14-Apr-2025

ବରଗଡ଼:(ନିରଞ୍ଜନ ତ୍ରିପାଠୀ)- ହନୁମାନ ଜନ୍ମୋତ୍ସବ ସମ୍ମନ୍ନୟ ସମିତି ପକ୍ଷରୁ ଏକ ବିଶାଳ ଝଣ୍ଡା ଶୋଭାଯାତ୍ରା ଅନୁଷ୍ଠିତ ହୋଇଯାଇଛି। ପ୍ରଥମେ ବିଜେପୁର ଜମିଦାର ପଡ଼ା ସିଂହଦ୍ଵାର ଶ୍ରୀ ହନୁମାନ ମନ୍ଦିରରୁ ପୂଜାର୍ଚ୍ଚନା କଲାପରେ ଶୋଭାଯାତ୍ରା ବାହାରି ଥିଲା।ଦୁଲଦୁଲି ବାଦ୍ୟ,ଡିଜେ ତଥା ଘଣ୍ଟବାଦ୍ୟର ତାଳେତାଳେ ରାମଜୀ ମନ୍ଦିର,ଉପରପଡା, ମଧ୍ୟ ପଡ଼ା,ହଟୁଆ ପଡ଼ା,କଂସାରି ପଡ଼ାରୁ ଶ୍ରୀରାମ ନଗର ଛକ, ବଜରଙ୍ଗ ଛକ ,ଭୋଇ ପଡ଼ା ଆଦିର ପ୍ରମୁଖ ପଡାମଧ୍ୟ ଦେଇ ନଗର ପରିକ୍ରମା କଲାପରେ ଶୋଭାଯାତ୍ରା ବସଷ୍ଟାଣ୍ଡ କୁ ପହଞ୍ଚିଥିଲା।ପରେ ବସଷ୍ଟାଣ୍ଡ ଠାରେ ପ୍ରସାଦ ସେବନ ବଣ୍ଟନ କରାଯାଇଥିଲା। ବିଶ୍ବହିନ୍ଦୁ ପରିଷଦ  ଜିଲ୍ଲା ସମ୍ପାଦକ ଶ୍ରୀଯୁକ୍ତ ଭୁବନେଶ୍ବର ସାହୁଙ୍କ ଆବାହକତ୍ୱରେ ମାନ୍ୟବର ବିଜେପୁର ଜମିଦାର ତଥା ବିଧାୟକ ଶ୍ରୀମାନ ସନତ କୁମାର ଗଡତୀୟା ମୁଖ୍ୟ ଅତିଥି ଭାବେ ଯୋଗଦାନ କରି ଶୋଭାଯାତ୍ରାରେ ସାମିଲ ହୋଇଥିଲେ। ବସଷ୍ଟାଣ୍ଡ ଠାରେ ହିନ୍ଦୁ ଏକତା ନିମନ୍ତେ ଆମେ ସମସ୍ତେ ରାଷ୍ଟ୍ର ଧର୍ମ ପାଳନ କରିବା ପାଇଁ ଅଭିଭାଷଣ ପ୍ରଦାନ କରାଯାଇଥିଲା। ପ୍ରତି ଗ୍ରାମ, ପଞ୍ଚାୟତ, ବ୍ଲକ ସ୍ତରରେ ହିନ୍ଦୁ ସଂଗଠନ ସମିତି ଗଠନ କରି ସତସଙ୍ଗ, ସେବା, ସଂସ୍କାର ମାଧ୍ୟମରେ ସମଗ୍ର ହିନ୍ଦୁ ସମାଜକୁ ଜାଗ୍ରତ କରିବା ପାଇଁ ସଂକଳ୍ପ ନେଇଥିଲେ।ସବୁ ହିନ୍ଦୁ ଏକ ହୁଅ... ଗର୍ବରେ କୁହ ମୁଁ ହିନ୍ଦୁ,ମୁଁ ସନାତନୀର ସ୍ୱର ସ୍ଲୋଗାନ କୁ ପ୍ରତିଦିନ ଅଭ୍ୟାସରେ ପରିଣତ କରିବା ପାଇଁ ମାର୍ଗଦର୍ଶନ ପ୍ରଦାନ କରାଯାଇଥିଲା।ଝଣ୍ଡା ଶୋଭାଯାତ୍ରାରେ ଓଡ଼ିଶା ଡ୍ରାଇଭର ମହାସଂଘ ବିଜେପୁର ଶାଖା ତଥା ବିଭିନ୍ନ ସଂଗଠନ, ବ୍ଲକର ପ୍ରତ୍ୟେକ ଗ୍ରାମରୁ ବୀର ବଜରଙ୍ଗ ବଲୀ ଭକ୍ତ ହଜାର ସଂଖ୍ୟାରେ ସାମିଲ ଥିବା ଦେଖିବାକୁ ମିଳିଥିଲା। ସ୍ଥାନୀୟ ଆଇଆଇସି ସୁଶାନ୍ତମଣି ମହାନ୍ତିଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ସ୍ଥାନୀୟ ପୋଲିସ ଶାନ୍ତି ଶୃଙ୍ଖଳାରେ ସହଯୋଗ କରିଥିଲେ।