03-Aug-2026

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲାର ଦେଓଗାଁ ଓ ସଦରବ୍ଲକର ସୀମାରେ ରହିଥିବା ଐତିହ୍ୟସମ୍ପନ୍ନ ବୁଢାଡଙ୍ଗର ପାହାଡକୁ ପର୍ଯ୍ୟଟନସ୍ଥଳୀ ମାନ୍ୟତା ଦେବାକୁ ଅଞ୍ଚଳବାସୀଙ୍କ ପକ୍ଷରୁ ଆଜି ବଲାଙ୍ଗୀର ଗସ୍ତରେ ଥିବା ରାଜ୍ୟସରକାରଙ୍କ ପର୍ଯ୍ୟନବିଭାଗର କମିଶନର ତଥା ସଚିବ ବଲବନ୍ତ ସିଂଙ୍କୁ ଭେଟି ଦୃଢଦାବି ରଖାଯାଇଛି । ବଲାଙ୍ଗୀର ବିଧାୟକ କଳିକେଶନାରାୟଣ ସିଂଦେଓଙ୍କ ନିର୍ଦ୍ଦେଶରେ ବିଡିସିସି ବ୍ୟାଙ୍କର ପୂର୍ବତନ ସଭାପତି ଲକ୍ଷ୍ମଣକୁମାର ମେହେରଙ୍କ ନେତୃତ୍ୱରେ ଏକ ପ୍ରତିନିଧିଦଳ ସ୍ଥାନୀୟ ଏସଆଇଏଚଏମ ଅନୁଷ୍ଠାନରେ ପର୍ଯ୍ୟଟନ ସଚିବଙ୍କୁ ଭେଟି ବିଧାୟକଙ୍କ ଦାବିପତ୍ର ଦେଇ ଆଲୋଚନା କରିଛନ୍ତି । ବଲାଙ୍ଗୀର ଜିଲ୍ଲାପାଳ ଗୌରବ ଶିବାଜୀ ଇସଲୱାର,ଏସପି ଅଭିଲାଷଜୀ,ଜିଲ୍ଲା ପର୍ଯ୍ୟଟନ ଅଧିକାରୀ ତଲ୍ଲିନା ପ୍ରଧାନୀଙ୍କ ଉପସ୍ଥିତିରେ ଏହିଦାବିପତ୍ର ପ୍ରଦାନ କରାଯାଇଛି । ବିଧାୟକଙ୍କ ପତ୍ରରେ ବୁଢାଡଙ୍ଗର ପାହାଡର ଐତିହ୍ୟ ତଥା ପ୍ରାକୃତିକ ସୌନ୍ଦର୍ଯ୍ୟକଥା ବର୍ଣ୍ଣନା କରାଯିବା ସହିତ ଆଦିବାସୀମାନଙ୍କର ସଂସ୍କୃତି ଓ ପରମ୍ପରା କଥା ଉଲ୍ଲେଖ ରହିଛି । ଏହା ସହିତ ଏହି ପାହାଡକୁ ପର୍ଯ୍ୟଟନସ୍ଥଳୀ ମାନ୍ୟତା ପ୍ରଦାନ କରାଗଲେ ଅଞ୍ଚଳର ଅନେକ ଯୁବକଙ୍କ ଜୀବିକାର ସୁଯୋଗ ବଢିବ ଯାହାକି ଦାଦନ ସମସ୍ୟାକୁ ରୋକିବାରେ ସହାୟକ ହେବ ବୋଲି ଉଲ୍ଲେଖ କରାଯାଇଛି ।
      ସଚିବଙ୍କ ସହ ପ୍ରତିନିଧିଦଳ ଆଲୋଚନା କାଳରେ ଦାବି କରିଛନ୍ତି ଯେ,ବୁଢାଡଙ୍ଗର ପାହାଡ ଯାହାକି ୪୯୦ ହେକ୍ଟର ପରିମିତ ଅଞ୍ଚଳରେ ପରିବ୍ୟାପ୍ତ ହୋଇଛି । ଏହି ପାହାଡ ସହିତ ବଲାଙ୍ଗୀର ପାଟଣା ଗଡଜାତ ରାଜ୍ୟସମୟର ଇତିହାସ ଲାଖିରହିଛି । ୧୨୪୨ ମସିହାରେ ପାଟଣାରାଜ୍ୟ ଗଠନ ହେବା

ପୂର୍ବରୁ ଏହାର ଇତିହାସ ରହିଛି । କୁଆଁରୀ ପାଟଣା ଅଞ୍ଚଳର  ଗଣ୍ଡ,ସହରା,ବିଞ୍ଝାଲ ଇତ୍ୟାଦି ଆଦିବାସୀମାନେ ଏହି ପାହାଡରେ ତାଙ୍କର ଡଙ୍ଗରବୁଢା ଦେବତାଙ୍କୁ ପୂଜା କରୁଥିଲେ । ସେହି ପରଂମ୍ପରା ଆଜି ମଧ୍ୟ ଚାଲିଆସିଛି । ଏବେ କୁଡାସିଙ୍ଘା, ଶିରିଶ,ଅର୍ଡା,ଗଡଦ୍ୱାର,ରତନପୁର,ଟେକା ଓ ଖଇସବାହାଲି ଗ୍ରାମର ଲୋକେ ଏହି ଡଙ୍ଗରରୁ ଉପକୃତ ହେଉଛନ୍ତି । ଏହି ଡଙ୍ଗରରୁ ବହିଯାଇଥିବା ପ୍ରାୟ ୬ଟି ଝରଣାର ଜଳକୁ ବ୍ୟବହାର କରି ଚାଷକାର୍ଯ୍ୟ କରୁଥିବା ବେଳେ ପ୍ରାକୃତିକ ସୌନ୍ଦର୍ଯ୍ୟକୁ ଉପଭୋଗ କରିବାକୁ ବିଭିନ୍ନ ଅଞ୍ଚଳରୁ ଲୋକେ ଆସୁଛନ୍ତି । ଅର୍ଡା-ଗଡଦ୍ୱାର ସୀମାରେ ପାହାଡ ଉପରୁ ତଳକୁ ପାଣି ପଡୁଥିବା ଦୁଇଟି ସୁନ୍ଦର ଜଳପ୍ରପାତ ରହିଛି ।ପାହାଡ ଉପରେ ଏକ ବିସ୍ତିର୍ଣ୍ଣ ପଥରଚଟାଣ ରହିଛି ଓ ସେଥିରେ ଏକ ପାଣିକୁଣ୍ଡ ରହିଛି । ଏବେ ଏହି ସ୍ଥାନକୁ ରତନପୁର-ଅର୍ଡା ମୁଖ୍ୟ ଆରଡିରାସ୍ତାରୁ ନୂତନ ରାସ୍ତାନିର୍ମାଣ, ପାହାଡରେ ବୁଢାଡଙ୍କର ଦେବତାଙ୍କ ପାଇଁ ମନ୍ଦିର ନିର୍ମାଣ,ଝରଣା ଗୁଡିକୁ ପର୍ଯ୍ୟଟକ ମାନେ ଯିବାକୁ ଜଙ୍ଗଲରେ ରାସ୍ତାନିର୍ମାଣ, ଝରଣାଜଳକୁ ଅଟକାଇ ଜମିପାଇଁ ଉପଯୋଗୀ କରିବାକୁ ଚେକଡ୍ୟାମନିର୍ମାଣ କରିବାକୁ ଦାବି ହୋଇଛି । ଏହି ପ୍ରତିନିଧିଦଳରେ ଲକ୍ଷ୍ମଣ ମେହେରଙ୍କ ସହ ଅର୍ଡାର ଗଉଁତିଆ ପରିବାରର ଦୀପକ ନନ୍ଦ,ଯୁବନେତା ପ୍ରଦ୍ୟୁମ୍ନ ହୋତା, ଚନ୍ଦ୍ରମଣୀ ତ୍ରୀପାଠୀ,କାହ୍ନୁ ମେହେର,ସମ୍ବିତ ଭୋଇ,ସଂଜୀବ ଭୋଇ,ଦେବେନ୍ଦ୍ର ମେହେର, ନାଥ ଧରୁଆ,ଅଞ୍ଜନ ଭୋଇ, ଗୋକୁଳ କୋଇଣ୍ଡା ଓ ଜ୍ଞାନ ଧରୁଆ ପ୍ରମୁଖ ସାମିଲ ଥିଲେ ।