04-May-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ ) ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରାର୍ଥୀ ହୋଇଥିବା ଦାଦନଗଡ କଣ୍ଟାବାଞ୍ଜି ଅଞ୍ଚଳରୁ ଚାଲାଣ ହୋଇଥିବା ଜଣେ ଦାଦନଶ୍ରମିକ ଆନ୍ଧ୍ରରେ ନିଖୋଜ୍ ହେଲାପରେ ତା'ର ବିଧବାବୃଦ୍ଧା ମାଆ ଆତ୍ମହତ୍ୟା ଉଦ୍ୟମ କରିଥିବା ଘଟଣା ଅଞ୍ଚଳରେ ଚର୍ଚ୍ଚିତ ହୋଇପଡିଥିବା ବେଳେ ନିର୍ବାଚନୀ ମାହୌଲ୍ ସତ୍ତ୍ୱେ କୌଣସି ରାଜନୈତିକ ଦଳ ପକ୍ଷରୁ ଅଦ୍ୟାବଧି ଏହାକୁ ଇସୁ ବା ପ୍ରସଙ୍ଗ କରାଯାଇ ନଥିବାରୁ ଲୋକେ ଆଶ୍ଚର୍ଯ୍ୟ ପ୍ରକାଶ କରିଛନ୍ତି ।

ଗୃହବିଭାଗ ହାତରେ ରଖିଥିବା ଖୋଦ୍ ମୁଖ୍ୟମନ୍ତ୍ରୀଙ୍କ ନେତୃତ୍ବାଧୀନ ଶାସକ ବିଜେଡି ପକ୍ଷରୁ ଉକ୍ତ ଯୁବକର ନିଖୋଜ୍ ଓ  ଥାନାରେ ପହଞ୍ଚିଥିବା ମାଆର ଏତଲାର  ତଦନ୍ତର ପରିଣତି ସମ୍ପର୍କରେ ନୀରବତା ଅବଲମ୍ବନ କରାଯାଇ ଆସୁଥିବା ବେଳେ , ଏହି ଆସନରେ ଭାଜପାରୁ ଜଣେ ଦାଦନସର୍ଦ୍ଦାର ନିଜେ ପ୍ରାର୍ଥୀ ହୋଇଥିବା ଏବଂ ବିଭିନ୍ନସମୟରେ ଆସି ଗିରଫ ହୋଇଥିବା ରାଜ୍ୟବାହାରର ଆନ୍ଧ୍ର ଦାଦନ ସେଠ୍ ଙ୍କୁ ମୁକୁଳାଇବାକୁ ଥାନାଘେରାଉ କରିଥିବା କଂଗ୍ରେସର ବିଧାୟକ , ନେତା ଓ ଏଥର ମଧ୍ୟ ପ୍ରାର୍ଥୀହୋଇଥିବା ବିରୋଧୀଦଳ ପକ୍ଷରୁ ଉପରୋକ୍ତ ମାମଲାର ତଦନ୍ତ ପାଇଁ ଦାବି କରା ନଯାଇ ତୁଣ୍ଡରେ ତୁଣ୍ଡିବାନ୍ଧି ରହିବାକୁ ଅଞ୍ଚଳର ଲୋକେ ତୀବ୍ର ସମାଲୋଚନା ପ୍ରକାଶ କରିଛନ୍ତି । ଏହି ସମ୍ବେଦନଶୀଳ ମାମଲାଟି ବିଭିନ୍ନ ଗଣମାଧ୍ୟମରେ ଘନ ଘନ ଖବର ପ୍ରକାଶ ପାଇବା ପରେ ବିଜେଡି , ବିଜେପି ଓ କଂଗ୍ରେସ  ତିନି ପ୍ରମୁଖଦଳର ସବୁଜାଣି ନୀରବ ରହିବାର କାରଣ ଜଣାପଡ଼ିନାହିଁ ।

ଘଟଣାରୁ ପ୍ରକାଶ ଯେ , ପ୍ରାୟ ଚାରିମାସତଳେ ମୁରିବାହାଲ ଥାନା ଅନ୍ତର୍ଗତ ବଡସାଇମରା ପଞ୍ଚାୟତର ସାନଝରବାହାଲି ଗ୍ରାମର ମୈତ୍ର ସେଠ୍ ( ୨୧ )କୁ ଅଣ୍ଡାଲଦରୋ ଗ୍ରାମର ପୂର୍ବରୁ ଏପରି ବେଆଇନ ଦାଦନଚାଲାଣ ମାମଲାରେ ଗିରଫ ହୋଇ ଜେଲ୍ ଯାଇଥିବା ସର୍ଦ୍ଦାର ସୁଶାନ୍ତ ପାତ୍ର ଦାଦନଶ୍ରମିକ ଭାବେ ଆନ୍ଧ୍ରପ୍ରଦେଶକୁ ଚାଲାଣ କରିଥିଲା ।  ସେଠାରେ ସେ ଇଟାଭାଟିରେ ମାଟିତାଡୁଥିବା ଜେସିବି ଡ୍ରାଇଭର ଭାବରେ କାମ କରୁଥିବା ଓ କୌଣସି ଘଟଣାରେ ନିଖୋଜ୍ ହୋଇଯାଇଥିବା ଅସମର୍ଥିତ ସୂତ୍ରରୁ ଖବରପାଇ ଘରେ ଥିବା ବିଧବାବୃଦ୍ଧା ମାଆ ପୁଅ ପାଇଁ ପାଗଳୀପ୍ରାୟ ହୋଇଯାଇଥିବା ଲୋକେ କହନ୍ତି । ତେଣୁ ସେ  କୋଶଳ ଆନ୍ଦୋଳନକାରୀ ଜଣେ ବିବଦମାନ ତଥାକଥିତ ନେତା ଓ କେତେକ ତଥାକଥିତ ସ୍ବେଚ୍ଛାସେବୀଙ୍କ ସହଯୋଗରେ ସ୍ଥାନୀୟ ମୁରିବାହାଲ ଥାନାକୁ ଯାଇ ହଜିଲା ପୁଅକୁ ଖୋଜି ଆଣିବାକୁ ସର୍ଦ୍ଦାର ବିରୁଦ୍ଧରେ ମାଆ ପଦ୍ମାବତୀ ସେଠ୍ ପକ୍ଷରୁ ଏକ ଏତଲା ଦିଆଯାଇଥିଲା । ପୁଲିସ୍ ଥାନକୁ ସର୍ଦ୍ଦାରକୁ ଡକାଇ ପଚରାଉଚୁରା କରିବାରୁ ସେ ଉକ୍ତ ଦାଦନଶ୍ରମିକକୁ ଫେରାଇ ଆଣିବା ପାଇଁ କିଛିଦିନ ମହଲତ ମାଗିଥିବା ପ୍ରକାଶ । ତେବେ ସର୍ଦ୍ଦାର ସେହି ସମୟସୀମା ଗଡାଇ ଧରାଛୁଆଁ ଦେଲାନାହିଁ ।  ସେହିପରି ସାହାଯ୍ୟକାରୀ କୋଜିନେତା ଓ ସ୍ବେଚ୍ଛାସେବୀମାନେ ସର୍ଦ୍ଦାରଠାରୁ ହାତ ଚିକ୍କଣ କରି ଚୁପ୍ ରହିଗଲେ । ଏହା ସେମାନଙ୍କର ପେଶାବୋଲି ଜଣାପଡିଲା । ତେଣୁ ସବୁଦିଗରୋ ନିରାଶ ହୋଇପଡି ତାର ବିଧବାବୃଦ୍ଧା ମାଆଟି ଗାଁ'ରୁ ପ୍ରାୟ ସତୁରୀକିମି ବାଟ ଚାଲି ଚାଲି ଯାଇ ବଲାଙ୍ଗୀର ଜିଲ୍ଲାପାଳଙ୍କ ଠାରେ ଗୁହାରି କଲେ ଓ ତତ୍କାଳୀନ ଜିଲ୍ଲାପାଳ ମଧ୍ୟ ସେଥିରେ କର୍ଣ୍ଣପାତ କଲେନାହିଁ । 

ଏହାପରେ ଗତ ୨୬ ତାରିଖରେ ଉକ୍ତ ବିଧବାବୃଦ୍ଧା ମାଆ ପଦ୍ମାବତୀ ସେଠ୍ ଅସୁସ୍ଥ ବଡପୁଅର ଚିକିତ୍ସା ପାଇଁ କଣ୍ଟାବାଞ୍ଜି ସରକାରୀ ଡାକ୍ତରଖାନାକୁ ଆସିଥିବା ବେଳେ ଅନ୍ୟମାନଙ୍କର ପୁଅକୁ ଦେଖି ସାନପୁଅର କଥା ମନେପଡିଗଲା । ଏହାପରେ ବୃଦ୍ଧା ଜଣକ କଣ୍ଟାବାଞ୍ଜି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ତିନିମହଲା ମେଡିସିନ୍ ଷ୍ଟୋରର ଛାତ ଉପରକୁ ଚଢିଯାଇ ଆତ୍ମହତ୍ୟା ଉଦ୍ୟମ କରିଥିବା ଓ ଦେଖିପାରି  ସସ୍ମିତା ଖୁରା ନାମ୍ନୀ ଜଣେ ମହିଳା ସିକ୍ୟୁରିଟି ଓ ଲୋକଙ୍କ ସହାୟତାରେ ତାଙ୍କୁ ଉଦ୍ଧାର କରିଥିଲେ । ପୁଲିସ୍ ମଧ୍ୟ ପହଞ୍ଚି ତଦନ୍ତ କରିଥିବା ପ୍ରକାଶ । ତେବେ ନିର୍ବାଚନ ମାହୌଲ୍ ଥିବା  ଏବଂ ଖୋଦ୍ ମୁଖ୍ୟମନ୍ତ୍ରୀ କଣ୍ଟାବାଞ୍ଜିରୁ ଦ୍ବୈତ ପ୍ରାର୍ଥୀ ହୋଇଥିବା ସତ୍ତ୍ୱେ ଅଦ୍ୟାବଧି ଏହାର କୌଣସି ତଦନ୍ତ ସୁଦ୍ଧା ଘ ନଥିବାରୁ ଜନଅସନ୍ତୋଷ ବୃଦ୍ଧି ପାଇଥିବା ଲକ୍ଷ୍ୟ କରାଯାଇଛି ।

ଜନସାଧାରଣଙ୍କ ଚର୍ଚ୍ଚା ଓ ଆଲୋଚନାରୁ ପ୍ରକାଶ ଯେ , ଦାଦନଗଡରୂପେ ଜଣାଶୁଣା ଏହି ଅଞ୍ଚଳରେ ସରକାର , ପ୍ରାର୍ଥୀ , ପ୍ରଶାସନ , ପୁଲିସ୍ ଓ ଲୋକପ୍ରତିନିଧିଙ୍କ ଠାରୁ ଆଉ କେବେ ଓ କେଉଁ ଘଟଣାରେ ଅଞ୍ଚଳବାସୀଙ୍କୁ କିଭଳି କି ନ୍ୟାୟ ମିଳିବ  ?