25-Oct-2020

ବଲାଙ୍ଗୀର,(ବିନୋଦ କୁମାର ଦୀପ) ଚଳିତ ବର୍ଷ କରୋନା ମହାମାରୀ ପାର୍ବଣର ମାହୋଲକୁ ଫିକା ପକାଇ ଦେଇଛି । ତଥାପି ସଂପୂର୍ଣ୍ଣ ନିଷ୍ଠା ଓ ନୀତିକାନ୍ତିରେ ବଲାଙ୍ଗୀର ସହରର ବିଭିନ୍ନ ପୂଜା କମିଟି ପକ୍ଷରୁ ଶାରଦୀୟ ଦୁର୍ଗା ପୂଜା ପାଳିତ ହୋଇଯାଇଛି । ସରକାରଙ୍କ କୋଭିଡ ଗାଇଡଲାଇନ୍‌କୁ ପାଳନ କରି ସହରର ସମସ୍ତ ପୂଜା ମଣ୍ଡପ ଗୁଡିକରେ ଜଗତଜନନୀ ମାଁ ଦୁର୍ଗାଙ୍କ ମୁଣ୍ମୟୀ ମୂର୍ତ୍ତି ଶୋଭା ପାଉଛି । ସୀମତି ଭକ୍ତ ଓ ପୂଜା କମିଟିର ଅଳ୍ପ ସଦସ୍ୟଙ୍କ ଗହଣରେ ଚଳିତ ବର୍ଷ ମାତା ଦୁର୍ଗାଙ୍କ ପୂଜନୋତ୍ସବ ଅନୁଷ୍ଠିତ ହୋଇଛି । 
  ବଲାଙ୍ଗୀର ସହରର ତୁଳସୀ ନଗର ପୂଜା କମିଟି ପକ୍ଷରୁ ପାରମ୍ପରିକ ନୀତିରେ ମାଁ ଶୋଭା ପାଉଛନ୍ତି । ବିଗତ ବର୍ଷ ମାନଙ୍କ ପରି ଏଥର ନା ଅଛି ଆଲୋକସଜ୍ୱା ନା ଅଛି ବାଜା ଓ ତୋରଣ । ତୁଳସୀ ନଗର ସମେତ ସହରର ଟିକ୍ରାପଡା(ଗାନ୍ଧୀ ଛକ), ରିଜର୍ଭ ପୋଲିସ, ଗାନ୍ଧୀ ନଗର ପଡା, ଦୁର୍ଗା ମନ୍ଦିରରୁଗୁଡିପଡା, ପେଲେସ ଲାଇନ, କ୍ଲବ ପଡା, ରାଧାରାଣୀ ପଡା, ଜଗନ୍ନାଥ ପଡା, ଶାନ୍ତି ପଡା, ରାଜେନ୍ଦ୍ର ପଡା, ରେଲୱେ ଷ୍ଟେସନ ଆଦି ସ୍ଥାନ ମାନଙ୍କରେ କୋଭିଡ ଗାଇଡଲାଇନ୍‌କୁ ପାଳନ କରି ସମସ୍ତ ପୂଜାବିଧି ଅନୁଷ୍ଠିତ ହୋଇଛି । ଗତକାଲି ଅପେକ୍ଷା ଆଜି ଭକ୍ତ ମାନଙ୍କ ସଂଖ୍ୟା ସାମାନ୍ୟ ବଢ଼ିଥିବା ଦେଖିବାକୁ ମିଳିଛି । ତେବେ ବଲାଙ୍ଗୀରରେ କରୋନା ସଂକ୍ରମିତଙ୍କ ସଂଖ୍ୟା ଧୀରେ ଧୀରେ କମିବାକୁ ଲାଗୁଥିବା ବେଳେ ଏବେ ମଧ୍ୟ କରୋନାର ଭୟାବହତାରୁ ବଲାଙ୍ଗୀର ସହର ମୁକ୍ତ ନୁହେଁ । ତେଣୁ ଏଥର ଲୋକେ ନିଜେ ସଚେତନ ହୋଇ ଶାରଦୀୟ ଦୁର୍ଗା ପୂଜାକୁ ପାଳନ କରିଥିବା ଦେଖିବାକୁ ମିଳିଛି ।