04-Sep-2021

ରେଢ଼ାଖୋଲ ( ଅନିଲ କୁମାର ପୃଷ୍ଟି )  ସମ୍ବଲପୁର ଜିଲ୍ଲା ରେଢାଖୋଲ ଭୀମଭୋଇ ମହାବିଦ୍ୟାଳୟରେ ଶୁକ୍ରବାର କୋଭିଡ୍ କଟକଣା ମଧ୍ୟରେ ଅନୁଷ୍ଠାନର ଅଧ୍ୟାପକ, ଅଧ୍ୟାପିକା, କର୍ମଚାରୀ ଏବଂ ସୀମିତ ସଂଖ୍ୟକ ଛାତ୍ର ଛାତ୍ରୀ ଙ୍କୁ ନେଇ କଲେଜର ୫୨ତମ ବାର୍ଷିକ ଉତ୍ସବ ଅନୁଷ୍ଠିତ ହୋଇଯାଇଛି। ମହାବିଦ୍ୟାଳୟର ଅଧ୍ୟକ୍ଷ ଦିଲ୍ଲୀପ କୁମାର ଦାସ ଏହି ଉତ୍ସବକୁ ଅଧ୍ୟକ୍ଷତା କରିଥିଲେ। ଏହି ଅବସରରେ ଓଡ଼ିଆ ବିଭାଗ ମୁଖ୍ୟ ଡ.ମନୋରଞ୍ଜନ ମହନ୍ତ ଏବଂ ଇତିହାସ ବିଭାଗ ମୁଖ୍ୟ ଅକ୍ଷୟ କୁମାର କର ବକ୍ତବ୍ୟ ପ୍ରଦାନ କରି ସନ୍ଥକବି ଭୀମଭୋଇ ବିଶ୍ବାତ୍ମାବାଦର ବିଶିଷ୍ଟ ଭାଷ୍ୟକାର ଥିଲେ ବୋଲି ମତପ୍ରକାଶ କରିଥିଲେ। ଅଧ୍ୟାପକ ଅଞ୍ଜନ କୁମାର ମିଶ୍ର ପ୍ରାରମ୍ଭିକ ଅଭିଭାଷଣ ଦେବା ସହ କାର୍ଯ୍ୟକ୍ରମକୁ ସଂଯୋଜନା କରିଥିଲେ। ଅଧ୍ୟାପିକା ସୁପ୍ରିୟା କୁମାରୀ ମଲ୍ଲିକ ଧନ୍ୟବାଦ ଅର୍ପଣ କରିଥିଲେ। ଶୁକ୍ରବାର ଭୋରରୁ ଅନୁଷ୍ଠାନର କର୍ମଚାରୀ ମାନେ କନ୍ଧରା ସ୍ଥିତ ଭୀମଭୋଇ ସ୍ମୁତି ପୀଠ ଠାରେ ଯଥାବିଧି

ପୂଜାର୍ଚ୍ଚନା କରି ପବିତ୍ର ମଶାଲ ଆଣିବା ପରେ ଏହି ପ୍ରତିଷ୍ଠା ଉତ୍ସବ ଅନୁଷ୍ଠିତ ହେଉଥିଲା। ଏହି ଅବସରରେ ଓଡ଼ିଆ ପ୍ରବନ୍ଧ ପ୍ରତିଯୋଗିତାରେ କୃତି ପ୍ରତିଯୋଗୀ ଅଭିପସା ପ୍ରଧାନ, ମନସ୍ଵିନୀ ସାଥୁଆ , ସିମ୍ରନ କ୍ୟୁରେସି, ଶିବାନୀ ପ୍ରଧାନ, ଅର୍ପିତା ମହାପାତ୍ର, ଓ ଅନନ୍ୟା ଶାସନୀଙ୍କୁ ପୁରସ୍କୃତ କରାଯାଇଥିଲା। ଏହା ସହିତ ଗତ ଶିକ୍ଷା ବର୍ଷରେ କଲେଜ +୨ ଶ୍ରେଣୀ ବିଜ୍ଞାନ ବିଭାଗରେ ସର୍ବୋଚ୍ଚ ନମ୍ବର ରଖି ଉତ୍ତୀର୍ଣ୍ଣ ହୋଇଥିବା ଛାତ୍ର ବିକାଶ ବେହେରା ଏବଂ କଳା ବିଭାଗରେ ସର୍ବୋଚ୍ଚ ନମ୍ବର ରଖି ଉତ୍ତୀର୍ଣ୍ଣ ହୋଇଥିବା ଛାତ୍ରୀ ଲିକି ପ୍ରଧାନଙ୍କୁ ସୁବୋଧ ଦାଶ ମେରିଟ୍ ଆୱାର୍ଡ଼ ପ୍ରଦାନ କରାଯାଇଥିଲା।