19-Dec-2022

ବିନିକା(ହିମାଂଶୁ ଶେଖର ପୁଟେଲ) ବିନିକା ଅଞ୍ଚଳର ଚାଷୀ ମାନଙ୍କ ଦାବୀ ଓ ଅନୁରୋଧକୁ ପ୍ରତ୍ୟାଖ୍ୟାନ କରି ଆଜି ବିନିକା ସହରାଞ୍ଚଳ ଭିତରେ ଦେଇ ଜବରଦସ୍ତ ଭାବରେ ୨୨୦କେଭି ଉଚ୍ଚ ଶକ୍ତି ସମ୍ପନ୍ନ ବିଦ୍ୟୁତ ଟାୱାର ନିର୍ମାଣ କାର୍ଯ୍ୟକୁ  ଅଞ୍ଚଳର ଶତାଧିକ ଚାଷୀମାନେ ହୋହାଲ୍ଲା କରି ବନ୍ଦ କରିଦେଇଛନ୍ତି ।ଫଳରେ କମ୍ପାନୀ କର୍ତୁପକ୍ଷ ଲୋକଙ୍କ  ଆଗରେ ମୁଣ୍ଡ ନୁଆଇଁ କାର୍ଯ୍ୟକୁ ଯେଣେ ତେଣେ ପ୍ରକାରରେ କରିବା ପାଇଁ ଉଦ୍ୟମ ଜାରି ରଖିଥିବା ବେଳେ ଅନ୍ୟ ପକ୍ଷରେ ଯଦି ସହରାଞ୍ଚଳରେ ଟାୱାର ନିର୍ମାଣ ହୋଇ ଲାଇନ ତାର ଟଣାଯାଏ ତେବେ ଆଗାମୀ ଦିନରେ ଜୋରଦାର ଆନ୍ଦୋଳନ କରାଯିବ ବୋଲି ଚେତାବନୀ ଦିଆଯାଇଛି ।ସୂଚନା ଯୋଗ୍ୟ ଯେ ଅତୀତରେ ସହର ଭିତରେ ଟାୱାର ନିର୍ମାଣ କୁ ବିରୋଧ କରି  ସ୍ଥାନୀୟ ଅତିରିକ୍ତ ତହସିଲଦାର,ଜିଲ୍ଲାପାଳଙ୍କ ଉଦ୍ଦେଶ୍ୟରେ ଦାବିପତ୍ର ଦିଆଯାଇଥିଲା ହେଲେ ପ୍ରଶାସନିକ ସ୍ତରରେ ଅଧ୍ୟାବଧି କୌଣସି ପଦକ୍ଷେପ ନିଆଯାଇନାହିଁ । ବରଂ ଓଲଟା ଆଜି ସଶସ୍ତ୍ର ପୋଲିସ ବାହିନୀ ଉପସ୍ଥିତିରେ କାହାକୁ ନ ପଚାରି  ଯେଉଁ ସୀମା ଦେଇ ବିଦ୍ୟୁତ ତାର ଯିବ ସେହି ସ୍ଥାନ ମାନଙ୍କରେ ଟାୱାର ନିର୍ମାଣ କାର୍ଯ୍ୟ କମ୍ପାନୀ ପକ୍ଷରୁ ଆରମ୍ଭ ହେବା ଜାଣି ଅଞ୍ଚଳର ଶତାଧିକ ଚାଷୀ ସେଠାକୁ ଯାଇ କମ୍ପାନୀ କର୍ତୁପକ୍ଷ ଙ୍କ ମେରି ରାୟ ନୀତିକୁ ପ୍ରତିବାଦ କରିବା ସହିତ ହୋହାଲ୍ଲା କରି ନିର୍ମାଣ କାର୍ଯ୍ୟ ବନ୍ଦ କରିଦେଇଥିଲେ ।ପ୍ରକାଶ ଥାଉକି ବିନିକା ଗୋଟିଏ ପଟେ ମହାନଦୀ ଥିବାବେଳେ ଅନ୍ୟପଟେ ସବୁଜ ବନାନୀ ରେ ଭରପୁର ଘଣ୍ଟାସିନି ପାହାଡ ରହିଥିବାରୁ ସେହି ପଟରେ ସହର ବସ୍ତି ବଡୁଛି ।  ଲାଇନ ତାର ଯାଉଥିବା ସ୍ଥାନ ମାନଙ୍କରେ ଅନେକ ସରକାରୀ,ବେସରକାରୀ ଏପରିକି ବିଭିନ୍ନ ଅନୁଷ୍ଠାନ ଗଢି ଉଠିଛି ।ତାହା ବର୍ତମାନ ସମ୍ପୂର୍ଣ କ୍ଷତିଗ୍ରସ୍ତ ହେବ ଏବଂ ୩ ଶହରୁ ୪ ଶହ ଲୋକ ପ୍ରଭାବିତ ହେବାର ଆଶଙ୍କା ରହିଛି ।ସେହିପରି ବିନିକା ସହର ଜନବହୁଳ ଯେଉଁ ପଟରେ କାୟା ବିସ୍ତାର କରିଛି ତାର ସୌନ୍ଦର୍ଯ୍ୟ ମଧ୍ୟ ସମ୍ପୂର୍ଣ୍ଣ ଲୁପ୍ତ ହୋଇଯିବ ଏଥିରେ ସନ୍ଦେହ ନାହିଁ।ପରେ ଏହି ଶୀର୍ଷ କାତର ପ୍ରସଙ୍ଗ ନେଇ ସନ୍ଧ୍ୟାରେ ସ୍ଥାନୀୟ ସ୍ପୋର୍ଟସ କ୍ଲବ ଠାରେ ମୁନତାଜ ପଣ୍ଡାଙ୍କ ଅଧ୍ୟକ୍ଷତାରେ ଅନୁଷ୍ଟିତ ସର୍ବଦଳୀୟ ବୈଠକରେ ଚାଷୀ,ସାମାଜିକ କର୍ମୀ,ବିଭିନ୍ନ ଦଳର ନେତା ଯୋଗଦେଇ ବିନିକା କୁ ବରବାଦ କରିବାର ଏହା ଏକ ଷଡ଼ଯନ୍ତ୍ ହୋଇପାରେ ତେଣୁ ସହର ସୌନ୍ଦର୍ଯ୍ୟକୁ କ୍ଷତି କରିବାକୁ ଏବଂ ବିନିକା ଅଞ୍ଚଳର ସ୍ୱାର୍ଥକୁ ଜଳାଞ୍ଜଳି ଦେବାପାଇଁ ଗୋଟିଏ ଇଞ୍ଚ ମାଟିରେ ବି ଏଭଲି ବେଆଇନ କାର୍ଯ୍ୟକୁ ପ୍ରଶୟ ଦିଆଯିବ ନାହିଁ ଦରକାର ପଡ଼ିଲେ ବ୍ୟାପକ ଆନ୍ଦୋଳନ କରାଯିବ ବୋଲି ବୈଠକରେ ନିଷ୍ପତ୍ତି ନିଆଯାଇଛି ।