09-May-2024

ସୁବର୍ଣପୁର (ମନୋରଞ୍ଜନ ତ୍ରିପାଠୀ )
ସାଧାରଣ ନିର୍ବାଚନ ୨୦୨୪ କୁ ଅବାଧ ଓ ନିରପେକ୍ଷ ଭାବେ ପରିଚାଳନା ପାଇଁ ଭାରତ ନିର୍ବାଚନ କମିଶନର ଜାରି କରିଥିବା ସି-ଭିଜିଲ ଆପ୍ ମାଧ୍ୟମରେ ସୁବର୍ଣ୍ଣପୁର ଜିଲ୍ଲାର ସଚେତନ ଭୋଟର ତଥା ଜନସାଧାରଣ ମଧ୍ୟ ନିର୍ବାଚନ ସମ୍ପର୍କିତ ଆଇନ ଉଲଂଘନ ପାଇଁ ଅଭିଯୋଗ କରି ପାରିବେ ବୋଲି ଜିଲା ନିର୍ବାଚନ ବିଭାଗ ପକ୍ଷରୁ ସୂଚନା ଦିଆଯାଇଛି। ଜିଲ୍ଲାର ଉଭୟ ସୋନପୁର ଓ ବୀରମହାରାଜପୁର ବିଧାନସଭା ନିର୍ବାଚନ ମଣ୍ଡଳୀର ଯେ କୌଣସି ସ୍ଥାନରେ ଲାଗୁ ହୋଇଥିବା ଆଦର୍ଶ ନିର୍ବାଚନ ଆଚରଣ ବିଧି ର ଉଲଂଘନ ଯେପରି କୌଣସି ରାଜନୈତିକ ଦଳ କିମ୍ବା ବ୍ୟକ୍ତିଙ୍କ ଦ୍ବାରା ମାଗଣା ଉପହାର ପ୍ରଦାନ, ଭୋଟ ପାଇଁ ଲାଞ୍ଚ ପ୍ରଦାନ, ଭୋଟରଙ୍କୁ ଆକୃଷ୍ଟ ପାଇଁ ନିଶା ଦ୍ରବ୍ୟ ବଣ୍ଟନ , ପ୍ରାର୍ଥୀଙ୍କ ପ୍ରଚାରରେ ନିୟୋଜିତ ହୋଇଥିବା ଲାଉଡ଼ ସ୍ପିକର ଅନୁମତି ଠାରୁ ଅଧିକ ଶବ୍ଦ କରିବା କିମ୍ବା ନିର୍ଦ୍ଧାରିତ ସମୟରୁ ଅଧିକ ବ୍ୟବହାର ହେବା କ୍ଷେତ୍ରରେ ସମ୍ପୃକ୍ତ ଅଞ୍ଚଳର ସାଧାରଣ ଭୋଟର,ତଥା ଜନସାଧାରଣ  ନିଜ ମୋବାଇଲ ମାଧ୍ୟମରେ ସି -ଭିଜିଲ' ଆପ୍‌ଡାଉନଲୋଡ କରି ସେହି ମାଧ୍ୟମରେ ଫଟୋ କିମ୍ବା ଭିଡିଓ  କୁ ତୁରନ୍ତ ଜିଲ୍ଲା ନିର୍ବାଚନ କାର୍ଯ୍ୟାଳୟକୁ ପଠାଇ ପାରିବେ । ଏଥିରେ ଅଭିଯୋଗ କରିଥିବା ବ୍ୟକ୍ତିଙ୍କ ସମସ୍ତ ପରିଚୟକୁ ଅତ୍ୟନ୍ତ ଗୋପନ ରଖାଯାଇଥାଏ । ଜିଓ ଟ୍ୟାଗ୍ ମାଧ୍ୟମରେ ଏହି ଆପ୍ ପରିଚାଳିତ ହେଉଥିବାରୁ କୌଣସି ସ୍ଥାନରୁ ଅଭିଯୋଗ ମିଳିଲେ ତୁରନ୍ତ ଜିଲା ନିର୍ବାଚନ ବିଭାଗ ସେହି ଅଞ୍ଚଳକୁ ଠାବ କରିବାରେ ସକ୍ଷମ ହୋଇ ପାରିବେ ବୋଲି କୁହାଯାଇଛି । ତେବେ ମିଳିଥୁବା ଅଭିଯୋଗ ଗୁଡିକୁ ନିର୍ଦ୍ଧିଷ୍ଟ ସମୟ ୧୦୦ ମିନିଟ ମଧ୍ୟରେ ସମାଧାନ କରାଯିବାର ବ୍ୟବସ୍ଥା ରହିଛି । ଏପରିକି ନିଆଯାଉଥିବା ପଦକ୍ଷେପ ସମ୍ପର୍କରେ ମଧ୍ୟ ସମ୍ପୃକ୍ତ ବ୍ୟକ୍ତିଙ୍କ ନିକଟକୁ ସୂଚନା ଯିବାର ବ୍ୟବସ୍ଥା କରାଯାଇଛି । ଆଜି ପର୍ଯ୍ୟନ୍ତ ଏହି ସି -ଭିଜିଲ" ଆପ ମାଧ୍ୟମରେ ସୁବର୍ଣ୍ଣପୁର ଜିଲ୍ଲାରେ ଅନେକ ଅଭିଯୋଗ ଗ୍ରହଣ କରାଯାଇଥିବା ବେଳେ ଦେୟ ମୁକ୍ତ କଲ ସେଣ୍ଟର ୧୯୫୦ ମାଧ୍ୟମରେ ମଧ୍ୟ ମିଳିଥିବା ଅଭିଯୋଗ ଗ୍ରହଣ କରାଯାଇ ନିର୍ଦ୍ଧିଷ୍ଟ ସମୟ ମଧ୍ୟରେ ସମାଧାନ କରାଯାଇ ଥିବା ସୂଚନା ରହିଛି । ତେଣୁ ଜିଲାର ସମସ୍ତ ଭୋଟର ତଥା ଜନସାଧାରଣ ବିନା ଭୟରେ ଏହି 'ସି -ଭିଜିଲ' ଆପ୍ ଓ ଦେୟ ମୁକ୍ତ କଲ ନଂ ବ୍ୟବହାର କରି ଆଦର୍ଶ ନିର୍ବାଚନ ଆଚରଣ ବିଧି ଉଲଂଘନ ସମ୍ପର୍କରେ ସୂଚନା ଦେବାକୁ ଜିଲ୍ଲା ନିର୍ବାଚନ ଅଧିକାରୀ ତଥା ଜିଲ୍ଲାପାଳ ଅନ୍ୟା ଦାସ ସମସ୍ତଙ୍କୁ ଅନୁରୋଧ କରିଛନ୍ତି ।