28-Mar-2023

ବଲାଙ୍ଗିର(ପ୍ରେରଣା ଖବର)- ବଲାଙ୍ଗିର ସମଲେଶ୍ୱରୀ ମନ୍ଦିରରେ ମଙ୍ଗଳବାର ଦିନ ଚୈତ୍ର ପର୍ବ ପାଳନ କରାଯାଇଅଛି । ସକାଳୁ ମନ୍ଦିରରେ ଭକ୍ତମାନେ ଗହଳି ଲାଗିଥିବା ବେଳେ ମନ୍ଦିର ପରିସରରେ ବଳି ପିଠରେ ମାନସିକଧାରୀମାନେ ପଶୁବଳି ଅର୍ପଣ କରିଥିବା ବେଳେ ସକାଳୁ ରୀତିନୀତି ଅନୁସାରେ ଗୁପ୍ତ ପୂଜା ଅନୁଷ୍ଠିତ ହେବା ପରେ ମହା ଆଳତି ହୋଇଥିଲା । ଆମ୍ବ ବଉଳ, ଚାର, ଫଲସାଫୁଲ ସଜ୍ଜିତ ହୋଇ ଛେରା ପହରା ବାହାରିଥିଲା । ଘଣ୍ଟ, ଶଙ୍ଖ ବାଦ୍ୟରେ ଏହାକୁ ପାଛୋଟି ନିଆଯାଇଥିଲା । ଏହାକୁ କେବଳ ଉପବାସ କରୁଥିବା କଷ୍ଟାଧାରୀମାନେ ହିଁ ବୋହିଥିଲେ । ମନ୍ଦିରରୁ ବାହାରି ଡେର୍ଲିମାର୍କେଟ ରୋଡ ଦେଇ ରେଲୱେ ଷ୍ଟେସନ ରୋଡ, ମାଲପଡା ମେଟାକାନି ମନ୍ଦିର ଦେଇ ସୁଦପଡା ଓ ଗାନ୍ଧିନଗରପଡା ଏଭଳି ସହରର ୪ଟି ଦିଗରେ ପୂଜାର୍ଚ୍ଚନା କରାଯାଇଥିଲା । ମନ୍ଦିରକୁ ଫେରିବା ପରେ ସକଳ ବିଶ୍ୱ କଲ୍ୟାଣ ଶାନ୍ତି ପ୍ରତିଷ୍ଠା, ବଲାଙ୍ଗିର ରୁ ରୋଗ ବ୍ୟାଧି ଦୂର ସହ ସମସ୍ତଙ୍କ ସୁଖ ସମୃଦ୍ଧ ଜିବନ ପାଇଁ ଦେବୀ ମାଁ ସମଲେଇଙ୍କୁ ପ୍ରାର୍ଥନା କରାଯାଇଥିଲା । ଏହି ଚୈତ୍ର ପର୍ବ ପାଇଁ ମନ୍ଦିରରେ ଢେର ସମୟ ଧରି ଶ୍ରଦ୍ଧାଳୁଙ୍କ ଭିଡ ଲାଗି ରହିଥିଲା । ମନ୍ଦିରର ପୂଜକ ଅକ୍ଷୟ ଦିସ୍ରୀ ପୂଜା ଦାୟିତ୍ୱ ତୁଳାଇଥିଲେ ।