26-Jul-2021

ବଲାଙ୍ଗିର, : ପ୍ରଧାନମନ୍ତ୍ରୀ ଆବାସ ଯୋଜନା ଆବଂଟନ କ୍ଷେତ୍ରରେ ରାଜ୍ୟ ସରକାର କରିଥିବା ପକ୍ଷପାତିତା ଓ କୋସଳାଂଚଳକୁ କରାଯାଇଥିବା ଉପେକ୍ଷା ପ୍ରତିବାଦରେ ଗତ ୨୩ ତାରିଖରୁ କୋସଲ ଯୁବ ସମନ୍ୱୟ ସମିତି (କେୱାଇସିସି) ତରଫରୁ କୋସଲ ସ୍ୱାଭିମାନ ଯାତ୍ରା ଚାଲିଛି । ଆଜି ପୂର୍ବାହ୍ନ ପ୍ରାୟ ୧୦ ଘଣ୍ଟା ସମୟରେ ଏହି ପଦଯାତ୍ରା ଆସି ବଲାଙ୍ଗିର ଠାରେ ପହଂଚିଥିଲା । ବଲାଙ୍ଗିର ସହରରେ ଏହି ପଦଯାତ୍ରାକୁ କୋସଲ ରାଜ୍ୟ ସମନ୍ୱୟ ସମିତିର ଆହ୍ୱାନକ୍ରମେ ବିଭିନ୍ନ ସାମାଜିକ / ସାଂସ୍କୃତିକ ସଂଗଠନ ଉଚ୍ଛ୍ୱସିତ ସଂବର୍ଦ୍ଧନା ଦେଇଥିଲେ । ପ୍ରାରଂଭରେ ପଦଯାତ୍ରୀମାନଙ୍କୁ ସହରର ପ୍ରାରଭଂରେ ବିଜାଖମନ ଠାରେ ପାଶ୍ୱବର୍ତ୍ତୀ ଗାଁମାନଙ୍କର ଅଧିବାସୀମାନେ ସ୍ୱାଗତ ଜଣାଇଥିଲେ । ବଲାଙ୍ଗିର ପେଲେସ ଲାଇନ ଦୁର୍ଗାମଣ୍ଡପ ଠାରେ କୋସଲ ଯୁବ ସମନ୍ୱୟ ସମିତି, ୟୁଥ  ଏକ୍ସନ କମିଟି ଓ ପଶ୍ଚିମାଂଚଳ ବିଜୁଳୀ ଶ୍ରମିକ ସଂଘର ଯୁବ କାର୍ଯ୍ୟକର୍ତ୍ତାମାନେ ପଦଯାତ୍ରାକାରୀମାନଙ୍କୁ ବିପୁଳ ସଂବର୍ଦ୍ଧନା ଦେବା ସହ ଏକ ଶେଭାଯାତ୍ରାରେ ପାଛୋଟି ଆଣିଥିଲେ । ଶୋଭାଯାତ୍ରାକାରୀମାନେ କଚେରୀ ଛକରେ ପହଞ୍ôଚଲା ପରେ ସେଠାରେ କୋସଲ ରାଜ୍ୟ ସମନ୍ୱୟ ସମିତି, ବଲାଙ୍ଗିର ନାଗରିକ କମିଟି, ବଲାଙ୍ଗିର ଏକ୍ସନ କମିଟି, ବରିଷ୍ଠ ନାଗରିକ ସଂଘ, କୋସଲ ପାଇଁ ବରିଷ୍ଠ ନାଗରିକ ସଂଘ, ଜିଲ୍ଲା ଆଦିବାସୀ କଲ୍ୟାଣ ସମିତି, ପଶ୍ଚିମ ଓଡିଶା ମଂଚ, କୋଶଲି ସାଂସ୍କୃତିକ ସଂଗ, କୋସଲ ଶିକ୍ଷାବିତ୍ ଫୋରମ ସମେତ ବହୁ ସଂଗଠନର କର୍ମକର୍ତ୍ତା ପଦଯାତ୍ରକାରୀମାନଙ୍କୁ ଫୁଲମାଲ ଦେଇ ଓ ପୁଷ୍ପବୃଦ୍ଧି କରି ସ୍ୱାଗତ କରିଥିଲେ । କୋସଲ ରାଜ୍ୟ ସମନ୍ୱୟ ସମିତିର କେନ୍ଦ୍ରୀୟ ଅଧ୍ୟକ୍ଷ ପ୍ରମୋଦ କୁମାର ମିଶ୍ରଙ୍କ ନେତୃତ୍ୱରେ ଅନୁଷ୍ଠିତ ଏହି ସଂବର୍ଦ୍ଧନା ଉତ୍ସବରେ ଅନ୍ୟମାନଙ୍କ ମଧ୍ୟରେ ଉପାଧ୍ୟକ୍ଷ ମନୋରଂଜନ ସାହୁ, ସମାଜସେବୀ ବିକ୍ରମାନନ୍ଦ ବହିଦାର, ପ୍ରଭାକର ମିଶ୍ର, କପିଳେଶ୍ୱର ଖମାରୀ, କର୍ମଚାରୀ ନେତା ପୁଲିନ ମିଶ୍ର, ବିଭୁତି ବିନ୍ଧାଣି, ଶ୍ରମିକ ନେତା ରବି ମିଶ୍ର, ଶିକ୍ଷାବିତ୍ ପ୍ରଫେସର ପ୍ରମୋଦ

ବାଗ, ସଂଗଠକ ଶରତ ହୋତା, ଦଲିତ ନେତା ଦିନେଶ ନାଗ, ବୁଦ୍ଧିଜୀବୀ ଗୋପଭୂଷଣ ନାଥ, ବସନ୍ତ ଆଚାର୍ଯ୍ୟ, ମନୋରଂଜନ ମିଶ୍ର, ନରେଶ ଦାସ, ନିମାଇଁ ପାଣିଗ୍ରାହୀ, ଗୋବିନ୍ଦ ମିଶ୍ର, ଯୁବ ସଂଗଠକ ଡୋଳାମଣି ପ୍ରଧାନ, ବିନୋଦ କାଲସାଏ, ରିଲୁ ରଥ, ଜ୍ୟୋତି ମହାନ୍ତି, ନାରୀ ନେତ୍ରୀ ବନଲତା ମାଝି, ଚନ୍ଦ୍ରକାନ୍ତି ସେଠଙ୍କ ସମେତ ଶତାଧିକ ସଂଗଠକ ସାମିଲ ଥିଲେ । ପରେ ପରେ ବିଶାଳ ଶୋଭାଯାତ୍ରା ସହର ପରିକ୍ରମା କଲାପରେ ସ୍ଥାନୀୟ ଯାଦବ ଭବନ ଠାରେ ଏକ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇ ପଦଯାତ୍ରୀମାନଙ୍କୁ ସଂଗଠନର କେନ୍ଦ୍ରୀୟ ଅଧ୍ୟକ୍ଷ ପ୍ରମୋଦ ମିଶ୍ର ସଂବୋଧିତ କରିଥିଲେ । ଏଠାରେ ଉଲ୍ଲେଖଯୋଗ୍ୟ ଯେ କୋସଲ ଯୁଗଳ କିଶୋର ମେହେର, ରଂଜନ ଖୁଆସ, ବିଶ୍ୱଜିତ ପ୍ରଧାନ, ଶୁଭମ୍ ପ୍ରଧାନ ଓ ଧର୍ମରାଜ ମେହେଙ୍କ ନେତୃତ୍ୱରେ ୨୦ଜଣ ପଦଯାତ୍ରୀ ଏହି ପଦଯାତ୍ରାରେ ସାମିଲ ଅଛନ୍ତି ।