19-Sep-2024

ଡୁଙ୍ଗୁରିପାଲି(ଅରବିନ୍ଦ ମିଶ୍ର)-ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ବ୍ଲକ ବୈଦୁପାଲି ପଞ୍ଚାୟତ ଅନ୍ତର୍ଗତ ଲରିଆବାହାଲ ସେମେଲ ପୋଖରୀ । ଗତ ବର୍ଷ ୨୩ ଲକ୍ଷ ଟଙ୍କାରେ ଉକ୍ତ ପୋଖରୀର ମାଟି କାମ ହୋଇଥିବା ସୂଚନା ଫଳକରୁ ଜଣାଯାଏ । ପୋଖରୀରୁ ମାଟି କାମ ହୋଇ ହୁଡାରେ ପକାଇଯାଇଥିବା ପ୍ରଶାସନ ପକ୍ଷରୁ ସଫେଇ ଦେଇ ଆସୁଥିବା ବେଳେ ଏହି ପୋଖରୀ କାମରେ  ପ୍ରାୟ ୭ ଲକ୍ଷ ଟଙ୍କାର ଦୁର୍ନୀତି ହୋଇଥିବା ଗ୍ରାମବାସୀ, ୱାର୍ଡ ସଭ୍ୟମାନେ  ଅଭିଯୋଗ କରିଆସୁଛନ୍ତି । ଏହାର ତଦନ୍ତ କରାଯିବା ଦୂରେଥାଉ ଦୁର୍ନୀତିକୁ ଚପାଇବାକୁ ବିଭିନ୍ନ ମହଲରେ ଅଭିଯୋଗକାରୀମାନଙ୍କ ଉପରେ ଚାପ ସୃଷ୍ଟି କରିବା ସହ କାମ ଠିକ୍ ହୋଇଥିବା  ଦାୟିତ୍ୱରେ ଥିବା ଅଧିକାରୀମାନେ ବାହାସ୍ପୋଟ ମାରିଆସୁଛନ୍ତି । ପୋଖରୀ ସାରା ବିଭିନ୍ନ ଲକଟାବୁଦାରେ ଭର୍ତ୍ତି ହୋଇଥିବା ବେଳେ ଅଧିକା ପାଣି ଯିବାକୁ ବ୍ୟବସ୍ଥା ମଧ୍ୟ କରାଯାଇ ନାହିଁ । ଗତ ବର୍ଷ କାମ ଚାଲିଥିବା ବେଳେ ଜୁନ ମାସ ଆସିଯିବାରୁ ତରବରରେ କାମ ସଂପୂର୍ଣ୍ଣ ହୋଇଥିବା କହି ବର୍ଷା ସମୟରେ ପୋଖରୀର ପାଣି ଭର୍ତ୍ତି କରି ଦେଳେ ।  କାମ କେତେ ହୋଇଛି ଏହାର ପ୍ରମାଣ ନଷ୍ଟ କରାଯାଇ ବିଭିନ୍ନ  କିସ୍ତିରେ ୨୩ ଲକ୍ଷ ଟଙ୍କା ମଧ୍ୟ ଉଠାଯାଇଛି । ଏହାକୁ ମିଳିମିଶି ଭାଗବଣ୍ଟା କରି ପୋଖରୀକୁ ଖୋଲ କରି ଗ୍ରାମବାସୀଙ୍କୁ ଲଲିପପ୍ ଧରାଇ ଦେଲେ ।  ଯିଏ ବିରୋଧ କରି ଅଭିଯୋଗ କଲା ସେମାନଙ୍କୁ ବିଭିନ୍ନ ପ୍ରକାର ଧମକ ମଧ୍ୟ ଦିଆଯିବା ସହ ସରକାରୀ ଯୋଜନା ବନ୍ଦ କରାଯିବ ବୋଲି ମଧ୍ୟ ଧମକ ଦିଆଯାଇଛି । କାହାକୁ ଟାଉଟର କହିବା ବେଳେ କାହାକୁ ଉଦ୍ଦେଶ୍ୟ ବୋଲି ଅଭିଯୋଗକୁ ଭିତ୍ତିହୀନ କହି ତଦନ୍ତ କରାଗଲା ନାହିଁ । କିନ୍ତୁ ଆଜି ସମସ୍ତ ସତ ଜଣା ପଡିଛି ।ନିମ୍ନ ମାନର କାମ ଯୋଗୁଁ ରାତିରେ  ପୋଖରୀ  ହୁଡା ଭାଙ୍ଗି ଯାଇଛି ।  ପାଣି ଚାଲିଯିବା ବେଳେ ଲଟା ବୁଦା ରହିଛି ।  ଏତେ ଟଙ୍କାର ଅନୁଦାନରେ ଏକ ସୁନ୍ଦର ପୋଖରୀ ହେବା କଥା । କିନ୍ତୁ  ନିମ୍ନମାନର କାମ ଯୋଗୁଁ  ଆଜି ପୋଖରୀର ଅବସ୍ଥା ଏପରି ।  ବର୍ତ୍ତମାନ ବଡ ଖାଇ ସୃଷ୍ଟି ହୋଇଥିବାରୁ ଏହାର ମରାମତି କିଏ କରିବ ? ଉକ୍ତ ଘାଇ ଯୋଗୁଁ ଗ୍ରାମବାସୀ ବିପଦ ସଂକୁଳ ଅବସ୍ଥାରେ ଯିବା ଆସିବା କରୁଛନ୍ତି । ଏହାର ତଦନ୍ତ କରାଯିବାକୁ ଗ୍ରାମର ବିକାଶ ହାତୀ, ନିଳମଣୀ ସାହୁଙ୍କ ସମେତ ୱାର୍ଡସଭ୍ୟମାନେ  ଅଭିଯୋଗ କରିଛନ୍ତି ।  ନଚେତ ଆଗାମୀ ଦିନରେ  ବ୍ଲକ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯିବ ବୋଲି ଜଣାଇଛନ୍ତି ।