25-Jun-2023

ବଲାଙ୍ଗିର(ଦେବାଶିଷ ବହିଦାର) ଆଜି ଅପରାହ୍ନ ରେ ବଲାଙ୍ଗିର - ସମ୍ବଲପୁର ରାସ୍ତା ଏନ୍‌.ଏଚ୍ ୨୬ ଛତାମଖନା ଛକ ଠାରେ ବଲାଙ୍ଗିର ବିଧାୟକ ନରସିଂହ ମିଶ୍ରଙ୍କ କର କମଳରେ ଶ୍ରୀ ମିଶ୍ରଙ୍କ ଦ୍ୱାରା ପ୍ରସ୍ତାବିତ ସଦର ବ୍ଲକ ଚନ୍ଦନଭାଟି ଭାୟା କଅଁଗାଁ , ମିର୍ଦ୍ଧାପାଲି ରୁ ଛତାମଖନା ଛକ ଜାତୀୟ ରାଜପଥ ପର‌୍ୟ୍ୟନ୍ତ ରାସ୍ତାର ଭିତ୍ତିପ୍ରସ୍ତର ସ୍ଥାପନ କାର‌୍ୟ୍ୟକ୍ରମ ମହାଆଡମ୍ବରରେ ହୋଇଯାଇଛି । ଏହା ପରେ ବିଭିନ୍ନ ପଂଚାୟତରୁ ଆସିଥିବା ଲୋକ ସହ ଭାବ ଆଦାନ ପ୍ରଦାନ ପାଇଁ ଏକ ବିରାଟ ସଭାର ଆୟୋଜନ କରାଯାଇଥିଲା । ଶ୍ରୀ ମିଶ୍ର ନିଜ ବକ୍ତବ୍ୟରେ କହିଲେ ପୂର୍ବରୁ ଥିବା ସଂକୀଣ୍ଣ ରାସ୍ତା ର ପ୍ରଶସ୍ତିକରଣ ହେବା ଦ୍ୱାରା ଗମନାଗମନର ବିକାଶ ସହ ରାସ୍ତା ପାଶ୍ୱର୍ ବିଭିନ୍ନ ଗ୍ରାମାଞ୍ଚଳର ଅର୍ଥନୈତିକ ତଥା ସାମାଜିକ ଏବଂ ଶିକ୍ଷାକ୍ଷେତ୍ରରେ ବିକାଶ ଦିଗରେ ସହାୟକ ହେବ, ସମୁଦାୟ ୪ କିମି ରାସ୍ତା ନିର୍ମାଣ ପାଇଁ ୨କୋଟି ୮୨ ଲକ୍ଷ ଟଙ୍କା ଖର୍ଚ୍ଚ ହେବ ଏବଂ ଆସନ୍ତା ନଭେମ୍ବର ମାସ ସୁଦ୍ଧା କାର‌୍ୟ୍ୟ ସମ୍ପନ୍ନ ହେବ । ଲୋକଙ୍କ ଦାବି ମୁତାବକ ବିଧାୟକ ଶ୍ରୀ ମିଶ୍ରଙ୍କ ଉଦ୍ୟମ କ୍ରମେ ପଶ୍ଚିମ ଓଡିଶା ବିକାଶ ପରିଷଦ ପକ୍ଷରୁ ଶିକ୍ଷା କ୍ଷେତ୍ରରେ ଉନ୍ନତି ପାଇଁ ଛତାମଖନା ମହାବିଦ୍ୟାଳୟକୁ ୫୦ଲକ୍ଷ ଟଙ୍କା ଓ ସ୍ଥାନୀୟ ପୋଖରୀ ର ଉନ୍ନତି ପାଇଁ ୫୦ଲକ୍ଷ ଟଙ୍କା ମଞ୍ଜୁରି ପାଇ ଥିବାରୁ ଅଂଚଳବାସୀ ତରଫରୁ ଶ୍ରୀ ମିଶ୍ରଙ୍କୁ କୃତଜ୍ଞତା ଜ୍ଞାପନ କରାଯାଇଥିଲା । ଶ୍ରୀ ମିଶ୍ର ଆହୁରି ମଧ୍ୟ କହିଥିଲେ ଖୁବ୍ ଶିଘ୍ର ସୁକତେଲ ନଦୀରେ ୧୫୮ କୋଟି ଟଙ୍କାରେ ନିର୍ମାଣଧିନ ବ୍ୟାରେଜ କାମ ସମ୍ପୁର୍ଣ୍ଣ ହେଲା ପରେ ଅଂଚଳର ଭୂତଳ ଜଳ ବୃଦ୍ଧି ପାଇବ ଓ ନଦୀ ର ଉଭୟକୂଳରେ ଥିବା ଗାଁମାନଙ୍କ ଚାଷିମାନେ ଲାଭବାନ ହେବେ । ଆଜିର ଏହି କାର‌୍ୟ୍ୟକ୍ରମକୁ ଯୁବନେତା ଶୁଭ୍ରାଂଶୁ ଶେଖର ପଣ୍ଡା ସଂଯୋଜନା କରିଥିବା ବେଳେ ଗ୍ରାମ୍ୟ ଉନ୍ନୟନ ବିଭାଗର ନିର୍ବାହୀ ଯନ୍ତ୍ରୀ ନିର୍ମାଳ ଚନ୍ଦ୍ର ଜେନା ଏବଂ ଉପ-ବିଭାଗୀୟ ଯନ୍ତ୍ରୀ ବୁଦ୍ଧେଶ୍ୱର ମହାପାତ୍ର ପ୍ରମୁଖ ଉପସ୍ଥିତ ଥିଲେ । ଏହି କାର‌୍ୟ୍ୟକ୍ରମରେ ଛତାମଖନା, ମିର୍ଦ୍ଧାପାଲି, ସକମା ସହ ଅନ୍ୟାନ୍ୟ ପଂଚାୟତରୁ ବହୁ ବର୍ତ୍ତମାନ ତଥା ପୂର୍ବତନ ସରପଞ୍ଚ ଏବଂ ସମିତି ସଭ୍ୟ ସହ ଶତାଧିକ ମହିଳା ଏବଂ ପୁରୁଷ ଯୋଗ ଦେଇଥିଲେ ।