15-Oct-2020

ବରଗଡ଼-(ମୁକୁନ୍ଦ ଦାସ) -ବରଗଡ଼ ଜିଲା ସୋହେଲା ଥାନା ପୋଲିସ ହାତରେ ଏକ ବଡ଼ ଧରଣର କଫ୍‌ ସିରପ୍‌ ଚାଲାଣ ଧରାପଡ଼ିଛି। ପୋଲିସ ଅତର୍କିତ ଚଢ଼ାଉ କରି ସୋହେଲା ଥାନା ହଲଦୀପାଲି ଛକରେ କଫ୍‌ ସିରଫ୍‌ ବୋଝେଇ ଏକ ପିକ୍‌ଅପ୍‌ ଭ୍ୟାନ ଜବତ କରିଛି । ସେଥିରେ ୧୧୦ଟି କାଟୁନରେ ୧୩ ହଜାର ୨ଶହ ବୋତଲ କଫ୍‌ ସିରପ୍‌ ଥିଲା। ଏହାର ଆନୁମାନିକ ମୂଲ୍ୟ ୨୫ଲକ୍ଷ ଟଙ୍କା ହେବ ବୋଲି ପୋଲିସ ସୂଚନା ଦେଇଛି। ଏହା ସହିତ ପୋଲିସ ୫ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ସମ୍ବଲପୁର ଜିଲା ଶାସନ ଥାନା ଅନ୍ତର୍ଗତ ତାଲପଦର ଗ୍ରାମର ଶୁକ୍ରୁ ମିର୍ଦ୍ଦା, ଶାସନର ଆକାଶ କୁମ୍ଭାର, ଅଇଁଠାପାଲି ଥାନା ଅନ୍ତର୍ଗତ ବେହେରାପାଲିର ଆଲୋକ ମହାରଣା, ବଲାଙ୍ଗୀର ଜିଲା ସୋଢ଼ାପଦର ଗ୍ରାମର ଶଙ୍କରଦେବ ଓରଫ ଦୀପକ ସେଠ ଏବଂ ସଂଗ୍ରାମ ସାହୁ। ଗିରଫ ଅଭିଯୁକ୍ତଙ୍କ ବିରୋଧରେ ସୋହେଲା ଥାନାରେ କେସ୍‌ ନଂ ୧୬୧/୨୦ରେ ଏକ ମାମଲା ରୁଜୁ ହୋଇଛି। ବୁଧବାର ସୋହେଲା ପୋଲିସକୁ ଏହି ସଫଳତା ମିଳିଥିବାବେଳେ ଗୁରୁବାର ଜିଲା ପୋଲିସ ମୁଖ୍ୟାଳୟରେ ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ଏସ୍‌ପି ପଦ୍ମିନୀ ସାହୁ ବିସ୍ତୃତ ସୂଚନା ଦେଇଛନ୍ତି।