06-Jun-2026

ବଲାଙ୍ଗୀର (ପ୍ରେରଣା ଖବର):  ଚଳିତବର୍ଷ ୧୧ଟି ବନ୍ଧକଟାର ପୁନଃରୁଦ୍ଧାରକାମ ଚାଲିଥିବା ବେଳେ ଆଜି ନରସିଂହ ବନ୍ଧ ଠାରେ ଏକ ହାଇପଲିଟିକାଲ ଡ୍ରାମା ଦେଖିବାକୁ ମିଳିଥିଲା । କରଙ୍ଗାକଟାବନ୍ଧ ଓ ନରସିଂହବନ୍ଧ କାମକୁ ନେଇ କଂଗ୍ରେସଦଳ ଓ ବିଜେଡିଦଳ ସିଧାସଳଖ ମୁହାଁମୁହିଁ ହୋଇଛନ୍ତି । କଂଗ୍ରେସ ଦଳର ନଗର ସଭାପତି ବୁଲୁ ଦାନୀଙ୍କ ନେତୃତ୍ୱରେ ଆଜି କରଙ୍ଗାକଟା ଓ ନରସିଂହବନ୍ଧର ଉନ୍ନତିକରଣରେ ଦୁର୍ନୀତି ହେଉଥିବା ଅଭିଯୋଗ କରି ଧାରଣା ଦିଆଯାଇଥିବା ବେଳେ ପୌରାଧ୍ୟକ୍ଷା ଲିକା ସାହୁ ଓ ଉପାଧ୍ୟକ୍ଷା ଗାୟତ୍ରୀ ଭୋଇଙ୍କ ନେତୃତ୍ୱରେ ବିଜେଡିଦଳର ଶତାଧିକ ମହିଳାମାନେ ଆସି କଂଗ୍ରେସ ଓ ପୂର୍ବତନ କଂଗ୍ରେସ ବିଧାୟକଙ୍କ ବିରୁଦ୍ଧରେ ନାରାବାଜି କରିଥିଲେ। ଫଳରେ କିଛି ସମୟ ଉତ୍ତେଜନାପୂର୍ଣ୍ଣ ହୋଇଉଠିଥିଲା। କଂଗ୍ରେସର ବୁଲୁ ଦାନୀ ଓ ହିମାଂଶୁ ନାୟକ ଅଭିଯୋଗ ଉଠାଇଥିଲେ ଯେ, କରଙ୍ଗାକଟା ବନ୍ଧର ମାଟି ଉଠାଯାଇ ବାହାରକୁ ନେବା ବଦଳରେ ବନ୍ଧ ଭିତରେ ପୋତା ଯାଉଛି । ବ୍ରାହ୍ମଣପଡା ପଟକୁ ଥିବା ଆଡିତଳେ ମାଟି ପକାଯାଉଛି। ଦୁର୍ନୀତି କରାଯାଇ ମାଟିଉନ୍ନତିକରଣ ଦର୍ଶାଯାଉଥିବା କଂଗ୍ରେସ ଅଭିଯୋଗ ଉଠାଇ ପ୍ରଶାସନ ଏହାର ତଦନ୍ତ କରିବାକୁ ଦାବି କରିଥିଲା । ଶହଶହ ସଂଖ୍ୟାରେ କଂଗ୍ରେସଦଳର କର୍ମୀ ମାନେ ସାମିଲ ହୋଇ ପୌରପାଳିକା ବିରୁଦ୍ଧରେ ନାରାବାଜି କରିଥିଲେ । ଏହି ଦୁର୍ନୀତିର ତଦନ୍ତ କରିବାକୁ କଂଗ୍ରେସ ପକ୍ଷରୁ ତହସିଲଦାର ଲଗ୍ନଜିତ ବେହେରା ଙ୍କ ଜରିଆରେ ଏକ ଦାବିପତ୍ର ପ୍ରଦାନ କରାଯାଇଥିଲା। ତେବେ ଏହି ଧାରଣା ଚାଲିଥିବା ବେଳେ ବିଜେଡିଦଳର ପୌରାଧ୍ୟକ୍ଷା ଲିକା ସାହୁ,ଉପାଧ୍ୟକ୍ଷା ଗାୟତ୍ରୀ ଭୋଇ ଓ ସ୍ଥାନୀୟ କାଉନସିଲର ନନ୍ଦିନୀ ପୋଢ ତଥା ଅନ୍ୟାନ୍ୟ କାଉନସିଲରଙ୍କ ସହ ଶତାଧିକ ମହିଳା ଆସି କଂଗ୍ରେସଦଳ ବଲାଙ୍ଗୀର ବିକାଶରେ ବାଧକ ସାଜୁଛନ୍ତି ବୋଲି ପ୍ରତ୍ୟାରୋପ କରିଥିଲେ । ସହରରେ ପୌରପାଳିକା ଏକ ଐତିହାସିକ ପଦକ୍ଷେପ ନେଇ ୧୧ଟି ବନ୍ଧର ପୁନଃରୁଦ୍ଧାର କାମ କରୁଥିବା ବେଳେ କଂଗ୍ରେସଦଳ ଅସହିଷ୍ଣୁ ହୋଇ ଦ୍ୱର୍ନୀତି ଆରୋପ ଆଣି କାମରେ ବାଧା ଦେବାକୁ ଚେଷ୍ଟା କରୁଛି ବୋଲି ପୌରାଧ୍ୟକ୍ଷା ଅଭିଯୋଗ ଉଠାଇଛନ୍ତି । ବ୍ରାହ୍ମଣପଡା ପଟେ ବନ୍ଧଆଡି ଛୋରଥିବାରୁ ଆଗକୁ ପେରିଫେରିଆଲ ସୌନ୍ଦର୍ଯ୍ୟକରଣ କରିବାକୁ ସେପଟର ଆଡିକୁ

ଚଉଡା କରାଯାଇ ମଜବୁତ କରାଯାଉଛି । ତାକୁ ବାହାନା କରି କଂଗ୍ରେସଦଳ ଦୁର୍ନୀତି ଅଭିଯୋଗ ଆଣୁଛି । ବରଂ ନରସିଂହ ବିଧାୟକ ଥିବା ବେଳେ ନୀରିହ ଲୋକଙ୍କ ଘରଭଙ୍ଗାଇ କିଛି ଉନ୍ନତିମୂଳକ କାମ କରାଇଲେ ନାହିଁ । ଏବେ ବିକାଶ କାମକୁ ସେ ସହି ପାରୁନାହାଁନ୍ତି । ନରସିଂହ ମିଶ୍ରଙ୍କ ସମୟରେ ଲକ୍ଷ୍ମୀଯୋର କାମରେ ମହାଦୁର୍ନୀତି ହୋଇଥିବା ବିଜେଡି ଅଭିଯୋଗ ଉଠାଇଛି । ଏହି ପ୍ରସଙ୍ଗ ଉଠାଇ ବିଜେଡିଦଳର ମହିଳାମାନେ ନରସିଂହ ମିଶ୍ରଙ୍କ ବିରୁଦ୍ଧରେ ପ୍ରବଳ ନାରାବାଜି କରିଥିଲେ । ଫଳରେ ଉଭୟ କଂଗ୍ରେସଦଳ ଓ ବିଜେଡିଦଳର କର୍ମିଙ୍କ ନାରାବାଜିରେ ନରସିଂହବନ୍ଧ ଆଡି କିଛି ସମୟ ଉତ୍ତେଜନା ପୂର୍ଣ୍ଣ ରହିଥିଲା । ବଲାଙ୍ଗୀର ଏସଡିପିଓ ସରୋଜ ଉପାଧ୍ୟାୟ ଓ ଆଇଆଇସି ଅବନୀ ସାହୁ ପୋଲିସ ଟିମ୍ ସହ ଉପସ୍ଥିତ ରହି ପରିସ୍ଥିତିକୁ ଆୟତ୍ତ କରିଥିଲେ ।