18-May-2026

କଟକ(ତପନ ମହାନ୍ତି) ଭାରତ ସରକାରଙ୍କ କାର୍ମିକ ଓ ପ୍ରଶିକ୍ଷଣ ବିଭାଗ ଏବଂ ମାନ୍ୟବର ସର୍ବୋଚ୍ଚ ନ୍ୟାୟାଳୟଙ୍କ ପକ୍ଷରୁ ଜାରି ହୋଇଥିବା ନିର୍ଦ୍ଦେଶାବଳୀକୁ ଅନୁସରଣ କରି ଓଡ଼ିଶା ଉଚ୍ଚ ନ୍ୟାୟାଳୟ ପକ୍ଷରୁ ନ୍ୟାୟାଳୟର କାର୍ଯ୍ୟପ୍ରଣାଳୀ ଓ କର୍ମଚାରୀଙ୍କ ରୋଷ୍ଟର ବ୍ୟବସ୍ଥା ସମ୍ବନ୍ଧରେ ନୂତନ ବ୍ୟବସ୍ଥା ଜାରି କରାଯାଇଛି। ଉଚ୍ଚ ନ୍ୟାୟାଳୟର ନୋଟିସ ଅନୁଯାୟୀ, ଆସନ୍ତା ୧୯ ଓ ୨୧ ମଇ୨୦୨୬ ତାରିଖରେ ସମସ୍ତ ବେଞ୍ଚ ଆଭାସୀ ମାଧ୍ୟମରେ କାର୍ଯ୍ୟ କରିବେ । ଏଥିସହ ଗ୍ରୀଷ୍ମ ଅବକାଶ ସମୟରେ କାର୍ଯ୍ୟରତ ସମସ୍ତ ଛୁଟିକାଳୀନ ବେଞ୍ଚ ଆଭାସୀ ମାଧ୍ୟମରେ କାର୍ଯ୍ୟ କରିବେ । ନ୍ୟାୟାଳୟ  ଓ ରେଜିଷ୍ଟ୍ରି ର କାର୍ଯ୍ୟ ନିରବଛିନ୍ନ ଭାବେ ଚାଲୁ ରଖିବା ପାଇଁ ସମସ୍ତ ସୁପରିଣ୍ଟେଣ୍ଡେଣ୍ଟ ମାନଙ୍କୁ ତାଙ୍କ ଅଧୀନରେ କାର୍ଯ୍ୟରତ କର୍ମଚାରୀଙ୍କ ନିମନ୍ତେ ରୋଷ୍ଟର ତାଲିକା ପ୍ରସ୍ତୁତ କରିବାକୁ କୁହାଯାଇଛି।  ଏହି ବ୍ୟବସ୍ଥାରେ ସର୍ବନିମ୍ନ  ୫୦ ପ୍ରତିଶତ କର୍ମଚାରୀଙ୍କ ପ୍ରତ୍ୟକ୍ଷ ଉପସ୍ଥିତି ନ୍ୟାୟାଳୟରେ ନିଶ୍ଚିତ କରିବାକୁ ନିର୍ଦ୍ଦେଶ ଦିଆଯାଇଛି।
ଯେଉଁ କର୍ମଚାରୀମାନେ କାର୍ଯ୍ୟ ତାଲିକା ଅନୁଯାୟୀ ନ୍ୟାୟାଳୟରେ ଉପସ୍ଥିତ ରହିବେ ନାହିଁ, ସେମାନେ କାର୍ଯ୍ୟାଳୟ ସମୟ ମଧ୍ୟରେ ଟେଲିଫୋନ, ମୋବାଇଲ ଓ  ଇଲେକ୍ଟ୍ରୋନିକ୍  ମାଧ୍ୟମରେ ସର୍ବଦା ଉପଲବ୍ଧ ରହିବେ ।  ଆବଶ୍ୟକ ପଡ଼ିଲେ ସେମାନଙ୍କୁ ତୁରନ୍ତ କାର୍ଯ୍ୟାଳୟରେ ଉପସ୍ଥିତ ହେବାକୁ ପଡ଼ିବ ବୋଲି ନିର୍ଦ୍ଦେଶ ଦିଆଯାଇଛି।
କୌଣସି ବିଭାଗରେ କାର୍ଯ୍ୟଶୈଳୀ ପ୍ରଭାବିତ ହେଉଥିଲେ  ସମ୍ପୃକ୍ତ ସୁପେରିଟେଣ୍ଡେଣ୍ଟ ସଂଶୋଧିତ କାର୍ଯ୍ୟ ତାଲିକା ରେଜିଷ୍ଟାର ଙ୍କ ନିକଟରେ ଦାଖଲ କରିପାରିବେ ।   ସମସ୍ତ  ସମ୍ପୃକ୍ତ  ଅଧିକାରୀ ମାନେ  ବିଳମ୍ବ ନ କରି ସମୟସୀମା  ମଧ୍ୟରେ ସମ୍ପୃକ୍ତ ବିଭାଗ/ଶାଖା କୁ ନ୍ୟସ୍ତ କରାଯାଇଥିବା ସରକାରୀ କାର୍ଯ୍ୟ ଶେଷ କରିବା  ନିଶ୍ଚିତ କରିବେ। ଏହା ସହିତ, ସମ୍ଭବ ଥିଲେ ସମସ୍ତ ବୈଠକ ଆଭାସୀ ମାଧ୍ୟମରେ ଆୟୋଜନ କରିବାକୁ କୁହାଯାଇଛି। କେବଳ ଜରୁରୀକାଳୀନ ପରିସ୍ଥିତିରେ ପ୍ରତ୍ୟକ୍ଷ ବୈଠକ ଆୟୋଜିତ ହେବ ।