26-Jul-2021

 ସାଲେଭଟା.(ପ୍ରେରଣା ଖବର)- କୋଭିଡ କଟକଣା ଯୋଗୁଁ ଚଳିତ ବର୍ଷ ମାର୍ଚ୍ଚ ମାସରୁ ସ୍କୁଲ ପାଠ ପଢା ବନ୍ଦ ହୋଇଯାଇଥିଲା । କରୋନା ସ୍ଥିତିରେ ସୁଧାର ହେବା ପରେ ଆଜି ଠାରୁ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ଶ୍ରେଣୀ ଗୃହ ପାଠ ପଢାକୁ ରାଜ୍ୟ ସରକାର ଅନୁମତି ଦେଇଛନ୍ତି । ଏଣୁ , ଆଜି ସୋମବାର ସାଲେଭଟା କୃଷ୍ଣ ପ୍ରସାଦ ମିଶ୍ର ମେମୋରିଆଲ ବାଳିକା ଉଚ୍ଚ  ବିଦ୍ୟାଳୟରେ ଦଶମ ଶ୍ରେଣୀର ବାଳିକା ମାନେ ପାଠ ପଢିବାକୁ ଆସିଥିଲେ । ପୂର୍ବରୁ, ବିଦ୍ୟାଳୟ ପରିସର ତଥା ଶ୍ରେଣୀ କକ୍ଷ ଗୁଡିକୁ ସାନିଟାଇଜ କରାଯାଇଥିବା ସହିତ ପ୍ରବେଶ ଦ୍ୱାରରେ ସାମାଜିକ ଦୂରତା ଅନୁପାଳନ ନିମନ୍ତେ ଗୋଲେଇ ଚିହ୍ନ ଦିଆ ଯାଇଥିଲା ।  ଜୁନିଅର ରେଡକ୍ରସ ୟୁନିଟ ତରଫରୁ ବାଳିକା ମାନଙ୍କୁ ବିଦ୍ୟାଳୟରେ ପ୍ରବେଶ ସମୟରେ ଫୁଲ ତୋଡା ଦେଇ ସ୍ୱାଗତ କରାଯାଇଥିଲା । ସମସ୍ତଙ୍କର ହାତକୁ ସାନିଟାଇଜ କରାଯାଇ ମାସ୍କ ବଂଟନ କରାଯାଇଥିଲେ । ବିଦ୍ୟାଳୟରେ ପାଠ ପଢାର ରହଣି ସମୟରେ ଛାତ୍ରୀମାନେ  କିଭଳି କୋଭିଡ ନିୟମକୁ ବା ଏସୋପିକୁ

ନିଶ୍ଚିତ ରୂପେ ଅନୁପାଳନ କରିବେ ସେ ବିଷୟରେ ପ୍ରଧାନଶିକ୍ଷକ ବାଳକୃଷ୍ଣ ମହାନନ୍ଦ ପ୍ରାଂଜଳ ଭାବରେ ବୁଝାଇ ଥିଲେ । କାର୍ଯ୍ୟକ୍ରମରେ ସାଲେଭଟା ସରକାରୀ ପ୍ରାଥମିକ ବିଦ୍ୟାଳୟର ପ୍ରଧାନଶିକ୍ଷକ ତଥା ଜୁନିଅର ରେଡକ୍ରସ ପରାମର୍ଶଦାତା ଦୂର୍ଯ୍ୟୋଧନ ପଶାୟତ, ବାଳିକା ବିଦ୍ୟାଳୟର ବରିଷ୍ଠ ଶିକ୍ଷକ ନରୋତମ ପାଣିଗ୍ରାହି, ଭାଗ୍ୟଧର ପଣ୍ଡା, ପରାମର୍ଶଦାତା ସୁବୋଧ କୁମାର ଭୋଇ, ଶିକ୍ଷିକା ମମତା ସେଠୀ, କାଳୀନ୍ଦ୍ରି ଷଡଙ୍ଗୀ, ରଶ୍ମୀଲତା ଦାଶ, ସୁଚିତା କବାଟ, ଶ୍ରୀମୟୀ ପଟେଲ, ସୁରେଶ ଭୋଇ, ଭଗବାନ ଦାଶ, ବୀଣାପାଣୀ ମହାପାତ୍ର ପ୍ରମୁଖ କାର୍ଯ୍ୟକ୍ରମରେ ଉପସ୍ଥିତି ରହି ଛାତ୍ରୀମାନଙ୍କୁ ସ୍ୱାଗତ କରିଥିଲେ ।