21-Nov-2021

ବିନିକା(ହିମାଂଶୁ ଶେଖର ପୁଟେଲ) ବିନିକା ସ୍ଥିତ ଯୋଗେଶ୍ୱର ମନ୍ଦିର ପରିସରରେ ସୁବର୍ଣ୍ଣପୁର ଜିଲ୍ଲାର ବିଭିନ୍ନ ସ୍କୁଲରେ କାର୍ଯ୍ୟରତ ଲେବୁଲ ଭି(ଏ) ପ୍ରାଥମିକ ଶିକ୍ଷକଙ୍କ ଏକ ଜରୁରୀ ବୈଠକ ଅନୁଷ୍ଠିତ ହୋଇଥିଲା । ଶିକ୍ଷକ ଶଶାଙ୍କ ଶେଖର ପଣ୍ଡାଙ୍କ ଅଧ୍ୟକ୍ଷତାରେ ଅନୁଷ୍ଟିତ ଏହି ଵୈଠକରେ ଜିଲ୍ଲାର ବିଭିନ୍ନ ସ୍ଥାନରୁ ଶତାଧିକ ଶିକ୍ଷକ/ଶିକ୍ଷୟତ୍ରୀ ଯୋଗ ଦେଇଥିଲେ । ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରାଥମିକ ଶିକ୍ଷକଙ୍କ ପଦୋନ୍ନତି ଭେଟିକୁ ନେଇ ସ୍କୁଲ ଓ ଗଣଶିକ୍ଷା ବିଭାଗ ଏକ କ୍ୟାଲେଣ୍ଡର ଅଫ୍ ଏକ୍ଟିଭିଟି ତିଆରି କରିଥିଲେ ।ଯାହାକି ୩୦ସେପ୍ଟେମ୍ବର ସୁଦ୍ଧା ଶିକ୍ଷକଙ୍କ ପଦୋନ୍ନତି କାର୍ଯ୍ୟକ୍ରମକୁ ଶେଷ କରିବାକୁ ସରକାରଙ୍କ ନିର୍ଦ୍ଦେଶ ରହିଥିଲା । ହେଲେ ଜିଲ୍ଲା ଶିକ୍ଷା ବିଭାଗର ଆନ୍ତରିକତାର ଅଭାବ ଯୋଗୁଁ ପଦୋନ୍ନତି କାର୍ଯ୍ୟ ଆଗେଇ ପାରୁନାହିଁ ବୋଲି ଶିକ୍ଷକ ମହଲରେ ଅସନ୍ତୋଷ ପ୍ରକାଶ ପାଇଛି ।ସୂଚନା ଯୋଗ୍ୟ ଯେ ଏହି କ୍ୟାଡ଼ର ଶିକ୍ଷକଙ୍କ ଚୂଡ଼ାନ୍ତ ଗ୍ରେଡେଶନ ତାଲିକା ଦୀର୍ଘ ଏକ ମାସ ପୂର୍ବରୁ ପ୍ରକାଶିତ ହୋଇଥିଲେ ମଧ୍ୟ ଶିକ୍ଷକଙ୍କୁ ଭି(ବି) ପଦବୀକୁ ପ୍ରମୋଶଣ ଦିଆଯାଇ ପାରି ନଥିବାରୁ ଜିଲ୍ଲାର ପ୍ରାୟ ୨ହଜାର ଶିକ୍ଷକ ପ୍ରଭାବିତ ହୋଇଥିବା ଶିକ୍ଷକମାନେ ଅଭିଯୋଗ କରିଛନ୍ତି l ତେବେ ଏହି ସମସ୍ତ ବିଷୟକୁ ନେଇ ଆଗାମୀ ଦିନରେ ମାନ୍ୟବର ମୁଖ୍ୟମନ୍ତ୍ରୀଙ୍କ ସୁବର୍ଣ୍ଣପୁର ଗସ୍ତ ଅବସରରେ ଉକ୍ତ ଦାବି ଦିଆଯିବ ବୋଲି ନିଷ୍ପତି ନିଆଯାଇଛି । ଅନୁଷ୍ଟିତ ଏହି ଵୈଠକରେ ଶିକ୍ଷକ ଦୋଳ ଗୋବିନ୍ଦ ପଣ୍ଡା,ଶ୍ରୀନିବାସ ରଥ,ସଞ୍ଜୟ ପଣ୍ଡା,ପ୍ରାଣବନ୍ଧୁ ସାହୁ,ହୃଷୀକେଶ ଚାନ୍ଦ,ପରମାନନ୍ଦ ପ୍ରଧାନ,ଦୀନବନ୍ଧୁ ଗଡ଼ତ୍ୟା,ଜ୍ୟୋତି ପ୍ରଧାନ,ମନୋଜ ସାହୁ ପ୍ରମୁଖ ବକ୍ତବ୍ୟ ରଖିଥିଲେ ।