10-Jun-2025

ବଲାଙ୍ଗିର(ପ୍ରେରଣା ଖବର): ରାଜ୍ୟରେ ମୋହନ ସରକାର ଆସିଲା ପରେ କୃଷକ କଲ୍ୟାଣ ପାଇଁ ଅନେକ ଯୋଜନା କରାଗଲା କିନ୍ତୁ ତଥାପି ବଲାଙ୍ଗିର ଜିଲ୍ଲାର ଧାନମଣ୍ଡି ମାନଙ୍କରେ ବ୍ୟାପକ ଅବ୍ୟବସ୍ଥା ରହିଛି ଓ ଚାଷୀ ଠକେଇର ଶିକାର  ହେଉଥିବା କହି ରାଜ୍ୟ ଭାଜପାର କୃଷକ ମୋର୍ଚା ସଭାପତି ମହେଶ୍ୱର ସାହୁ କ୍ଷୋଭ ପ୍ରକାଶ କରିଛନ୍ତି l ସେ ବଲାଙ୍ଗିର ଜିଲ୍ଲାର ସାଲେଭଟା, ମୁରୁଶୁଣ୍ଡି , ଦେଓଗାଁ, କୁତୁର୍ଲା, ସଈଁତଲା ପ୍ରଭୃତି ଧାନମଣ୍ଡୀକୁ  ପରିଦର୍ଶନ କରିବା ସହିତ ଚାଷୀ ମାନଙ୍କ ସହିତ ବିଭିନ୍ନ ସମସ୍ୟା ବିଷୟରେ ଆଲୋଚନା କରିଥିଲେ। ଓଡିଶାରେ ଧାନକିଣା କାରବାର ସ୍ଵଚ୍ଛ ଓଶୃଙ୍ଖଳିତ ଭାବେ କରିବା ପାଇଁ ରାଜ୍ୟ ସରକାର ବ୍ୟାପକ ବ୍ୟବସ୍ଥା କରିଛନ୍ତି। କେନ୍ଦ୍ର ଓ ରାଜ୍ୟ ସରକାରଙ୍କ ଧାନ ସଂଗ୍ରହ ଅଧିନିୟମ ମାର୍ଗଦର୍ଶକା ଅନୁଯାୟୀ ଠିକଠାକ୍ ଭାବେ ଚାଷୀ ମାନଙ୍କ ଠାରୁ ଧାନ କ୍ରୟ କରାଯାଉଛି କି ନାହିଁ ରାଜ୍ୟ ସଭାପତି ମହେଶ୍ଵର ସାହୁ ତଦାରଖ କରିଥିଲେ। ଓଡିଶାର ଚାଷୀ ମାନଙ୍କର ଆୟକୁ ଦୁଇଗୁଣା କରିବା ସହିତ ଚାଷୀ ମାନଙ୍କୁ ସମୃଦ୍ଧ କରିବା ସହିତ ବିଜେପି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସରକାର  ବ୍ୟାପକ କୃଷକ କଲ୍ୟାଣକାରୀ ଯୋଜନା କରୁଛନ୍ତି। ବିଜେପି ସରକାର ଚାଷୀମାନଙ୍କ ପାଇଁ ସମର୍ପିତ ସରକାର ବୋଲି ରାଜ୍ୟ ସଭାପତି ମହେଶ୍ଵର ସାହୁ କହିଥିଲେ।   ବଲାଙ୍ଗୀର ଜିଲ୍ଲା ଧାନମଣ୍ଡୀ ପରିଦର୍ଶନ ସମୟରେ ଚାଷୀ ମାନଙ୍କୁ ଚିରାଫଟା ବସ୍ତା ଦିଆଯାଉଥିବାରୁ ଅସନ୍ତୋଷ ପ୍ରକାଶ କରିଥିଲେ। ତତସହିତ ମିଲର୍ସ ମାନେ ଧାନ ପରିବହନ ପାଇଁ ଗାଡି ଠିକ ଭାବେ ଦେଉନଥିବାରୁ ଚାଷୀ ମାନେ ହଇରାଣ ହରକତ ହେଉଥିବା ଉପସ୍ଥିତ ଚାଷୀ ମାନେ ରାଜ୍ୟ ସଭାପତି ମହେଶ୍ଵର ସାହୁଙ୍କ ଠାରେ ଅଭିଯୋଗ କରିଥିଲେ। ବଲାଙ୍ଗିର ଜିଲାରେ ବିଜେଡି ସମର୍ଥିତ ପେକ୍ସ ସଭାପତି ମାନେ ଧାନକିଣା କାରବାରରେ ବ୍ୟାପକ ଅବ୍ୟବସ୍ଥା କରିବା ସହିତ ଚାଷୀ ମାନଙ୍କ ଠାରୁ ଧାନ କ୍ରୟରେ ପାତରଅନ୍ତର କରୁଥିବା ଚାଷୀ ମାନେ ଅଭିଯୋଗ କରିଥିଲେ। ଏହି ସବୁ ସମସ୍ୟାର ଯଥାଶୀଘ୍ର ପଦକ୍ଷେପ ଗ୍ରହଣ କରାଯିବ ବୋଲି ଶ୍ରୀ  ସାହୁ କହିଥିଲେ।  ଏହି ପରିଦର୍ଶନରେ ବିଜେପି କୃଷକ ମୋର୍ଚ୍ଚା ରାଜ୍ୟ ଉପସଭାପତି ପୁଲିନ୍ ପ୍ରକାଶ ପୁହାଣ, ରାଜ୍ୟ ସଂଯୋଜକ ରାଜକିଶୋର ମେଣ୍ଡେଲୀ, କୃଷକ ମୋର୍ଚ୍ଚା ଜିଲ୍ଲା ସଭାପତି  ମାଧବ ସାଏ, ଜଗବନ୍ଧୁ ପ୍ରଧାନ, ସୁଦାମ ଦନ୍ତା, ପିତାମୂର କଣ୍ଟା, ସୀତାରାମ ପ୍ରଧାନ, ଶଶିଭୂଷଣ ପାଣିଗ୍ରାହୀ, ବିଜୁ ନାୟକ, କାମରାଜ ପ୍ରଧାନ, ରୋହିତ୍ ସାହୁ, ଗୋପିନାଥ ଭାଟି, ଚନ୍ଦ୍ର ଚନ୍ଦନ, କୁଳମଣି ବାରିକ, ପର୍ଶୁରାମ୍ ସେଠ୍ ଙ୍କ ସମେତ ଶତାଧିକ ଚାଷୀ ସାମିଲ ହୋଇଥିଲେ।