19-Sep-2024

ଡୁଙ୍ଗୁରିପାଲି(ଅରବିନ୍ଦ ମିଶ୍ର)- ବରଗଡ-ବୋରିଗୁମ୍ମା ୨୬ ନମ୍ବର ଜାତୀୟ ରାଜପଥ ବରଗଡଠାରୁ ବରପାଲି ପର୍ଯ୍ୟନ୍ତ ଚାରି ଥାକିଆ ହୋଇଥିବା ବେଳେ ବଲାଙ୍ଗିର ଜିଲ୍ଲା ବଲାଙ୍ଗିରଠାରୁ ସାଲେଭଟା ପର୍ଯ୍ୟନ୍ତ ସଂପ୍ରସାରଣ କାମ ମଧ୍ୟ ସରିଯାଇଛି । କିନ୍ତୁ ସୁବର୍ଣ୍ଣପୁର ଜିଲ୍ଲାର ୧୨ କିମି ରାସ୍ତା ଚିନାଜୁରିଠାରୁ ଚେରୁପାଲି ପର୍ଯ୍ୟନ୍ତ ରାସ୍ତାକୁ ବର୍ଷ ବର୍ଷ ଧରି କାମ ଚାଲି ଥିବା ବେଳେ  ବର୍ଷେ ହେବ କାମ ବନ୍ଦ ରହିଛି । ଚିନାଯୁରୀଠାରୁ ଖୁଣ୍ଟପାଲି ଏଫସିଆଇ ଏବଂ ଚେରୁପାଲିରୁ ବୈଦୁପାଲି ପର୍ଯ୍ୟନ୍ତ ବହୁ କଷ୍ଟରେ କାମ ସଂପୂର୍ଣ୍ଣ ହୋଇଥିବା ବେଳେ ଡୁଙ୍ଗୁରିପାଲିର ଉଭୟ ପଟରେ କାମ ବନ୍ଦ ରହିଛି ।ଏଥିପାଇଁ ବିଭିନ୍ନ ସଂଗଠନ ପକ୍ଷରୁ ଧାରଣା , ଆନ୍ଦୋଳନ ମଧ୍ୟ କରାଯାଇଛି । ପ୍ରଶାସନ ପକ୍ଷରୁ ନଭେମ୍ବର ୨୦୨୩ ପର୍ଯ୍ୟନ୍ତ କାମ ସଂପୂର୍ଣ୍ଣ କରାଯିବ ବୋଲି ଲିଖିତ ପ୍ରତିଶୃତି ଦେଇଥିଲେ ମଧ୍ୟ  ଅଂଚଳବାସୀଙ୍କୁ ଧୋକା ଦିଆଯାଇଛି ।  ପ୍ରଶାସନର ମିଛୁଆ ପ୍ରତିଶୃତିରେ ଅଂଚଳବାସୀ ଆନ୍ଦୋଳନକୁ ମଧ୍ୟ ସ୍ଥଗିତ ରଖିଥିଲୋ  କିନ୍ତୁ ପ୍ରସାଶନ ତାଙ୍କ ପ୍ରତିଶୃତି ରଖିପାରି ନଥିଲେ । ଯାହାର ଅସୁବିଧା ଆଜି ଲୋକେ ଭୋଗୁଛନ୍ତି ।ଉକ୍ତ ରାସ୍ତା ଦେଇ ଟିଟିଲାଗଡ, ପାଟଣାଗଡ, ବଲାଙ୍ଗିର, ସଇଁତଲା , ଲୋଇସିଂହା ଅଂଚଳରୁ ପ୍ରତ୍ୟେହ ଶହ ଶହ ଗାଡି ମଟର ସହିତ ରୋଗୀମାନେ ବୁର୍ଲା, ବରଗଡକୁ  ଆମ୍ବୁଳାନ୍ସ ଯୋଗେ ଯିବା ଆସିବା କରିଥାନ୍ତି । ସଇଁତଲା ଗୋଳାବାରୁଦ କାରଖାନାକୁ ମଧ୍ୟ ବିଭିନ୍ନ ଗାଡି ମଟର ଯିବାଆସିବା କରୁଥିବା ବେଳେ  ଡୁଙ୍ଗୁରିପାଲିର ୟୁନିୟନ ବ୍ୟାଙ୍କ,  ଶିବାନନ୍ଦ ପଡା ଛକ, ଏସବିଆଇ ବ୍ୟାଙ୍କ, ଥାନା ସମ୍ମୁଖ, ସହଲା ଛକ, ଡେଲି ମାର୍କେଟ, ଶିବ ମନ୍ଦିର, ଆରଏସିଏମସ, ହିରୋ ସୋ ରୁମ ଠାରେ ବିରାଟ ବିରାଟ ଖାଲ ରହିଛି । ସବୁଠାରୁ ବିରାଟ ଖାଲ ଏଫସିଆଇ ସମ୍ମୁଖରେ ରହିଛି । ଏଠାରେ ରାସ୍ତା ଗୋଟିଏ ପାଶ୍ୱର୍ରେ ପାଣି ରହିଛି । ଯାହାକି ଏକ ପୋଖରୀର ଭ୍ରମ ସୃଷ୍ଟି କରିଛି । ଏହାକୁ ଲୋକେ ପରିହାସ କରି ଜାତୀୟ ରାଜପଥରେ ଜାତୀୟ ଖାଲ ବୋଲି କହିଥାନ୍ତି । ଉକ୍ତ ତିନି କିମି ରାସ୍ତାକୁ ପ୍ରାୟ ଅଧ ଘଣ୍ଟା ସମୟ ଲାଗି ରହିଥାଏ ।  ବିଭିନ୍ନ ଜିଲ୍ଲାରୁ ଲୋକେ  ଯିବା ଆସିବା ସମୟରେ  ବିଭିନ୍ନ ପ୍ରକାର ସମାଲୋଚନା କରିଥାନ୍ତି । କିଏ କହେ ଏଠାରେ ଲୋକ ଅଛନ୍ତି କି ନାହିଁ । ଏଠାରେ ନେତା ଅଛନ୍ତି କି ନାହିଁ । ଯଦି ଅଛି ଶୋଇ ପଡିଛି କି ? ନେତାମାନେ ଦେଖୁ ଛନ୍ତି କି ନାହିଁ । ସେମାନଙ୍କ ଆଖି ଅଛି କି ନାହିଁ । ଲୋକେ କିଛି କହୁ ନାହାନ୍ତି କାହିଁକି । ଆମ ଅଂଚଳ ହୋଇଥିଲେ  କଣ ନା କଣ ହୋଇ ଥାନ୍ତା ବୋଲି ଅନେକ  ଭର୍ସନା କରିଥାନ୍ତି ।  ଉକ୍ତ ରାସ୍ତା  ମରାମତି ବା ସଂପ୍ରସାରଣ କାମ ନ ହେଲେ ଏଥର ଲୋକଙ୍କ ପୁଞ୍ଜିଭୁତ ଅସନ୍ତୋଷ ଏକ ବିରାଟ ଆନ୍ଦୋଳନ ଦେଖା ଦେବ । ଯାହାକି ପ୍ରଶାସନକୁ ମହଙ୍ଗା ପଡିବ ବୋଲି ଲୋକଙ୍କ ମଧ୍ୟରେ ଦାନା ବାନ୍ଧୁଛି ।