18-Apr-2021

ଡୁଙ୍ଗୁରିପାଲି-(ଅରବିନ୍ଦ ମିଶ୍ର)-କରୋନା ମହାମାରୀ ଯୋଗୁଁ ଅନେକ ବେପାର ମାନ୍ଦା ପଡିଥିବା ବେଳେ ଡୁଙ୍ଗୁରିପାଲି ଅଂଚଳରେ ଦେଶୀ ଓ ବିଦେଶୀ ମଦର ବେପାର ଢେର ବଢିଯାଇଛି । ଏହି ଅଂଚଳରେ ବେପାର ଭଲ ଚାଲିଥିବାରୁ ଅନେକ ଲୋକ ଅନ୍ୟ ବେପାର ଛାଡି ମଦକୁ ବେପାର ଭାବରେ ଚଳାଇ ଆସିଛନ୍ତି । ଏହି ବେପାର ପାଇଁ କୌଣସି ସ୍ଥାନ, ଘର, ଚାକର, ଇଲେକ୍ଟ୍ରି ଯୋଗାଣ ବ୍ୟବହାର ହେଉ ନଥିବାରୁ ଏଥିରେ ଢେର ଲାଭ ହେଉଛି । ପଡୋଶୀ ଜିଲ୍ଲା ତଥା ଏହି ଅଂଚଳର ଉପାନ୍ତ ଏରିଆର ନାଳ ଖଣିମାନଙ୍କରେ କୁଟୀର ଶିଳ୍ପ ଭାବରେ ରନ୍ଧା ଯାଉଛି । ଏଥିରେ ମହୁଲ ଫୁଲ ସହିତ ବିଭିନ୍ନ ରାସାୟନିକ ଦ୍ରବ୍ୟ ମଧ୍ୟରେ ନିଶା ବଟିକା, ୟୁରିଆସାର ମିଶ୍ରଣ କରୁଥିବା ଆଲୋଚନା ହେଉଛି । ଏହି ଦ୍ରବ୍ୟ ଗୁଡିକ ମିଶାଇ ମଦ ପ୍ରସ୍ତୁତ କଲେ ଅଧିକ ନିଶା ହୋଇଥାଏ ବୋଲି ମଦୁଆମାନେ କହିଥାନ୍ତି । ବର୍ତ୍ତମାନ ଲୋକଙ୍କ ମଧ୍ୟରେ ନିଶା ଏପରି ବ୍ୟବହାର ହେଲାଣି ଯେ, ସାଧାରଣ ନିଶା ସେମାନଙ୍କୁ କିଛି ଜଣା ପଡୁନାହିଁ । ଏହି ବ୍ୟବସାୟରେ  ମଦୁଆଙ୍କ ପାଖରେ ପହଞ୍ଚିବା ପାଇଁ ଅନେକ ମାଧ୍ୟମ ରହିଛି । ଜଣେ ମଦ ପ୍ରସ୍ତୁତ କରିବା ବେଳେ ଏହାକୁ ଅନ୍ୟମାନେ ନେଇ ଗାଁ ଗୁଡିକରେ ଥିବା କୁଚିଆ ପାଖରେ ପହଞ୍ଚାଇ ଥାନ୍ତି । ଗାଁ ମୁଣ୍ଡରେ ନାମକୁ ମାତ୍ର ଥିବା କିରାଣା, ପାନ ଦୋକାନରେ ଏହା ଭରପୁର ଭାବରେ ମିଳିଥାଏ । ପାନ ଦୋକାନରେ ବିକ୍ରୀ ହେଲେ ମଧ୍ୟ ମଦଗୁଡିକ ଉକ୍ତ ଦୋକାନରେ ନ ରହି ଦୋକାନ ପାଖରେ ଥିବା ପଛପଟ ପାଳଗଦା, ଘାସ ବୁଦା, ଛୋଟ ଗାଡିଆମାନଙ୍କରେ ରଖା ଯାଇଥାଏ । ଗ୍ରାହକ ପହଞ୍ଚିଲେ ସେଠାରୁ ଆଣି ଦିଆଯାଇ ଥାଏ । ଆଉ କେତେକ ବେପାରୀ  ଭ୍ରାମ୍ୟମାଣ ଏଜେଣ୍ଟ ରଖିଥାନ୍ତି । ସେମାନେ ବ୍ୟାଗରେ ବୁଲି ବୁଲି ଫୋନରେ ଅର୍ଡର କରାଯାଇଥିବା ବ୍ୟକ୍ତିଙ୍କ ପାଖରେ ପହଞ୍ଚାଇ ଦେଇଥାନ୍ତି । ଗାଁ ମୁଣ୍ଡରେ ଥିବା ବ୍ରଏଲର ଖୁଣ୍ଟରୁ ହିଁ ସୂଚନା ମିଳେ ଯେ ଏଠାରେ ମଦ ଏବଂ କୁକୁଡାର ଅନ୍ତବୁଜୁଲା ଭଜା ମିଳେ । ଗୋଟିଏ ଲିଟର ଦେଶୀ ମଦର ଦାମ ଶହେଟଙ୍କାରେ ଖୁଚୁରା ବ୍ୟବସାୟୀ କିଣିବା ପରେ ସେ ସେଥିରେ ପୁଣି ପାଣି ମିଶାଇ ଦେଇ ବିକ୍ରୀ କରୁଥିବାରୁ ଲାଭ ଆହୁରି ହୋଇଥାଏ । ଏହିପରି ଭାବରେ ଦେଶୀ ମଦର ବେପାର ଚାଲିଥିବା ବେଳେ ବିଦେଶୀ ମଦ ବେପାର ମଧ୍ୟ ପଛରେପଡି ନାହିଁ ।   ବିଦେଶୀ ମଦ ଦୋକାନରୁ ଗାଁ ମାନଙ୍କରେ ପେଟି ଆକାରରେ ମଦ ପହଞ୍ଚି ଯାଉଛି । ବ୍ଲକର ବଡ ଗାଁ , ଛକ ଗୁଡିକରେ ବିୟରଠାରୁ ଆରମ୍ଭ କରି ବିଭିନ୍ନ ପ୍ରକାର ବିଦେଶୀ ମଦ ଅନାୟସରେ ପହଞ୍ଚି ଯାଉଛି । ଗରୀବ ତଥା ମଜରିଆ ଶ୍ରେଣୀର ଲୋକେ ଦେଶୀ ପାଉଚ ନେଉଥିବା ବେଳେ ଧନୀ ଏବଂ ଶିକ୍ଷିତ ଗୋଷ୍ଠିର ଲୋକେ ବିଦେଶୀ ବ୍ରାଣ୍ଡ  କିଣିଥାନ୍ତି । ବିଦେଶୀ ମଦ ବାହାରେ ବିକ୍ରି ହେବାର ନିୟମ ନ ଥିଲେ ମଧ୍ୟ  ପେଟି ଆକାରରେ ବାହାରକୁ ଚାଲିଯାଉଛି । ଉପାନ୍ତ ଅଂଚଳର ଲୋକେ ସହଜରେ ହାତପାହାନ୍ତରେ ପାଉଥିବାରୁ ମଦୁଆଙ୍କ ଉତ୍ପାତ ବଢିବାରେ ଲାଗିଛି । ଏତ୍‌ଦ ବ୍ୟତୀତ କୋରେକ୍ସ, ନିଶା ଇଞ୍ଜେକ୍ସନ ମଧ୍ୟ ଅନାୟାସରେ ଚାଲିଛି । ମଦୁଆମାନଙ୍କ ଉତ୍ପାତ ଯୋଗୁଁ ଗାଁ ମାନଙ୍କରେ ମହିଲାମାନେ ଘରୁ ବାହାରକୁ ବାହାରି ପାରୁ ନାହାନ୍ତି । ମଦ ବନ୍ଦ କରିବାକୁ ଅନେକ ଗାଁର ମହିଲାମାନେ ଥାନାରେ , ଜିଲ୍ଲାପାଳ, ଅବକାରୀ ବିଭାଗ ପାଖରେ ଅଭିଯୋଗ ମଧ୍ୟ କରିଥିବା ନଜିର ରହିଛି ।  ଏତେ କାରବାର ଚାଲିଥିଲେ ମଧ୍ୟ ପୋଲିସ କେତେକ ମଦ ବେପାରୀଙ୍କୁ ଧରି ମାମଲା ଋଜୁ କରି ଗିରଫ କରିଥିଲେ ମଧ୍ୟ ସେମାନେ ପରବର୍ତ୍ତି ସମୟରେ  ବାହାରି ପୁଣି ବେପାର ଚଳାଇଛନ୍ତି । ଅବକାରୀ ବିଭାଗ ଏଥିପ୍ରତି ଦୃଷ୍ଟି ଦେଉ ନାହାନ୍ତି ।  ଚୋରା ବେପାରୀମାନଙ୍କୁ ଡରି ସାଧାରଣ ଲୋକେ ଅଭିଯୋଗ ମଧ୍ୟ କରିପାରୁ ନାହାନ୍ତି ।  ବେପାରୀମାନେ ଅବକାରୀ ବିଭାଗକୁ ମାସିକିଆ ଚାନ୍ଦା ଦେଉଥିବାରୁ ତାଙ୍କ ଉପରେ କିଛି ପଦକ୍ଷେପ ହେଉନଥିବା ସାଧାରଣରେ ଆଲୋଚନା ହେଉଛି ।  ଏ ସଂପର୍କରେ ବିନିକା ଅବକାରୀ ସବ୍‌-ଇନ୍ସପେକ୍ଟର ଗୋବର୍ଦ୍ଧନ ରଣାଙ୍କୁ ପଚାରିବାରୁ ସେ ନୁଆ ହୋଇ ଆସିଛନ୍ତି ଏବଂ ମାସିକିଆ ଚାନ୍ଦାକୁ ଅସ୍ୱୀକାର କରିଥିବା ବେଳେ କର୍ମଚାରୀ ଏବଂ ଗାଡି ଅଭାବରୁ  ଚଢାଉ କିମ୍ବା ପେଟ୍ରୋଲିଂ କରାଯାଇ ପାରୁନଥିବା ପ୍ରକାଶ କରିଥିଲେ । ଜିଲ୍ଲା ଅବକାରୀ ଅଧିକ୍ଷକ ସାମୁଏଲ ଏକ୍କାଙ୍କୁ ଫୋନ ଯୋଗେ ବାରମ୍ବାର ଯୋଗାଯୋଗ କରାଯାଇଥିଲେ ମଧ୍ୟ ବ୍ୟସ୍ତ ଥିବାରୁ ତାଙ୍କର ପ୍ରତିକ୍ରୀୟା ମିଳିପାରି ନଥିଲା ।