09-Jun-2026

ବଲାଙ୍ଗୀର (ପ୍ରେରଣା ଖବର) : ଟ୍ରକ ଧକ୍କାରେ ମା ଝିଅ ଙ୍କ ଘଟଣାସ୍ଥଳରେ ହିଁ ଜୀବନ ଚାଲି ଗଲା। ବନ୍ଧ ଜଳାଶୟ ଗୁଡିକର ମାଟି କୋଡା ଯାଇ ଟ୍ରକ ଯୋଗେ  ଅନ୍ୟତ୍ର ସ୍ଥାନାନ୍ତରଣ କରାଯାଉଛି।  ରାସ୍ତାରେ ମାଟି ପକାଇ ଏହି ଟ୍ରକ ସବୁ ଯାଉଛି ଏଥି ଯୋଗୁଁ ଧୂଳି ପ୍ରଦୂଷଣ ହେବା ସହ ପାଣି ପଡି ରାସ୍ତା କାଦୁଅ ପଚପଚ ହେଉଛି।  ଏପରି କାଦୁଅ ପଚପଚ ରାସ୍ତାରେ ଅସାବଧାନତାବଶତଃ ଆଜି ଦୁଇ ଜଣଙ୍କ ଜୀବନ ଚାଲି ଯାଇଛି। ଏପରି କିଛି ଦୁଃଖଦ ଘଟଣା ଘଟିଛି ବଲାଙ୍ଗୀର ସହରରେ। ଆଜି ସକାଳ ପ୍ରାୟ ୬ ଟା ୩୦ ମିନିଟି ସମୟରେ ତାଲପାଲି ପଡ଼ାର ମାଆ ସୁନୀତା ନାଗ ଓ ଝିଅ  ସୃତି ନାଗ ତାଙ୍କ ସ୍କୁଟିରେ ଯାଉ ଥିବା ବେଳେ ଗାନ୍ଧୀନଗର ପଡା ପିଚୁ ହୋଟେଲ ଆଗରେ ତାଙ୍କୁ ଏକ ଟ୍ରକ୍ ମାଡ଼ି ଯିବାରୁ ମାଆ ଝିଅ ଦୁହେଁ ଟ୍ରକ ଚକା ତଳେ ଚାପି ହୋଇ ମୃତ୍ୟୁବରଣ କରିଛନ୍ତି।ଘଟଣାସ୍ଥଳ ରୁ ଟ୍ରକ ଚାଳକ ଫେରାର ମାରିଛି। ବ୍ୟସ୍ତବହୁଳ ବଲାଙ୍ଗୀର ସମ୍ବଲପୁର ରାସ୍ତା(ଏନ୍ ଏଚ୍ ୨୬)ର ଗାନ୍ଧୀ ନଗର ପଡା ଠାରେ ଏପରି ଘଟଣା ଘଟିଛି ଯାହା ସମସ୍ତଙ୍କୁ ମର୍ମାହତ କରିଛି। ବଲାଙ୍ଗୀର ମୁନିସିପାଲିଟି ଜଳାଶୟ ଗୁଡିକର ପଙ୍କୋଦ୍ଧାର ନାଁ ରେ ରାସ୍ତାକୁ ମାଟି କାଦୁଅରେ ଭର୍ତି କରିଦେବା  ଯୋଗୁଁ ଗତ କିଛି ଦିନ ହେଲା ବଲାଙ୍ଗୀରବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଜଳାଶୟ ଗୁଡିକର ପୁନଃରୁଦ୍ଧାର ହେଉ କିନ୍ତୁ ତା ସଂଗେ ସଂଗେ ପ୍ରଦୂଷଣ ଓ ଲୋକଙ୍କ ଜୀବନ ଜୀବିକା ପ୍ରତି ମଧ୍ୟ ଦୃଷ୍ଟି ଦେବା ପ୍ରଶାସନର ଦାୟିତ୍ୱ ଅଟେ।  ବଲାଙ୍ଗୀର ମୁନିସିପାଲିଟି ଓ ଜିଲ୍ଲା ପ୍ରଶାସନ ର ବେପରୁଆ ମନୋଭାବ ଯୋଗୁଁ ଆଜି ଦୁଇ ଜଣ ନିରୀହଙ୍କ ଜୀଵନ ଚାଲିଯାଇଛି l