19-Jul-2021

 ବିନିକା (ହିମାଂଶୁ ଶେଖର ପୁଟେଲ) ୩୦୦ଦିନର ଏମଡିଏମ ଚାଉଳ,ରାସନ ଖର୍ଚ୍ଚ,ପୋଷାକ ନ ମିଳିବା  ଏବଂ ପ୍ରଧାନ ଶିକ୍ଷକଙ୍କୁ ଅନ୍ୟତ୍ର ବଦଳି ଦାବିରେ ଆଜି ସ୍କୁଲର ଛାତ୍ରଛାତ୍ରୀ ଓ ତାଙ୍କ ଅଭିଭାବକ ମାନେ ସୁବର୍ଣ୍ଣପୁର ଜିଲ୍ଲାପାଳଙ୍କ ଅନୁପସ୍ଥିତରେ ଅତିରିକ୍ତ ଜିଲ୍ଲାପାଳ ସୂର୍ଯ୍ୟ ନାରାୟଣ ଦାଶ ଓ ଜିଲ୍ଲା ଶିକ୍ଷା ଅଧିକାରୀ ଲକ୍ଷ୍ମଣ ଭୋଇଙ୍କୁ ଭେଟି ଏକ ଦାବିପତ୍ର ପ୍ରଦାନ ପୂର୍ବକ ତୁରନ୍ତ ପଦକ୍ଷେପ ନେବାକୁ ଦାବି କରିଛନ୍ତି l ସୂଚନା ଯୋଗ୍ୟ ଯେ ବିନିକା ବ୍ଲକ ଅନ୍ତର୍ଗତ ମହଦା ପଞ୍ଚାୟତ ମନୋରଂଜନପୁର ସରକାରୀ ପ୍ରାଥମିକ ବିଦ୍ୟାଳୟରେ ପାଠ ପଡୁଥିବା ଛାତ୍ରଛାତ୍ରୀ ମାନଙ୍କୁ ସରକାର ଯୋଗାଇ ଦେଉଥିବା ମଧ୍ୟାହ୍ନ ଭୋଜନ ଚାଉଳ,ରାସନ ଖର୍ଚ୍ଚ ଗତ ୩୦୦ଦିନର ମିଳି ନ ଥିବାବେଳେ ପୋଷାକ(ୟୁନିଫର୍ମ) ମଧ୍ୟ ପାଇବାରୁ ବଞ୍ଚିତ

ହୋଇଛନ୍ତି l ଏହି ବାବଦ ନେଇ ଗତ ଜୁନମାସ ୨୯ତାରିଖରେ ଛାତ୍ରଛାତ୍ରୀ ଙ୍କ ଅଭିଭାବକ ମାନେ ସ୍କୁଲ କୁ ଆସି ଦାୟିତ୍ୱରେ ଥିବା ପ୍ରଧାନ ଶିକ୍ଷକ ଚତରୁ ଭୁଏଙ୍କୁ ପଚାରିବା ଓ ସମସ୍ତ ଦ୍ରବ୍ୟ ଦେବା ପାଇଁ କହିବାରୁ  ସେ କୌଣସି ଉତ୍ତର ଦେଇ ପାରି ନ ଥିଲେ l ଫଳରେ ସମସ୍ତ ଅଭିଭାବକ ମାନେ ଶିକ୍ଷକଙ୍କୁ ଅଟକ ରଖି ଛାତ୍ରଛାତ୍ରୀଙ୍କ ହକ ଦାବି ପୂରଣ ନେଇ ସ୍କୁଲ ପରିସରରେ ଧାରଣା ଦେଇଥିଲେ l ଧାରଣା ୮ଘଣ୍ଟା ବିତିଗଲାପରେ ବିନିକା ବିଇଓ ଘଟଣାସ୍ଥଳକୁ ନ ଯାଇ ତାଙ୍କ ପ୍ରତିନିଧି ଭାବେ ସିଆରସିସି ଭରତ ଝାଙ୍କର ପହଞ୍ଚି ଅଭିଭାବକଙ୍କ ସହିତ ଦୀର୍ଘ ସମୟଧରି ଆଲୋଚନା କରି ବିଇଓଙ୍କୁ ଫୋନ କରି ଅଭିଭାବକଙ୍କ ସମସ୍ତ ଦାବି ସିଆରସିସି ଜଣାଇବା ପରେ ୧୦ଦିନ ମଧ୍ୟରେ ସମସ୍ତ ଦାବି ଗୁଡ଼ିକ ପୂରଣ ହେବ ବୋଲି ଦୃଢ ପ୍ରତିଶ୍ରୁତି ଦେବାପରେ ଧାରଣା ହଟିଥିଲା। ହେଲେ ୧୦ଦିନ ଯାଇ ୨୦ଦିନ ବିତିଗଲା ପରେ ବି ଛାତ୍ରଛାତ୍ରୀଙ୍କ ଚାଉଳ,ଟଙ୍କା ଓ ପୋଷାକ ଆତ୍ମସାତ କରିଥିବା ସଂପୃକ୍ତ ଶିକ୍ଷକଙ୍କ ଉପରେ କାର୍ଯ୍ୟାନୁଷ୍ଠାନ ତ ଦୂରର କଥା ବର୍ତ୍ତମାନ ପର୍ଯ୍ୟନ୍ତ ଛାତ୍ରଛାତ୍ରୀଙ୍କୁ ମିଳିନାହିଁ ତାଙ୍କର ହକ ଦାବି l ଏହି ସମସ୍ୟା ନେଇ ଅଭିଭାବକ ମାନେ ଅନେକଥର ଶିକ୍ଷା ବିଭାଗ ନିକଟରେ ଅଭିଯୋଗ କରି ଆସୁଥିଲେ ମଧ୍ୟ ସେମାନଙ୍କ ଦାବି ସମାଧାନ ପ୍ରତି ବିନିକା ଗୋଷ୍ଟି ଶିକ୍ଷା ଅଧିକାରୀ ଓ ସିଆରସିସି କୁମ୍ଭକର୍ଣ୍ଣ ପରି ଶୋଇ ରହିଥିବାରୁ ଶେଷରେ ବାଧ୍ୟ ହୋଇ ଆଜି ସ୍କୁଲର ଛାତ୍ରଛାତ୍ରୀ ଓ ଅଭିଭାବକ ମାନେ  ସୁବର୍ଣ୍ଣପୁର ଜିଲ୍ଲାପାଲ ଓ ଜିଲ୍ଲା ଶିକ୍ଷା ଅଧିକାରୀଙ୍କ ଦ୍ୱାରସ୍ଥ ହୋଇ ଏକ ଦାବିପତ୍ର ପ୍ରଦାନ କରି କାର୍ଯ୍ୟାନୁଷ୍ଠାନ ନେବାକୁ ଗୁହାରି କରିଛନ୍ତି l