05-Jan-2025

ବରଗଡ:(ନିରଞ୍ଜନ ତ୍ରିପାଠୀ)-ନୂତନ ବର୍ଷରେ ନୂତନ ଯୋଜନା ପ୍ରସ୍ତୁତ ପାଇଁ ବରଗଡ଼ ଜିଲ୍ଲା ଗାଇସୀମା ଠାରେ ଜୟ କିସାନ ଆନ୍ଦୋଳନ ର ଏକ କର୍ମୀ ସମ୍ମିଳନୀ ବରିଷ୍ଠ ଚାଷୀ ନେତା ଶିବ ପ୍ରସାଦ ପ୍ରଧାନଙ୍କ ସଭାପତିତ୍ବରେ ଅନୁଷ୍ଠିତ ହୋଇଯାଇଛି। ଏହି ସମ୍ମିଳନୀରେ ଧାନ ବିକ୍ରି ସମସ୍ୟା, ବିଜୁଳି ସମସ୍ୟା,ଗନ୍ଧମାର୍ଦ୍ଦନସୁରକ୍ଷାଆନ୍ଦୋଳନ ଏବଂ ବର୍ତ୍ତମାନ ଚାଲିଥିବା ଦିଲ୍ଲୀର କୃଷକ ଆନ୍ଦୋଳନ ଉପରେ ବିସ୍ତୃତ ଆଲୋଚନା ହୋଇଥିଲା। ଗନ୍ଧମାର୍ଦ୍ଦନ ପର୍ବତକୁ ଆଦାନୀ କୁ ଲିଜ ଦେବା ପ୍ରସଂଗ ସମଗ୍ର ପଶ୍ଚିମ ଓଡିଶାରେ ବର୍ତ୍ତମାନ ଚର୍ଚ୍ଚାର ବିଷୟ ପାଲଟି ଯାଇଛି। ଏହାକୁ ନେଇ ରାଜନୀତି ସରଗରମ ହୋଇ ପଡିଥିବା ବେଳେ ଜୟ କିସାନ ଆନ୍ଦୋଳନର କର୍ମୀମାନଙ୍କ ମଧ୍ୟରେ ମଧ୍ୟ ତତ୍ପରତା ପ୍ରକାଶ ପାଇଛି। ଆସନ୍ତା ୧୧ ଜାନୁଆରୀରେ ସଂଗଠନ ତରଫରୁ ଗନ୍ଧମାର୍ଦ୍ଦନ ପାଦଦେଶରେ ଥିବା ନୃସିଂହନାଥ ଏବଂ ହରିଶଂକରକୁ ଏକ ମୋଟର୍ ସାଇକେଲ ଯାତ୍ରା କରିବା ପାଇଁ ସମ୍ମିଳନୀ ରେ ନିଷ୍ପତ୍ତି ହୋଇଛି। ବର୍ତ୍ତମାନ ସମଗ୍ର ପଶ୍ଚିମ ଓଡିଶାରେ କଟଣି ଛଟଣି ଯୋରସୋରରେ ଚାଲିଥିବା ବେଳେ ମନ୍ତ୍ରୀ ବିଧାୟକ ଚୁପ ଥିବା ନେଇ ସମ୍ମିଳନୀରେ ଉଦବେଗ ପ୍ରକାଶ ପାଇଥିଲା। ସମ୍ମିଳନୀରେ  ପଶ୍ଚିମ ଓଡିଶା କୃଷକ ସଂଗଠନ ସମନ୍ବୟ ସମିତିର ଆବାହକ ଲିଙ୍ଗରାଜ ଯୋଗଦେଇ  କହିଥିଲେ ଯେ ଗନ୍ଧମାର୍ଦ୍ଦନ ସୁରକ୍ଷା ଯୁବ ପରିଷଦ ତରଫରୁ  ହରିଶଂକର ଖପରାଖୋଲ ଠାରେ ଜାନୁଆରୀ ୧୨ ତାରିଖରେ ଏକ ଜନ ସମାବେଶ କାର୍ଯ୍ୟକ୍ରମ ର ଆୟୋଜନ କରୁଅଛି । ଏହି କାର୍ଯ୍ୟକ୍ରମକୁ  ବରଗଡ଼ ଜୟ କିସାନ ଆନ୍ଦୋଳନ ତରଫରୁ ଏକ ମୋଟର୍ ସାଇକେଲ ଯାତ୍ରାରେ ଶତାଧିକ କର୍ମୀ ଯୋଗଦେବେ ବୋଲି ସେ  ଆହ୍ୱାନ ଦେଇଥିଲେ। ଏଥି  ସହିତ ପଞ୍ଜାବ ହରିୟାଣା ସୀମାରେ ସଂଯୁକ୍ତ କିସାନ ମୋର୍ଚ୍ଚା ତରଫରୁ  ଚାଲିଥିବା କୃଷକ ଆନ୍ଦୋଳନର ନେତା "ଜଗଜୀତ ସିଂହ ଦଲ୍ଲେୱାଲ" ବିଭିନ୍ନ ଦାବିରେ  ଗତ ୪୦ ଦିନ ହେବ ଆମରଣ ଅନଶନରେ ଅଛନ୍ତି । ସରକାର କିମ୍ବା ତାଙ୍କର କୌଣସି ପ୍ରତିନିଧି ଆନ୍ଦୋଳନକାରୀଙ୍କ ସହିତ ଆଲୋଚନା ମଧ୍ୟ କରୁନାହାନ୍ତି। ଏହା ଏକ ଗଣତାନ୍ତ୍ରିକ ରାଷ୍ଟ୍ର ପାଇଁ ଆଦୌଁ ଶୁଭଙ୍କର ନୁହେଁ ବୋଲି କହି ସରକାର କୁ ନିନ୍ଦା କରିଥିଲେ। ସଂଯୁକ୍ତ କିସାନ ମୋର୍ଚ୍ଚା ତରଫରୁ ତିନି କଳା କୃଷି  ଆଇନ ପ୍ରତ୍ୟାହାର ଦାବିରେ  ଯେଉଁ ଐତିହାସିକ ଚାଷୀ  ଆନ୍ଦୋଳନ ହୋଇଥିଲା  ସେଥିରେ ଏକ ଘଟକ ସଂଗଠନ ଭାବରେ ଜୟ କିସାନ ଆନ୍ଦୋଳନ ଅଂଶଗ୍ରହଣ କରିଥିଲା ଏବଂ ବର୍ତ୍ତମାନ ଚାଲିଥିବା ଆନ୍ଦୋଳନକୁ  ମଧ୍ୟ ସମର୍ଥନ କରି ସ୍ଥାନୀୟ ସ୍ତରରେ ଆନ୍ଦୋଳନ କରିବ ବୋଲି ସେ  କହିଥିଲେ। ଏହି ସମ୍ମିଳନୀରେ ଆସନ୍ତା ରବି ରୁତୁରେ  ଓଡିଶାରେ ଛତିଶଗଡ ଭଲି ମଣ୍ଡି ବ୍ଯବସ୍ଥା କରିବା ପାଇଁ ଆନ୍ଦୋଳନ କରିବା ପାଇଁ ନିଷ୍ପତ୍ତି ହୋଇଥିଲା।ଏହି କାର୍ଯ୍ୟକ୍ରମରେ ଜୟ କିସାନ ଆନ୍ଦୋଳନର ଜିଲ୍ଲା ସଭାପତି ସୁଶୀଲ କୁମାର ସାହୁ, ସାଧାରଣ ସଂପାଦକ ହର ବଣିଆଁ, ଅରୁଣ କୁମାର ସାହୁ, ମହେଶ୍ବର ପ୍ରଧାନ, ଚଞ୍ଚଳ ପ୍ରଧାନ, ପ୍ରଫୁଲ୍ଲ ସାହୁ,  କୁନା ବେହେରା, ଅରୁଣ ପ୍ରଧାନ,  ସରୋଜ କୁମାର ସୁନା, ସୀତାରାମ ମେହେର,  ସୁଶାନ୍ତ ସାହୁ,ମିନିଷ୍ଟର୍ ବାରିକ, ମିନକେତନ ସାହୁ ପ୍ରମୁଖ  ଆଲୋଚନା ରେ ଅଂଶଗ୍ରହଣ କରିଥିଲେ। ଶେଷରେ ସରୋଜ ପ୍ରଧାନ ଧନ୍ୟବାଦ ପ୍ରଦାନ କରିଥିଲେ।