30-Apr-2024

ବଲାଙ୍ଗିର(ପ୍ରେରଣା ଖବର ): ବଲାଙ୍ଗୀର ସଦର ବିଧାନସଭା ଆସନରେ ଶାସକ ବିଜେଡିଦଳ ଓ କଂଗ୍ରେସ ମଧ୍ୟରେ ସିଧାସଳଖ ପ୍ରତିଦ୍ୱନ୍ଦିତା ହେଉଛି । ବଲାଙ୍ଗୀରର ପାରଂମ୍ପରିକ ପ୍ରତିଦ୍ୱନ୍ଦି ରାଜପରିବାର ଓ ମିଶ୍ର ପରିବାର ମଧ୍ୟରେ ଚଳିତ ନିର୍ବାଚନ ପୁଣିଥରେ ରୋଚକ ହେଉଛି । ଏହି ଆସନରେ କଂଗ୍ରେସଦଳରୁ ଭେଟେରାନ ଲିଡର ନରସିଂହ ମିଶ୍ର ଦୁଇଥର ନିର୍ବାଚନ ଜିଣିଛନ୍ତି । ଏହା ପୂର୍ବରୁ ୧୯୯୦ ମସିହାରୁ ୨୦୧୪ ମସିହା ପର୍ଯ୍ୟନ୍ତ ବିଜେଡିଦଳର ଭେଟେରାନ ଲିଡର ଅନଙ୍ଗଉଦୟ ସିଂଦେଓ ବିଧାୟକ ଥିଲେ । ତେବେ ଗତଦୁଇଥର ପରାଜିତ ହୋଇଥିବା ରାଜପରିବାର ଚଳିତଥର ଅନଙ୍ଗଙ୍କ ବଡପୁଅ ପୂର୍ବତନ ସାଂସଦ କଳିକେଶନାରାୟଣ ସିଂଦେଓଙ୍କୁ ବିଜେଡିରୁ ପ୍ରାର୍ଥି କରାଇଛି । ସେପଟେ କଂଗ୍ରେସରୁ ନରସିଂହ ମିଶ୍ରଙ୍କ ସାନପୁଅ ତଥା ଗତ ୨୦୧୯ରେ ସାଂସଦପ୍ରାର୍ଥି ହୋଇ ହାତିଯାଇଥିବା ସମରେନ୍ଦ୍ର ମିଶ୍ର ପ୍ରାର୍ଥି ହୋଇଛନ୍ତି । ଉଭୟ ଦଳ ଓ ପରିବାର ଭୋଟରଙ୍କୁ ଆକର୍ଷିତ କରିବାକୁ ବିଭିନ୍ନ ପ୍ରକାର କାର୍ଯ୍ୟକ୍ରମ ଚଳାଇଛନ୍ତି । ଇତି ମଧ୍ୟରେ କଳିକେଶଙ୍କ ପାଇଁ ତାଙ୍କ ଧର୍ମପତ୍ନୀ ମେଘନା ରାଣା ସିଂଦେଓ ପ୍ରଚାର ମଇଦାନକୁ ଓହ୍ଲାଇଛନ୍ତି । ବଲାଙ୍ଗୀର ସହରର ବିଭିନ୍ନ ପଡାମାନଙ୍କୁ ବୁଲି ସ୍ୱାମୀ କଳିକେଶଙ୍କ ପାଇଁ ଭୋଟଭିକ୍ଷା କରୁଛନ୍ତି । ମେଘନା ହେଉଛନ୍ତି ନେପାଳର ରାଜକୁମାରୀ । ସେ କଳିକେଶଙ୍କୁ ବିବାହ କରି ବଲାଙ୍ଗୀର ଚୌହାନ ରାଜବଂଶର ବୋହୁ ହୋଇଛନ୍ତି । ଜଣେ ଉଚ୍ଚଶିକ୍ଷିତା ମହିଳା ହୋଇଥିବା ବେଳେ ତାଙ୍କର ବ୍ୟବହାର ସମସ୍ତଙ୍କୁ ଆକୃଷ୍ଟ କରୁଛି । ପୌରାଧ୍ୟକ୍ଷା ଲିକା ସାହୁଙ୍କ ସହ ମିଶି ମହିଳା ଟିମକୁ ନେଇ ଲୋକଙ୍କ ପାଖକୁ ପହଞ୍ଚୁଛନ୍ତି । ରାଜବଧୁଙ୍କୁ ପାଇ ମହିଳାମାନେ ଉତ୍ସାହିତ ହେଉଛନ୍ତି ।  ବଲାଙ୍ଗୀର ବିଜେଡି ଦଳରେ ମହିଳା ଟିମ ଖୁବ ସକ୍ରିୟ ରହିଛନ୍ତି । ପୂର୍ବରୁ ବଲାଙ୍ଗୀର ଜିଲ୍ଲାପରିଷଦର ଅଧ୍ୟକ୍ଷା ଦେବକୀ ସାହୁ,ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ,ଜିଲ୍ଲା ମହିଳା ବିଜେଡିର ସଭାନେତ୍ରୀ ତଥା ପୂର୍ବତନ ପୌରାଧ୍ୟକ୍ଷା ଦମୟନ୍ତି ବାଗ,ପୂର୍ବତନ ପୌରାଧ୍ୟକ୍ଷା ସନ୍ତୋଷିନୀ ବେହେରା,ଉପାଧ୍ୟକ୍ଷା ଲିପିଶ୍ରୀ ସାଏ,ରାଜ୍ୟସଂପାଦିକା ସାଗରିକା ଗୁରୁ,କାଉନସିଲର ସରିତା ଦାସ ଓ ଅନ୍ୟାନ୍ୟ ମହିଳା କାଉନସିଲର ପ୍ରଚାର ମଇଦାନରେ ରହିଛନ୍ତି । ଘରକୁ ଘର ବୁଲି ନବୀନ ସରକାର ଅମଳରେ ହୋଇଥିବା ବିଭିନ୍ନ ଜନହିତକାରୀ ଯୋଜନା ବିଷୟରେ କହୁଛନ୍ତି । ବଲାଙ୍ଗୀର ନିର୍ବାଚନମଣ୍ଡଳିରେ ହୋଇଥିବା ବିକାଶକାମ ବିଷୟରେ ଲୋକଙ୍କୁ ସଚେତନ କରୁଛନ୍ତି । ମୁଖ୍ୟତଃ ମହିଳା ଭୋଟରଙ୍କୁ ଆକର୍ଷିତ କରିବାକୁ ବିଜେଡି ପୁରାଦମରେ ପ୍ରଚାର ଅଭିଯାନକୁ ଯୋରଦାର କରିଛି । ବଲାଙ୍ଗୀର ନିର୍ବାଚନମଣ୍ଡଳିରେ ମୋଟ-୨,୩୮,୮୪୨ ଭୋଟର ରହିଥିବା ବେଳେ ସେଥିରୁ ମହିଳା-୧,୧୭,୮୭୩ ଜଣ ମହିଳା ଭୋଟର ରହିଛନ୍ତି । ସେଥିରୁ ପ୍ରାୟ ୭୫% ଭୋଟ ପଡିଲେ ପ୍ରାୟ ୮୦ହଜାର ଭୋଟ ମହିଳାଙ୍କର ପୋଲିଂ ହେବାକୁ ଯାଉଛି । ସେହି କାରଣରୁ ରାଜନୈତିକଦଳମାନଙ୍କ ପକ୍ଷରୁ ମହିଳା ଭୋଟରଙ୍କୁ ଟାର୍ଗେଟ କରି କାର୍ଯ୍ୟକ୍ରମମାନ କରାଯାଉଛି । ବିଭିନ୍ନ ସମୟରେ ମହିଳା ସମାବେଶ ମଧ୍ୟ କରାଯାଉଛି । ତେବେ ମେଘନାଙ୍କ ଡୋର ଟୁ ଡୋର କ୍ୟାମ୍ପେନ ଲୋକଙ୍କୁ ପ୍ରଭାବିତ କରୁଥିବା ଲକ୍ଷ୍ୟ କରାଯାଉଛି ।