19-Oct-2023

ଇଞ୍ଜିନିୟର ସ୍ବର୍ଗତଃ ପୂର୍ଣ୍ଣ ଚନ୍ଦ୍ର ରଥ ଜଣେ ପୂର୍ଣ୍ଣାଙ୍ଗ ବ୍ୟକ୍ତିତ୍ୱର ଅଧିକାରୀ ଥିଲେ।ତାଙ୍କର ମହତ ଜୀବନ ଏବଂ ଉତ୍ତମ ଆଦର୍ଶ ଯୁଗ ଯୁଗ ପାଇଁ ଆମର ଭବିଷ୍ୟତ ପୀଢ଼ି କୁ ପ୍ରେରଣା ଓ ପ୍ରୋତ୍ସାହନ ଯୋଗାଇ ଚାଲିଥିବ ।ଏକାଧାରରେ ସେ ଜଣେ ସରଳ, ନିଷ୍ଠାପର,ସଚ୍ଚୋଟ, କର୍ମଠ, କର୍ତ୍ତବ୍ୟନିଷ୍ଠ, ସତ୍ୟବାନ, ଦାଇତ୍ୱଶୀଳ, ଶୃଙ୍ଖଳିତ, ଧାର୍ମିକ, ପରୋପକାରୀ, ଦରଦୀ ଏବଂ ମିଷ୍ଟଭାସି ମଣିଷ ଥିଲେ। ନିଜକୁ ସେ ସୁସ୍ଥ,ସଂଯତ ଓ ସକ୍ଷମ ରଖି  ତାଙ୍କ ପରିବାରର ଉଚ୍ଚକୋଟିର ଲାଳନ ପାଳନ କରିବା ସାଙ୍ଗକୁ ସାହି,ପଡିଶା ଓ ସମାଜ ପ୍ରତି ତାଙ୍କର ଉତ୍ତରଦାଇତ୍ୱ କୁ ଖୁବ ନିଷ୍ଠାର ସହିତ ନିର୍ବାହ କରି ଆସିଥିଲେ। ବିପଦ, ଆପଦ ଓ ପ୍ରାକୃତିକ ଦୁର୍ବିପାକ ସମୟରେ ସେ ସଦାସର୍ବଦା ଦୁର୍ଦ୍ଦଶାଗ୍ରସ୍ତ ତାଙ୍କର ଗ୍ରାମବାସୀମାନଙ୍କ ପାଖରେ ଛିଡ଼ା ହେଉଥିଲେ ଓ ଯଥାସମ୍ଭବ ସେମାନଙ୍କୁ ସହାୟତା ପ୍ରଦାନ କରୁଥିଲେ l ସ୍ବର୍ଗତଃ ରଥ ୧୯୩୭ ମସିହା ଅପ୍ରେଲ ୨୫ ତାରିଖରେ କଟକ ଜିଲ୍ଲାର ଆଠଗଡ ତହସିଲ  ଅନ୍ତର୍ଗତ କଟକିଆ ସାହିର ପାଟେଣି ଗାଁ ରେ ଜନ୍ମ ଗ୍ରହଣ କରିଥିଲେ। ବାଳୁତ ଅବସ୍ଥାରେ ପିତାଙ୍କ ଅକାଳ ବିୟୋଗ ଯୋଗୁଁ ସେ  ନାନା ପ୍ରକାର ପ୍ରତିବନ୍ଧକ ର ସାମ୍ନା କରିଥିଲେ। କିନ୍ତୁ ନିଜର ଏକନିଷ୍ଠ ଅଧ୍ୟବସାୟ , ଦୁଇବଡ଼ ଭାଈ ଓ କକାଙ୍କର ସହାୟତା ଫଳରେ ସେ ତାଙ୍କର ପାଠ ପଢିବା ଚାଲୁ ରଖିଥିଲେ।୧୯୫୯ ମସିହାରେ ପୂର୍ଣ୍ଣଚନ୍ଦ୍ର ନିଜ ଗାଁର ପ୍ରଥମ ଛାତ୍ର ଭାବରେ ଉଭୟ ବିଜ୍ଞାନ ଓ ସିଭିଲ ଇଂଜିନିୟରିଂ ରେ ସ୍ନାତକ ଡିଗ୍ରୀ ହାସଲ କରିଥିଲେ।  ସେ ଜଣେ କୁଶଳୀ  ଯନ୍ତ୍ରୀ ଭାବରେ ଓଡ଼ିଶା ସରକାରଙ୍କର ବିଭିନ୍ନ ବିଭାଗରେ କାର୍ଯ୍ୟ କରି  ବହୁଭାବେ ପ୍ରଶଂସା ଭାଜନ ହୋଇଥିଲେ।୧୯୬୫ ମସିହାରେ ସେ ବିଶିଷ୍ଟ ନାରୀ ନେତ୍ରୀ ଏବଂ ଯଶସ୍ୱୀ ସମାଜସେବୀ  ଦୟାମୟୀ ରଥ ଙ୍କୁ ଵିଵାହ କରିଥିଲେ। ଦୟାମୟୀ କେବଳ ତାଙ୍କର ଜୀବନ ସାଥି ଥିଲେ ତାହା ନୁହେଁ, ସେ  ଆଠଗଡ ଇଲାକା ପାଇଁ ତାଙ୍କ ସହିତ ମିଶି ଆଲୋକ ବର୍ତ୍ତିକାର ସ୍ୱରୂପ ସାଜିଥିଲେ।                              ସିଭିଲ ଇଂଜିନିୟରିଂ ଜ୍ଞାନ ଓ ପ୍ରଯୁକ୍ତିବିଦ୍ୟା କୁ ଓଡ଼ିଶାର ଘରେ ଘରେ ପଂହୁଞ୍ଚାଇବା  ପୂର୍ଣ୍ଣ ଚନ୍ଦ୍ର ଙ୍କର ପରମ ଲକ୍ଷ୍ୟ ଥିଲା। ତାଙ୍କ ଦ୍ୱାରା ରଚିତ "ବାସକଳା" ପୁସ୍ତକ ସାଧାରଣ ଓଡ଼ିଆଙ୍କ ପାଇଁ ସ୍ବଗୃହ ନିର୍ମାଣ ରେ ବୈଷୟିକ ଜ୍ଞାନ କୌଶଳ କୁ ବ୍ୟବହାର କରାଯିବା ଦିଗରେ ଏକ ପକ୍କା ମାର୍ଗ ଦର୍ଶକ ଭାବରେ  ପ୍ରସିଦ୍ଧି ହାସଲ କରିଛି। ବୋଧଗମ୍ୟ ଓଡ଼ିଆ ଭାଷାରେ  ଲିଖିତ ଏହି କାଳଜୟୀ ପୁସ୍ତକ ଯୁଗାନ୍ତକାରୀ ଆଖ୍ୟା ଅର୍ଜ୍ଜନ କରିଛି । ସ୍ବର୍ଗତଃ ପୂର୍ଣ୍ଣଚନ୍ଦ୍ର ରଥ ଙ୍କର ପାଣ୍ଡିତ୍ୟ କେବଳ ଇଂଜିନୀୟରିଂ ବିଦ୍ୟା ମଧ୍ୟରେ ସୀମିତ ନ ଥିଲା। ଓଡ଼ିଶାର ଇତିହାସ, ଭାରତୀୟ ସଂସ୍କୃତି ଏଵଂ ଐତିହ୍ୟ ତଥା ବିଶ୍ଵସ୍ତରୀୟ ସୃଜନଶୀଳ କଳା ଉପରେ ମଧ୍ୟ୍ୟ ସେ ବେଶ ଅନୁସନ୍ଧାନ ଓ ଅନୁଶୀଳନ କରିଥିଲେ। ଜଣେ ପ୍ରଖ୍ୟାତ ଲେଖକ ହେବା ସାଙ୍ଗକୁ ସେ ଜଣେ ସୁଦକ୍ଷ ଚିତ୍ରଶିଳ୍ପୀ ମଧ୍ୟ ଥିଲେ। ପ୍ରକୃତରେ  ନିଜର ନାମର ଯଥାର୍ଥତା କୁ ପ୍ରମାଣ କରି ପୂର୍ଣ୍ଣ ଚନ୍ଦ୍ର ଗୁଣ, ଜ୍ଞାନ ଓ ଗାରିମା ରେ ପୂର୍ଣ୍ତତା  ଅର୍ଜ୍ଜନ କରିଥିଲେ I ୨୦୨୦ ମସିହା  ଅକ୍ଟୋବର  ୧୫ ତାରିଖରେ ୮୪ବର୍ଷ ବୟସରେ ଇଂ. ପୂର୍ଣ୍ଣଚନ୍ଦ୍ର ରଥ ଇହଲୀଳା ସମ୍ବରଣ କରିଛନ୍ତି। ସୁଖର କଥା ଯେ ସମାଜ ପ୍ରତି ସ୍ବର୍ଗତଃ ପୂର୍ଣ୍ଣଚନ୍ଦ୍ର ରଥଙ୍କର ଅମୂଲ୍ୟ ଓ ଅତୁଳନୀୟ ଯୋଗଦାନ ତଥା ସେ ଛାଡ଼ିଥିବା ସ୍ବର୍ଣ୍ଣାଭ ପରମ୍ପରା କୁ ତାଙ୍କର ସୁଯୋଗ୍ୟ ଦାୟାଦ ଜ୍ୟେଷ୍ଠ ପୁତ୍ର ପ୍ରସିଦ୍ଧ ଶିକ୍ଷାବିତ ଡ଼ଃ.ପ୍ରଭାତ କୁମାର ରଥ, ଆବୁଧାବୀ ରେ ଅବସ୍ଥାପିତ କନିଷ୍ଠ ପୁତ୍ର ସୁନାମଧନ୍ୟ ଯନ୍ତ୍ରୀ ପ୍ରଦୀପ କୁମାର ରଥ, ସୁପୁତ୍ରୀ ଡ଼ଃ.ପଦ୍ମାଲୟା ରଥ ,ପୁତ୍ରବଧୁ ପ୍ରିୟମ୍ବଦା ରଥ, ବହ୍ନିପ୍ରଭା ରଥ ଓ  ଜ୍ୱାଇଁ  ଡ଼ଃ ଶିବ ନାରାୟଣ ପ୍ରମୁଖ ସକ୍ରୀୟ ଭାବେ ବଜାୟ ରଖିଛନ୍ତି।ସ୍ବର୍ଗତଃ ପୂର୍ଣ୍ଣ ଚନ୍ଦ୍ର ରଥଙ୍କର ଜୀବ ଶରୀର ଆଜି ଆମ ନିକଟରେ ନାହିଁ, କିନ୍ତୁ ତାଙ୍କର ଜୀବନ୍ତ ସ୍ମୃତି ଆମ ମାନସ ପଟରେ ସଦାସର୍ବଦା ଅବିସ୍ମରଣୀୟ ହୋଇ ରହିଛି ଏବଂ ରହିଥିବ।