03-Sep-2021

ଜଗତସିଂହପୁର-(ନୃସିଂହ ବାରିକ) :ଏଭଳି  ଅଭାବନୀୟ ଘଟଣା ଦେଖିବାକୁ ମିଳିଛି କୁଜଙ୍ଗ ବ୍ଲକ ଗଣ୍ଡିକିପୁର ପଞ୍ଚାୟତ ମଠସାହି ଗ୍ରାମରେ । ଏହି ଗ୍ରାମର ୫ ନଂବର ୱାର୍ଡରେ  ଗଙ୍ଗାଧର ଭଟ୍ଟ ( ୪୫ ) ସପରିବାର ବସବାସ କରନ୍ତି । ଜମି ବାଡି ବେଶି କିଛି ନାହିଁ । ରାଜମିସ୍ତ୍ରି ସହାୟକ ଭାବେ ଏଠିସେଠି କାମକରି ସେ ନିଜ ପରିବାର ପ୍ରତିପୋଷଣ କରିଥାନ୍ତି । ଗତବର୍ଷ କୋଠାକମ କରୁଥିବା ବେଳେ  ଭାରାରୁ ପଡି ଗୁରୁତର ଆହାତ ହୋଇଥିଲେ । ମୁଣ୍ଡରେ ଆଘାତ ଲାଗିବା ସହ ମେରୁଦଣ୍ଡ ଭାଙ୍ଗି ଯାଇଥିଲା । ଚିକିତ୍ସା ପାଇଁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ ହୋଇ ସାରିଲାଣି । ତଥାପି ସେ ଏଯାବତ୍ ସଂପୂର୍ଣ୍ଣ ସୁସ୍ଥ ହୋଇ  ପାରିନାହାନ୍ତି । ଏଣେ ସ୍ତ୍ରୀ ଝୁନିବାଳା ମଧ୍ୟ ରୋଗ ଶଯ୍ୟାରେ । ବେକ ତାଙ୍କର ସିଧା ହୋଇପାରୁନି । ଆଭ୍ୟନ୍ତରୀଣ ଶାରୀରିକ ଜଟିଳ ରୋଗରେ ପଡି ଜୀବନ ମରଣ ସହ ସେ ସଂଗ୍ରାମ କରୁଛନ୍ତି । ପରିବାରର ଏକମାତ୍ର ରୋଜଗାର କ୍ଷମ ବ୍ୟକ୍ତି ହେଲେ ଗଙ୍ଗାଧର । ଅସୁସ୍ଥତା କାରଣରୁ ସେ ଆଉ କାମ କରିବାକୁ ସକ୍ଷମ ନାହାନ୍ତି । ଭୋକ ଉପାସରେ ଦିନ କଟୁଛି । ଘରେ ଥିବା ୧୧ ବର୍ଷର ପୁଅ ଓ ୮ ବର୍ଷର ଝିଅଙ୍କ ପାଠ ପଢାରେ ଡୋରୀ ବନ୍ଧା ହେଲାଣି । ଏହି ଅସହାୟ ପରିବାରର ଦୁର୍ଦିନରେ "ସମୟର ପ୍ରଗତି" ସ୍ବେଚ୍ଛାସେବୀ ଅନୁଷ୍ଠାନ ପହଞ୍ଚି ଆର୍ଥିକ ସହାୟତା ପ୍ରଦାନ କରିଛି । ଅନୁଷ୍ଠାନ ପକ୍ଷରୁ ପ୍ରଶାନ୍ତ କୁମାର ମାଝୀ,ସରପଞ୍ଚଙ୍କ ପ୍ରତିନିଧି ଅଟଳ କୁମାର ଦାଶ,ପ୍ରଦୀପ୍ତ ପରିଡା ଏବଂ ରାଜ୍ୟ ଉପଭୋକ୍ତା ମହିଳା କଲ୍ୟାଣ ମହାସଂଘର ସଂପାଦିକା ଶ୍ରୀମତୀ ସ୍ନେହମୟୀ ଆଚାର୍ଯ୍ୟ ଝୁନିବାଳାଙ୍କ ପାଖରେ ପହଞ୍ଚି ସ୍ବାସ୍ଥ୍ୟବସ୍ଥା ପଚାରି ବୁଝିଥିଲେ  । ଝୁନିବାଳାର ଚିକିତ୍ସା ପାଇଁ ବହୁ ଅର୍ଥର

ଆବଶ୍ୟକତା ରହିଛି । ଏହି ଦୁଃଖୀ ପରିବାରକୁ ବଦାନ୍ୟ ବ୍ୟକ୍ତି ବିଶେଷ  ସାହାଯ୍ୟ କରିବା ପାଇଁ ସମାଜସେବୀ ସ୍ନେହମୟୀ ଓ ସମୟର ପ୍ରଗତି ସ୍ବେଚ୍ଛାସେବୀ ଅନୁଷ୍ଠାନ ଅନୁରୋଧ ଜଣାଇଛି। Allahabad Bank A/C No.60085042938 IFSC CODE.IDIB00G518  Gandakipur Branch, Account Holder name-Jhunibala Bhatta.ଉପରୋକ୍ତ ବ୍ୟାଙ୍କ ଆକାଉଣ୍ଟରେ ଆର୍ଥିକ ସହାୟତା ଓଡିଶାର ଜନସାଧାରଣଙ୍କଠାରୁ ଗଙ୍ଗାଧରଙ୍କ ପରିବାର ଆଶା କରୁଛି । ରିପୋର୍ଟ-ନୃସିଂହ ଚରଣ ବାରିକ