11-Jun-2026

ଭୁବନେଶ୍ୱର (ପ୍ରେରଣା ଖବର):  ସ୍ଥନୀୟ ଜୟଦେବ ଭବନ ଠାରେ ଅଖିଳ ଭାରତୀୟ କଳା ଏବଂ ସାଂସ୍କୃତିକ କମିଟି  ଅନୁଷ୍ଠାନ ଦ୍ୱାରା ଆୟୋଜିତ "ଜାତୀୟ କଳାକାର ସମ୍ମାନ ୨୦୨୬" କାର୍ଯ୍ୟକ୍ରମରେ ଯୁବ କଳାକାର ଚିନ୍ମୟ କୁମାରଙ୍କୁ ଜାତୀୟ "ନାଟ୍ୟଶାସ୍ତ୍ର ସମ୍ମାନ" ରେ ସମ୍ମାନିତ କରାଯାଇଛି l ୧୯୯୮ ମସିହାରେ ଭଦ୍ରକ ଜିଲ୍ଲାର ବାସୁଦେବପୁର ବ୍ଲକ ଅନ୍ତର୍ଗତ ଏକ ଅଖ୍ୟାତ ପଲ୍ଲୀ ପଢୁଆଁରେ ଜନ୍ମ ହୋଇଥିଲେ ଯୁବ କଳାକାର ଚିନ୍ମୟ କୁମାର l ଫକୀରମୋହନ ବିଶ୍ୱବିଦ୍ୟାଳୟରୁ ବିଜ୍ଞାନରେ ସ୍ନାତକ ଡିଗ୍ରୀ ହାସଲ କରିବା ପରେ ଓଡ଼ିଶା ସରକାରଙ୍କ ଅଧିନରେ ପୋଲିସ ସେବା ବିଭାଗରେ ଦେଶ ମାତୃକାର ସେବା ପାଇଁ ନିଜକୁ ନିୟୋଜିତ କରିଛନ୍ତି l ତେବେ ପିଲାଟି ଦିନରୁ କଳା ପ୍ରତି ରୁଚି ରଖିଥିବା ଚିନ୍ମୟ 
ନିଜ ବୃତ୍ତିରୁ ସମୟ ବାହାର କରି ଅନେକ ମ୍ୟୁଜିକ ଭିଡ଼ିଓ ଯଥା : ତୁ କହିଦେ, ପରୀ ନା ଅପ୍ସରୀ, କାନ୍ଦୁଛି ଆଜି ତୋ କଣ୍ଢେଇ ରାଜା ଇତ୍ୟାଦିରେ ଅଭିନୟ କରିଛନ୍ତି l ଓଡ଼ିଶାର ଲୋକପ୍ରିୟ ମନୋରଞ୍ଜନ ଚ୍ୟାନେଲ ଜୀ ସାର୍ଥକର ମେଗା ଧାରାବାହିକ "ସୁନା ଝିଅ", ସିଦ୍ଧାର୍ଥ ଟିଭି ର "କେଦାର ଗୌରୀ", 
ତରଙ୍ଗ ଟିଭିରେ "ଅତୁଟ ବନ୍ଧନ" ଭଳି ମେଗା ଧରବାହିକରେ ଅଭିନୟ କରି ବେଶ ଲୋକପ୍ରିୟତା ହାସଲ କରିଛନ୍ତି l ନିକଟରେ ଗୋଟିଏ ଓଡ଼ିଆ ଚଳଚ୍ଚିତ୍ର "Boss" ରେ ଡାକ୍ତର ଭଳି ଏକ ବିଶେଷ ଭୂମିକାରେ ଅଭିନୟ କରିଛନ୍ତି l ଚିନ୍ମୟ କୁମାର ନିଜର ବୃତ୍ତି ଏବଂ ରୁଚିକୁ ସନ୍ତୁଳନ କରି ବେଶ ପ୍ରଶଂସା ସାଉଣ୍ଟି ପାରିଛନ୍ତି l ଆଗକୁ ଚିନ୍ମୟ ତାଙ୍କର ଅଭିନୟ ଜାରି ରଖିବେ ଏବଂ ଜଣେ ଆଗ ଧାଡ଼ିର କଳାକାର ହୋଇ ବଞ୍ଚିଥିବା ଯାଏ ଦର୍ଶକଙ୍କୁ ମନୋରଞ୍ଜନ ଯୋଗାଇବେ ବୋଲି ପ୍ରକାଶ କରିଛନ୍ତି l