆଲୋଚନା ପରେ ଆନ୍ଦୋଳନ ପ୍ରତ୍ୟାହାର ହୋଇଥିଲା  । କୋର୍ଟରେ ଗଜପତି ସାହୁଙ୍କ ଜାମିନ ନାମଞ୍ଜୁର ହେବାରୁ ତାଙ୍କୁ ଟିଟିଲାଗଡ଼ ଜେଲକୁ ପଠାଇ ଦିଆଯାଇଛି l ପ୍ରକାଶ

ଯେ,୨୦୨୫ ମସିହାରେ ବଲାଙ୍ଗୀର ଜିଲ୍ଲା କୃଷିଭବନ ଉଦଘାଟନ ସମୟରେ ମଧ୍ୟ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓ ଓ ସାଂସଦ ସଂଗୀତାଙ୍କ ନାମ ଉଦଘାଟନୀ ଫଳକରେ ଥିବା ବେଳେ ବଲାଙ୍ଗୀର ବିଧାୟକ କଳିକେଶ ନାରାୟଣ ସିଂଦେଓ କିମ୍ବା ଜିଲ୍ଲାପରିଷଦର ଅଧ୍ୟକ୍ଷା ଦେବକୀ ସାହୁଙ୍କ ନାମ ନଥିଲା । ତେଣୁ ବିଜେଡିଦଳ ପକ୍ଷରୁ ଜିଲ୍ଲା କୃଷିକାର୍ଯ୍ୟାଳୟ ଘେରାଉ କରାଯାଇ ଉକ୍ତ ଉଦଘାଟନୀ ଫଳକରେ କଳାବୋଳି ଦିଆଯାଇଥିଲା । ସରକାରୀ କାର୍ଯ୍ୟକ୍ରମରେ ଏଭଳି ପାତରଅନ୍ତର କରାଯାଉଥିବାରୁ ଜିଲ୍ଲାପ୍ରଶାସନର ଭୂମୀକାକୁ ନେଇ ଜନଅସନ୍ତୋଷ ବଢୁଛି । ପ୍ରଶାସନିକ ଅଧିକାରୀମାନେ ରାଜନୈତିକ ଚାପରେ ଏଭଳି ହୀନମନ୍ୟତା ଦେଖାଉଥିବା ଅଭିଯୋଗ ଉଠୁଛି ।