26-Jul-2021

ସୋନପୁର(ମନୋରଂଜନ ତ୍ରିପାଠୀ)- ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ର ଫୁଲଚରା ଗ୍ରାମରେ ଓଡ଼ିଆ ଭାଷା ସହିତ୍ୟ ଓ ସଂସ୍କୃତି ବିଭାଗ ଆନୁକୂଲ୍ୟରେ ତଥା ଓଡ଼ିଶା ସଙ୍ଗୀତ ନାଟକ ଏକାଡେମୀ, ଭୁବନେଶ୍ୱର ତରଫରୁ ଦୀକ୍ଷାନ୍ତ କାର୍ଯ୍ୟକ୍ରମର ଉଦ୍‌ଘାଟନୀ ସମାରୋହ ଅନୁଷ୍ଠିତ ହୋଇଯାଇଛି । ପଶ୍ଚିମ ଓଡ଼ିଶାର ସର୍ବବୃହତ ଓ ସର୍ବପୂରାତନ ଷୋହଳ ସୁଆଙ୍ଗ ଦଣ୍ଡନାଟ ଲୋକକଳାକୁ  ଦୀକ୍ଷାନ୍ତ ମାଧ୍ୟମରେ ଆରମ୍ଭ କରାଯାଇଛି । ଲୁପ୍ତ ହୋଇଥିବା ଲୋକକଳାକୁ ପୁନଃରୁଦ୍ଧାର କରିବ ପାଇଁ ଓଡ଼ିଶା ସଙ୍ଗୀତ ନାଟକ ଏକାଡେମୀ ତରଫରୁ ବିଭିନ୍ନ କାର୍ଯ୍ୟକ୍ମ ମାନ ହାତକୁ ନିଆଯାଇଛି । ଚଳିତ ବର୍ଷ ପ୍ରଥମ କରି ଗୁରୁଶିଷ୍ୟ ପରମ୍ପରା ଆଧାରରେ ଦୀକ୍ଷାନ୍ତ କାର୍ଯ୍ୟକ୍ରମ ମାଧ୍ୟମରେ ଆମ ଅଂଚଳର ସମସ୍ତଙ୍କ ହୃଦୟକୁ ଛୁଇଁ ପାରିଥିବା ଷୋହଳ ସୁଆଙ୍ଗ ଦଣ୍ଡନାଟକୁ ଓଡ଼ିଶା ସଙ୍ଗୀତ ନାଟକ ଏକାଡେମୀର ସଚିବ ପ୍ରବୋଧ ରଥ ଉଦ୍‌ଘାଟନ କରିଛନ୍ତି । ଏହି କାର୍ଯ୍ୟକ୍ରମରେ ଜଣେ ଅଭିଜ୍ଞ ଗୁରୁ ଓ ୧ଠଜଣ ଶିଷ୍ୟ ୬ମାସ ପର୍ଯ୍ୟନ୍ତ ଶିକ୍ଷାଦାନ କରିବେ, ଯାହାର ଆନୁସଙ୍ଗିକ ଖର୍ଚ୍ଚ ଏକାଡେମୀ ବହନ କରିବ ବୋଲି ସଚିବ ଶ୍ରୀ ରଥ କହିଛନ୍ତି । ଲୋକକଳା ଗବେଷକ ତଥା ପଏଁରୀ ଅନୁଷ୍ଠାନର ସଂପାଦକ ଚୌଧୁରୀ ବିଭାରଙ୍କ ସଂଯୋଜନାରେ ଅନୁଷ୍ଠିତ ଉଦ୍‌ଘାଟନୀ କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବରେ ପୂର୍ବତନ ବ୍ଲକ ଅଧ୍ୟକ୍ଷ ରଂଜିତ ରଥ ଯୋଗ ଦେଇଥିଲେ । ସମାଜସେବୀ ଶ୍ରୀବତ୍ସ ମଲ୍ଲିକ, କଣ୍ଠଶିଳ୍ପୀ ସାଶ୍ୱତ ତ୍ରିପାଠୀ, ପଏଁରୀ ର ସଭାପତି ଲଡୁକିଶୋର ମଲ୍ଲିକ ପ୍ରମୁଖ ଯୋଗ ଦେଇ ଓଡ଼ିଶା ସଙ୍ଗୀତ ନାଟକ ଏକାଡେମୀର କାର୍ଯ୍ୟକ୍ରମକୁ ଭୂରି ଭୂରି ପ୍ରଶଂସା କରିଥିଲେ ।