22-May-2023

ବିନିକା(ହିମାଂଶୁ ଶେଖର ପୁଟେଲ): ଜୀବନକାଳ ସାକ୍ଷୀ ରଖି ବାହା ହୋଇଥିବା ନିଜର ଧର୍ମପତ୍ନୀକୁ ଲୁହା ରଡରେ ପିଟି ମାରି ଦେବା ଘଟଣାରେ ଅଭିଯୁକ୍ତ ସ୍ବାମୀ ଓ ତାର ସହଯୋଗୀକୁ ପୋଲିସ ଗିରଫ କରି ଆଜି କୋର୍ଟଚାଲାଣ କରାଯାଇଥିବା ସାମ୍ବାଦିକ ସମ୍ମିଳନୀରେ ସୁବର୍ଣ୍ଣପୁର ଜିଲ୍ଲା ପୋଲିସ ଆରକ୍ଷୀ ଅଧିକ୍ଷକ ଅମରେଶ ପଣ୍ଡା ସୂଚନା ଦେଇଛନ୍ତି । ବିନିକା ଥାନାରେ ସୋମବାର ଆୟୋଯିତ ସାମ୍ବାଦିକ ସମ୍ମିଳନୀରେ ଏସପି ଶ୍ରୀ ପଣ୍ଡା ଘଟଣାର ସମ୍ପୁର୍ଣ୍ଣ ବିବରଣୀ ଉପରେ ଉପସ୍ଥିତ ସମ୍ବାଦଦାତା ମାନଙ୍କୁ ସୂଚନା ପ୍ରଦାନ କରିଥିଲେ । ଏହି ଅବସରରେ ସୋନପୁର ଏସଡିପିଓ ପୁଷ୍ପାଞ୍ଜଳି ମିଙ୍ଗ, ବିନିକା ଥାନା ଅଧିକାରୀ ପବିତ୍ର ସାହୁ ଉପସ୍ଥିତ ଥିଲେ । ପ୍ରକାଶ ଥାଉକି, ବିନିକା ଥାନା ଅଧୀନସ୍ଥ ଅଡାକସା ଗ୍ରାମର ଦୁଃଖୀଶ୍ୟାମ ଭୁଏ(୩୧) ଦୀର୍ଘ ୪ବର୍ଷ ତଳେ ବୌଦ୍ଧ ଜିଲ୍ଲା ମନମୁଣ୍ଡା ଥାନା କିରକିଚିପାଲି ଗ୍ରାମର ସନ୍ତୋଷିନୀ ମଲ୍ଲିକ(୨୪) ଓରଫ କିଶୋରୀଙ୍କୁ ବିବାହ କରିଥିଲେ ।ତାଙ୍କ ବୈବାହିକ ଜୀବନ ବେଶ ହସଖୁସିରେ ବିତୁଥିଲା । ପରିବାର ପରିପୋଷଣ ପାଇଁ ଦୁଃଖୀଶ୍ୟାମ ଛୋଟିଆ ଢାବା ଖୋଲି କୁକୁଡ଼ା ମାଂସ ବିକ୍ରୀ କରୁଥିଲା । ଗତ ୧୭ତାରିଖ ବିଳମ୍ବିତ ରାତିରେ କୌଣସି କାରଣରୁ ତା ନିଜ ଧର୍ମପତ୍ନୀ କିଶୋରୀକୁ ଲୁହା ରଡରେ ପିଟି ପିଟି ମାରି ଦେଇଥିଲା ।ଦୋକାନରେ ଶ୍ରମିକ ଭାବେ କାମ କରୁଥିବା ପ୍ରଫୁଲ୍ଲ ମେଲ୍ଲି ହତ୍ୟାକାଣ୍ଡ ଘଟଣାରେ ସହଯୋଗ କରିଥିଲା ।କିଶୋରୀ ମରିଯିବା ପରେ ପ୍ରଥମେ ମାଟି ଗାତ ଖୋଳି ତୋପିଦେବା ଓ ପରେ ପରିବାର ଲୋକଙ୍କୁ ନଜଣାଇ ନିଆଁରେ ପୋଡ଼ି ଦେଇଥିଲା ।ଘଟଣା ଜଣାପଡ଼ିବା ପରେ ସାରା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଥିଲା ।ଗ୍ରାମବାସୀ ଏକତ୍ରିତ ହୋଇ ଗତ ୨୦ତାରିଖରେ ବିନିକା ଥାନାକୁ ଆସି ଘଟଣାର ତଦନ୍ତ ଓ ଦୋଷୀ ସ୍ବାମୀ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବିପତ୍ର ପ୍ରଦାନ କରିଥିଲେ । ପୋଲିସ ଝିଅ ପରିବାର ଘରକୁ ଯାଇ  ଝିଅର ବାପା ମାଙ୍କୁ ପଚାରି ବୁଝିଥିଲା ।ଝିଅର ଭାଇ ହିମାଂଶୁ ମଲ୍ଲିକ ଭଉଣୀକୁ ମାରି ଦେଇଥିବା ନେଇ ବିନିକା ଥାନାରେ ଲିଖିତ ଅଭିଯୋଗ କରିବା ପରେ ଥାନା କେଶ ନଂ ୧୧୪/୨୦୨୩,୪୯୮-ଏ/୩୦୨/୨୦୧ ଆଇପିସି ଧାରାରେ ମକଦ୍ଦମା ରୁଜୁ କରି ତଦନ୍ତ ଆରମ୍ଭ ହେଲା ଅଭିଯୁକ୍ତ ସ୍ୱାମୀକୁ ଥାନାରେ ଅଟକ ରଖି ପଚରାଉଚରା କରାଗଲା।ସାଇଣ୍ଟିଫିକ ଟିମ ଓ ପୋଲିସ ଅଭିଯୁକ୍ତ ସ୍ଵାମୀଙ୍କ ବାପାଙ୍କୁ ଧରି ଘଟଣାସ୍ଥଳରେ ପହଞ୍ଚି ଛାନଭିନ କରିଥିଲା ପରେ ହତ୍ୟାରେ ସଂଶ୍ଳିଷ୍ଟ ଅନ୍ୟ ସହଯୋଗୀ ଦୋକାନର ଶ୍ରମିକ ପ୍ରଫୁଲ୍ଲ ମେଲ୍ଲିକୁ ମଧ୍ୟ ପୋଲିସ ଗିରଫ କରି ଥାନାକୁ ଆଣିଲା ।ଆଜି ଉଭୟ ଅଭିଯୁକ୍ତଙ୍କୁ ବିନିକା କୋଟକୁ ଚାଲାଣ କରାଯାଇଥିଲା ସେଠାରେ ବେଲ ନାମଞ୍ଜୁର ହେବାରୁ ଅଭିଯୁକ୍ତ ସ୍ବାମୀ ଓ ସହଯୋଗୀଙ୍କୁ ସୋନପୁର ଜେଲ ହାଜତକୁ ପଠାଇ ଦିଆଯାଇଥିବା ପୋଲିସ ତରଫରୁ ସୂଚନା ଦିଆଯାଇଛି ।