-+91-9937148622 |
prerana_bgr@rediffmail.com |
Friday 26th April 2024 |
R.N.I. Regd No. ODIODI/2010/46693
Breaking News
16-Sep-2022
ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ) ଆଜି କଣ୍ଟାବାଞ୍ଜିର ଏକ ଲଜ୍ ଶ୍ରୀ ଅନ୍ନପୂର୍ଣା ହୋଟେଲରେ ପୁଲିସ୍ ଚଢାଉ କରି ୭ ଜଣ ଆନ୍ଧ୍ରର ଦାଦନ ସେଠ୍ ସନ୍ଦେହ କରାଯାଉଥିବା ରାଜ୍ୟ ବାହାରର ସନ୍ଦିଗ୍ଧ ଲୋକଙ୍କୁ ଗିରଫ କରିଥିବା ମାମଲାରେ ସେମାନଙ୍କଠାରୁ ୬୦ ଲକ୍ଷ ଟଙ୍କା ଜବତ କରିଥିବା ଆୟୋଜିତ ସାମ୍ବାଦିକ ସମ୍ମିଳନୀରେ ପୁଲିସ୍ ପ୍ରକାଶ କରିଥିବା ପ୍ରକାଶ । ତେବେ ଏହା ଦାଦନବଇନା ଲାଗି ସେମାନେ ଆଣିଥିବା ଟଙ୍କା ବୋଲି ଚର୍ଚ୍ଚା ହେଉଥିବାବେଳେ , ପୁଲିସ୍ ଏହାକୁ ସେମାନେ ଜୁଆ ଖେଳୁଥିବା ଟଙ୍କା ବୋଲି କହୁଥିବାରୁ ଜନସାଧାରଣଙ୍କ ମଧ୍ୟରେ ସନ୍ଦେହ ସୃଷ୍ଟି ହୋଇଛି । କେତେକ ବ୍ୟକ୍ତିବିଶେଷ ଏହା ଆହୁରି ଅଧିକ ପରିମାଣର କୋଟି କୋଟି ହେବାର ସମ୍ଭାବନା ରହିଥିବା ଓ ପୁଲିସ୍ କିଛି ଲୁଚାଉଥିବା ସହ ଏଥିରେ
ସ୍ଥାନୀୟ ରାଜନେତାଙ୍କର ମଧ୍ୟ ସମ୍ପୃକ୍ତି ଥିବା ଆରୋପ ପ୍ରକାଶ କରିଛନ୍ତି । ତେବେ ସେ ଯାହାହେଉ , ପୁଲିସ୍ ଉପରେ ଜନସାଧାରଣଙ୍କର ଆସ୍ଥା ନଥିବା ସହିତ ଗତ କିଛି ଦିନ ହେଲା ଜିଲ୍ଲାରେ ପୁଲିସ୍ ବିଶ୍ବସନୀୟତା ହରାଇଥିବାର ଏହା ମଧ୍ୟ ଏକ ପ୍ରମାଣ । ଝରଣୀର ମମିତା ମେହେର ହତ୍ୟାମାମଲାଠାରୁ ଟିଟିଲାଗଡ ଥାନା ବାରାକରୁ ଏହାର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ ଫେରାର୍ ହେଇଯିବା ସହ ପାଟଣାଗଡ ବ୍ଲକ୍ ର ଜେଇ ହତ୍ୟା ଅଭିଯୋଗ ଓ ବଲାଙ୍ଗୀର ଜିଲ୍ଲା ସଦର ମହକୁମାଠାରେ ଭୀମଭୋଇ ମେଡିକାଲ କଲେଜ ହଷ୍ଟେଲରେ ରାଗିଂ ଯୋଗୁଁ ଦୁଇଜଣ ଡାକ୍ତରୀଛାତ୍ରୀଛାତ୍ରଙ୍କ ମୃତ୍ୟୁ ମାମଲା ସହିତ ପାଟଣାଗଡ ସହରରେ ଦିନଦ୍ବିପ୍ରହରରେ ସୁନାଦୋକାନରେ ସଶସ୍ତ୍ର ଡକାୟତି ଘଟଣା ଇତ୍ୟାଦିର ପୁଲିସ୍ ତଦନ୍ତରେ ଲୋକେ ସନ୍ତୁଷ୍ଟ ନୁହଁନ୍ତି । ତେଣୁ ଏହି ଚଢାଉରେ ପ୍ରକୃତରେ ୬୦ , ୭୦ , ୮୦ ଲକ୍ଷ ବା ଆହୁରି ଅଧିକ ଟଙ୍କା ପୁଲିସ୍ ଜବତ କରିଛି , ସନ୍ଦେହ ସୃଷ୍ଟି ହେବା ସ୍ବାଭାବିକ୍ ।
ଉଲ୍ଲେଖନୀୟ ଯେ , ପ୍ରତିବର୍ଷ ପରି ଚଳିତବର୍ଷ ମଧ୍ୟ ନୂଆଖାଇ ପରଠାରୁ ଜିଲ୍ଲାରେ ଦାଦନଶ୍ରମିକ ଚାଲାଣ ଆରମ୍ଭ ହୋଇଗଲାଣି । କଣ୍ଟାବାଞ୍ଜି , ବେଲପଡା , ଖପ୍ରାଖୋଲ ଓ ଅନ୍ୟାନ୍ୟ ସ୍ଥାନର ସର୍ଦ୍ଦାରମାନେ ମୁଖ୍ୟତଃ ବିଗତ ବହୁବର୍ଷ ଧରି ଆନ୍ଧ୍ର , ତାମିଲନାଡୁ , କର୍ଣ୍ଣାଟକ ଓ ରାଜ୍ୟବାହାରର ସେଠ୍ ମାନଙ୍କଠାରୁ କୋଟି କୋଟି ଟଙ୍କା ଆଣି ଶ୍ରମିକମାନଙ୍କୁ ବଇନା ଦେଇଥା'ନ୍ତି । ଏହା ସହିତ ସେହିସବୁ ରାଜ୍ୟବାହାରୁ ସେଠ୍ ମାନେ ଆସି କଣ୍ଟାବାଞ୍ଜି ଇତ୍ୟାଦି ଲଜ୍ ଓ ହୋଟେଲରେ ଡେରା ପକାଇଥାନ୍ତି । ଥରେ ଥରେ ଏହି ହୋଟେଲମାନଙ୍କରେ ପୁଲିସ୍ ଚଢାଉ କରିଥାଏ । ଏହି ହୋଟେଲରେ ମଧ୍ୟ ଆଗରୁ ଚଢାଉ ହୋଇ ଥାନାକୁ ଏହି ଅଞ୍ଚଳର ଦାଦନ ସେଠ୍ ମାନଙ୍କୁ ଧରିନିଆଯାଇଥିବା ଓ ଏବେ ବିଧାୟକ ଥିବା ସନ୍ତୋଷ ସିଂ ସାଲୁଜା ସେତେବେଳେ ମଧ୍ୟ ବିଧାୟକ ଥାଇ ଥାନାରେ ବସି ଦାଦନସେଠ୍ ମାନଙ୍କୁ ଛାଡିଦେବାକୁ ଜିଦ୍ କରିବାରୁ ପୁଲିସ୍ ଲାଠିଚାଳନା କରିଥିବା ଭଳି ଘଟଣା ଘଟିଥିବା ଲୋକେ ମନେରଖିଥିବା ପ୍ରକାଶ । ତେଣୁ ଏହି ଜିଲ୍ଲାର ବ୍ୟାପକ ଦାଦନଶ୍ରମିକ ଚାଲାଣରେ ସ୍ଥାନୀୟ ଲୋକପ୍ରତିନିଧି ଓ ପୁଲିସ୍ ର ଭୂମିକା ଜଣାଶୁଣା ।
ତେବେ ଆଜି ଧରାପଡିଥିବା ତେଲେଙ୍ଗାନା ବା ଆନ୍ଧ୍ର ବା ଦକ୍ଷିଣଭାରତୀୟ ଦାଦନସେଠ୍ ମାନେ ପ୍ରକୃତରେ ଏଠାକୁ ଦାଦନବଇନା ବାଣ୍ଟିବାକୁ ନା ଜୁଆଖେଳିବାକୁ ଆସିଥିଲେ ଓ ସେମାନଙ୍କଠାରୁ ଏତେ ବିପୁଳ ଟଙ୍କା ଜବତ କରିଥିବା କଣ୍ଟାବାଞ୍ଜି ପୁଲିସ୍ ଯେ ଏହାଠାରୁ ବହୁଗୁଣ ଟଙ୍କା ଜବତ କରି ଏତକ ସିଜର୍ ଦେଖାଉଛି ବୋଲି କଥାରେ ଲୋକେ ବିଶ୍ବାସ କରିପାରୁ ନାହାଁନ୍ତି ।
ଆଇନଜିବୀ ଓ କେତେକ ପୂର୍ବତନ ପୁଲିସ୍ କର୍ମଚାରୀଙ୍କ କହିବାନୁଯାୟୀ , ଜୁଆଖେଳ ଦର୍ଶାଇଲେ ଶୀଘ୍ର ଜାମିନ୍ ମିଳିଯିବାର ସମ୍ଭାବନା ରହିଥିବାବେଳେ ଦାଦନବଇନାରେ ଏହା ବିଳମ୍ବ ହେବାର କାରଣରୁ ହୁଏତ ପୁଲିସ୍ ଜାଣିଶୁଣି ଏଭଳି ମାମଲାକୁ ଭିନ୍ନମୋଡ ଦେବାର ଅପଚେଷ୍ଟା କରୁଥାଇପାରେ !
ଜିଲ୍ଲାର ଚଳିତବର୍ଷ କିଛିଦିନତଳେ ଲାଠୋରରୁ ୬ ଜଣ ଦାଦନଶ୍ରମିକଙ୍କୁ ଉଦ୍ଧାର ସହ ୨ ଜଣ ସର୍ଦାର୍ ଙ୍କୁ ଲାଠୋର ପୁଲିସ୍ ଗିରଫ କରିଥିବା ପ୍ରଥମ ଘଟଣା ହୋଇଥିବାବେଳେ ଏହା ଦ୍ବିତୀୟ ବଡ ଚଢାଉ ଓ ଗିରଫଦାରୀ । ପୂର୍ବରୁ ଏମିତି ପ୍ରଥମେ ଧରପଗଡ କରି ପରେ ଦାଦନ ସେଠ୍ ଓ ସର୍ଦ୍ଦାରମାନଙ୍କ ମଧ୍ୟରେ ଆତଙ୍କ ସୃଷ୍ଟିକରି ପ୍ରଚୁର ବଟିଆଦାୟ ପୁଲିସ୍ ର ଏକ କୌଶଳ ବୋଲି ମଧ୍ୟ ସମାଲୋଚନା ପ୍ରକାଶ ପାଇଛି ।ତେବେ ଏଭଳି ସନ୍ଦେହ ସୃଷ୍ଟି ହେବାରୁ ବଲାଙ୍ଗୀର ଏସ ପି ତଦନ୍ତ ନିର୍ଦ୍ଦେଶ ଦେବାରୁ ଜବତ ଟଙ୍କାର ପୁନଃଗଣତି କରାଯାଇଥିବା ପ୍ରକାଶ ।