08-May-2024

ବାଲାଙ୍ଗୀର/ଟିଟିଲାଗଡ(ପ୍ରେରଣା ଖବର ): ବଲାଙ୍ଗୀର ଜିଲ୍ଲାର ଟିଟିଲାଗଡ ବିଧାନସଭା କ୍ଷେତ୍ରରେ ବିଜେଡିଦଳ ପାଇଁ ବିପଦ ହୋଇଛନ୍ତି ଦଳର ଅସନ୍ତୁଷ୍ଟନେତା । ଯେଉଁମାନେ ଦିନେ ଟୁକୁନୀ ସାହୁଙ୍କୁ ଗୃହିଣୀରୁ ନେତ୍ରୀନିର୍ମାଣ କରିଥିଲେ ସେମାନେ ଦଳରେ ଅଲୋଡା ହୋଇ ଅସମ୍ମାନୀତ ଅନୁଭବ କଲାପରେ ଏବେ ଦଳଛାଡି ବିଜେପିରେ ଯୋଗଦେଇଛନ୍ତି । ଫଳରେ ଆସନ୍ତା ନିର୍ବାଚନରେ ବିଜେଡିଦଳ ଛାଡି ବିଜେପିରେ ଯୋଗ ଦେଇଥିବା ପ୍ରମୋଦ ପଧାନ, ବୀରବର ସାହୁ,ପଞ୍ଚାନନ ସାହୁ ଓ ନାରୀନେତ୍ରୀ ରଂଜୁରାଇମନ ପ୍ରମୁଖ ବିଜେଡିଦଳର ଖେଳ ବିଗାଡିବେ ବୋଲି ଟିଟିଲାଗଡରେ ଆଲୋଚନା ଚାଲିଛି । ଟିଟିଲାଗଡ ରାଜନୀତିରେ ଦୀର୍ଘ ୩୦ ବର୍ଷର ଅଭିଜ୍ଞତା ରଖିଥିବା ପ୍ରମୋଦ ପଧାନ ଟିଟିଲାଗଡରେ ଯୋଗେନ୍ଦ୍ର ବେହେରା, ସ୍ୱର୍ଗତ ଅଭିମନ୍ୟୁ ସାହୁ, ଟୁକୁନୀ ସାହୁଙ୍କ ସହ କାମ କରିଛନ୍ତି । ସ୍ୱର୍ଗତ ଅଭିମନ୍ୟୁ ସାହୁଙ୍କର ଦିନେ ଅତିଘନିଷ୍ଠ ଥିବା ପ୍ରମୋଦ ଅଭିମନ୍ୟୁଙ୍କ ମୃତ୍ୟୁପରେ ଅଭୁିମନ୍ୟୁଙ୍କ ପତ୍ନୀ ଟୁକୁନି ସାହୁଙ୍କ ଘରୁ ଡାକିଆଣି ନେତ୍ରୀ କରାଇଥିଲେ । ଗତ ୨୦୧୪ ଓ ୨୦୧୯ ମସିହାରେ ଟୁକୁନୀଙ୍କ ବିଜୟ ପଛରେ ପ୍ରମୋଦଙ୍କ ହାତ ରହିଥିବା ଚର୍ଚ୍ଚା ହୁଏ । ବିଜେଡିର ତଳସ୍ତରର କର୍ମିଙ୍କଠାରୁ ଆରମ୍ଭ କରି ରାଜ୍ୟସ୍ତରର ନେତାଙ୍କ  ପର୍ଯ୍ୟନ୍ତ ପ୍ରମୋଦଙ୍କ ଭଲ ସମ୍ପର୍କ ରହିଆସିଥିଲା । କିନ୍ତୁ ଗତ ପୌରନିର୍ବାଚନବେଳେ ଜଣେ ଅନାମଧ୍ୟେୟ ମହିଳାଙ୍କୁ ପୌରାଧ୍ୟକ୍ଷା ପ୍ରାର୍ଥି କରିବାରୁ ଦଳରେ ପ୍ରମୋଦଙ୍କ ବିରୋଧାଭାସ ହୋଇଥିଲା । ପ୍ରମୋଦ ପୌରନିର୍ବାଚନରେ ନୀରବ ରହିବା ଫଳରେ ବିଜେଡି ପୌରାଧ୍ୟକ୍ଷା ପଦ ହରାଇବାକୁ ପଡିଥିଲା । ଫଳରେ ମନ୍ତ୍ରୀ ଟୁକୁନୀ ସାହୁ ନିଜମୁଣ୍ଡ ଉପରୁ ଦୋଷ ଛଡାଇବା ପାଇଁ ପ୍ରମୋଦଙ୍କୁ ଦଳରୁ ନିଳମ୍ବିତ କରାଇଦେଲେ । ବିଜେଡିର ରାଜ୍ୟପରିଷଦ ସଭ୍ୟଥିବା ପ୍ରମୋଦଙ୍କୁ ବିଜେଡି କାରଣଦର୍ଶାଅ ନୋଟିସ ମଧ୍ୟ ନଦେଇ ନିଳମ୍ବିତ କରିଦେଲେ । ବିନାକାରଣରରେ ବିଜେଡିଦଳରୁ ନିଳମ୍ବିତ ହୋଇଥିବା ପ୍ରମୋଦ କୋଣଠେସା ଅନୁଭବ କରୁଥିଲେ । ଏବେ ନିର୍ବାଚନ ଆସିଲା ବେଳକୁ ବିଜେଡିଦଳର ଉଚ୍ଚକତ୍ତୃପକ୍ଷ ପ୍ରମୋଦଙ୍କୁ ମନାଇବାକୁ ଚେଷ୍ଟା କରିଥିଲେ । କିନ୍ତୁ ତାହା ଫେଲ ମାରିଥିଲା । ଶେଷରେ ପ୍ରମୋଦ ପଧାନ ତାଙ୍କ ସମର୍ଥକଙ୍କ ସହ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କଠାରେ ବିଜେଡିଦଳରେ ମିଶିଛନ୍ତି । ପ୍ରମୋଦଙ୍କ ଟିଟିଲାଗଡ ସହର,ଟିଟିଲାଗଡ ବ୍ଲକ,ସଇଁତଳା ବ୍ଲକ ଅଞ୍ଚଳର ଲୋକଙ୍କ ସହ ଭଲସଂମ୍ପର୍କ ରହିଛି । ଜଣେ ଯୁବସଂଗଠକ ଭାବରେ ଭଲ ଚେହେରା ମଧ୍ୟ ରହିଛି । ଠିକ ସେହିପରି ସିହିନୀ ସରପଞ୍ଚ ତଥା ପଶ୍ଚିମଓଡିଶା ସରପଞ୍ଚସଂଘର ସଭାପତି ଥିବା ବୀରବର ସାହୁ ତାଙ୍କର ପ୍ରାୟ ୧୭ଜଣ ସରପଞ୍ଚ ଓ ସମିତିସଭ୍ୟଙ୍କୁ ନେଇ ବିଜେପିରେ ମିଶିଛନ୍ତି । ମନ୍ତ୍ରୀ ଟୁକୁନୀ ସାହୁ ୨୦୧୪ ମସିହାରେ ବିଧାୟିକା ହେଲାବେଳେ ଯିଏ ତାଙ୍କର ଅଫିସକଥା ବୁଝୁଥିଲେ ପଞ୍ଚାନନ ସାହୁ ମଧ୍ୟ ଇତିମଧ୍ୟରେ ଦଳଛାଡି ବିଜେପିରେ ଯୋଗଦେଇଛନ୍ତି । କେବଳ ସେତିକି ନୁହେଁ ଟିଟିଲାଗଡ ସହରର ଜଣେ ଆଗଧାଡିର ନାରୀନେତ୍ରୀ ରଂଞ୍ଜୁ ରାଇମନ ମଧ୍ୟ ଟୁକୁନୀ ସାହୁଙ୍କ ପ୍ରତି ବିମୁଖ ହୋଇ ବିଜେଡିଦଳ ଛାଡି ବିଜେପିରେ ଯୋଗଦେଇଛନ୍ତି । ଏମାନେ ଟିଟିଲାଗଡ ନିର୍ବାଚନମଣ୍ଡଳିରେ ବହୁତ ପରିମାଣରେ ଭୋଟରଙ୍କୁ ପ୍ରଭାବିତ କରିବାର କ୍ଷମତା ରଖିଛନ୍ତି । ମୁଖ୍ୟତଃ ମନ୍ତ୍ରୀ ଟୁକୁନୀ ସାହୁଙ୍କ ଆଚାର ବ୍ୟବହାରରେ ପରିବର୍ତ୍ତନ କାରଣରୁ ଅନେକ ନେତା ବିଜେଡିଦଳ ପ୍ରତି ବିମୁଖ ରହୁଛନ୍ତି । ଯାହାର ପରିଣାମ ଆଜି ବିଜେଡିଦଳରୁ ହଜାର ହଜାର ସଂଖ୍ୟାରେ ନେତା ଓ କର୍ମି ଦଳଛାଡି ଚାଲିଯାଉଥିବା ପ୍ରମୋଦ କହିଛନ୍ତି । ବିଜେଡିଦଳର ନେତା ଓ କର୍ମିଙ୍କ ସାମୁହିକ ସଫଳତାକୁ ଟୁକୁନି ସାହୁ ନିଜର ସଫଳତା ଭାବିବା ଓ ବିଫଳତାକୁ ନିଜ ମୁଣ୍ଡରୁ ଦୋଷଛଡାଇ ଅନ୍ୟଉପରେ ଲଦାଯାଉଥିବା ପ୍ରମୋଦ କହିଛନ୍ତି । ବିଜେଡିରେ ମନ୍ତ୍ରୀ ଟୁକୁନୀ ନେତାଙ୍କୁ ଅଣଦେଖା କରୁଥିବା କାରଣରୁ ବିଜେଡିର ପରାଜୟ ସୁନିଶ୍ଚିତ । ଶନିବାର ଦିନ ଟିଟିଲାଗଡରେ ହୋଇଥିବା  ଏକ ବିଶାଳ ଶୋଭାଯାତ୍ରା,ମିଶ୍ରଣପର୍ବରେ ୧୦ହଜାରରୁ ଅଧିକଲୋକଙ୍କ ସମାଗମ ପରିବର୍ତ୍ତନକୁ ସୁଚାଉଛି ଓ ବିଜେପିଦଳର ଆଗାମୀ ଭବିଷ୍ୟତ ବର୍ଣ୍ଣନା କରୁଛି ବୋଲି ପ୍ରମୋଦ ପଧାନ କହିଛନ୍ତି । ସେପଟେ ବିଜେପିର ପୂର୍ବରୁ ହୋଇଥିବା ପ୍ରାର୍ଥି ମହେନ୍ଦ୍ର ଠାକୁର,ଅଶୋକ ଦୋରା,ପୌରାଧ୍ୟକ୍ଷା ମମତାଦେବୀ ଜୈନ ପ୍ରମୁଖ ଏକଜୁଟ ହୋଇଛନ୍ତି । ଫଳରେ ଟିଟିଲାଗଡରେ ବିଜେପିର ସ୍ଥିତି ମଜବୁତ ହେଉଥିବା ଲକ୍ଷ୍ୟ କରାଯାଇଛି ।  ଉକ୍ତଦିନ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବଲାଙ୍ଗୀର ସାଂସଦପ୍ରାର୍ଥି ସଂଗୀତାକୁମାରୀ ସିଂଦେଓ,ଟିଟିଲାଗଡ ବିଧାୟକପ୍ରାର୍ଥି ନବୀନ ଜୈନ ମଧ୍ୟ ପ୍ରମୋଦ ଓ ବୀରବରଙ୍କ ଟିମଙ୍କୁ ପ୍ରଶଂସା କରି ଆଗକୁ ବିଜେପିଦଳ ମଜବୁତ ହେବ ବୋଲି କହିଥିଲେ ।