03-May-2026

କଟକ(ତପନ ମହାନ୍ତି): କଟକ ସଦର ଥାନା ଅନ୍ତର୍ଗତ ଗୋପାଳପୁର-ବାଲିକୁଦା  ଓଭରବ୍ରିଜ ଏବେ ଯାତ୍ରୀଙ୍କ ପାଇଁ ମରଣଯନ୍ତା ପାଲଟିଛି | ମାତ୍ର ବର୍ଷେ ପୂର୍ବରୁ କାର୍ଯ୍ୟକ୍ଷମ ହୋଇଥିବା ଏହି ଗୁରୁତ୍ବପୂର୍ଣ ସେତୁର ବିପର୍ଯ୍ୟସ୍ତ ଅବସ୍ଥା ଏବେ ବିଭାଗୀୟ କାର୍ଯ୍ୟଦକ୍ଷତା ଉପରେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି । ୧୬ ନମ୍ବର ଜାତୀୟ ରାଜପଥକୁ ସଂଯୋଗ କରୁଥିବା ଏହି ଓଭରବ୍ରିଜର ଆରମ୍ଭ ସ୍ଥଳ ଅର୍ଥାତ ଗୋପାଳପୁର ଶନି ମନ୍ଦିର ନିକଟରେ ସୃଷ୍ଟି ହୋଇଥିବା ବଡ଼ ବଡ଼ ଖାଲ ଏବେ ଦୈନିକ ଦୁର୍ଘଟଣାର କାରଣ ସାଜିଛି । ବିଶେଷକରି ବର୍ଷା ଦିନେ ଏହି ଖାଲଗୁଡ଼ିକରେ ପାଣି ଜମି ରହୁଥ‌ିବାରୁ ରାତି ସମୟରେ ବାଇକ ଆରୋହୀ ଓ ଅନ୍ୟ ଛୋଟ ଯାନବାହନଗୁଡ଼ିକ ଦୁର୍ଘଟଣାର

ଶିକାର ହେଉଛନ୍ତି। ଏହି ଓଭରବ୍ରିଜଟି ଏକ ପ୍ରମୁଖ ସଂଯୋଗକାରୀ ପଥ ଭାବେ ବ୍ୟବହୃତ ହେଉଛି | ପ୍ରତିଦିନ ରାଜ୍ୟ ତଥା

ରାଜ୍ୟ ବାହାରୁ ଶହ ଶହ ଭାରିଯାନ ଏହି ରାସ୍ତା ଦେଇ ନନ୍ଦନକାନନ, ବାରଙ୍ଗ, ବାଙ୍କୀ ଓ ଖୋର୍ଦ୍ଧା ଅଭିମୁଖେ ଯାଉଛନ୍ତି |

ଭୁବନେଶ୍ବରର ଟ୍ରାଫିକ ଭିଡ଼ କମାଇବା ପାଇଁ କଟକ ଦିଗରୁ ଆସୁଥିବା ମାଲବୋଝେଇ ଟ୍ରକଗୁଡ଼ିକୁ ମଧ୍ୟ ଗୋପାଳପୁର ସର୍ଭିସ ରୋଡ୍ ଦେଇ ଏହି ବ୍ରିଜ୍‌ ମାଧ୍ୟମରେ ଛଡ଼ାଯାଉଛି | ଏତେ ସଂଖ୍ୟକ ଯାନବାହନ ଚଳାଚଳ କରୁଥିଲେ ସୁଦ୍ଧା ସେତୁର
ମରାମତି ନାଁରେ ଚାଲିଛି ପ୍ରହସନ।
ଦୁର୍ଘଟଣାକୁ ନିମନ୍ତ୍ରଣ କରୁଛି ନିମ୍ନମାନର ନିର୍ମାଣ
 ପ୍ରତି ତିନି ଚାରି ମାସରେ ଥରେ ଏଠାରେ ମରାମତି କାମ କରାଯାଉଛି, କିନ୍ତୁ ନିମ୍ନମାନର ସାମଗ୍ରୀ ବ୍ୟବହାର ଯୋଗୁଁ ଅଳ୍ପ
କିଛି ଦିନରେ ରାସ୍ତା ପୁଣି ପୂର୍ବ ଅବସ୍ଥାକୁ ଫେରିଆସୁଛି। ରାସ୍ତାର ଦୁର୍ଦ୍ଦଶା ସହିତ ଓଭରବ୍ରିଜ ଉପରେ ଜମି ରହୁଥ‌ିବା ବାଲି ଅନ୍ୟ ଏକ ବିପଦ ସୃଷ୍ଟି କରୁଛି | ନିୟମିତ ସଫେଇ ଅଭାବରୁ ବାଲି ଉପରେ ଗାଡ଼ି ସ୍କ୍ରିପ୍ କରିବା ଭୟ ରହୁଛି I ବାରମ୍ବାର ମରାମତି ନାଁରେ ଅର୍ଥ ହରିଲୁଟ ହେଉଛି ଅଥଚ ସମସ୍ୟାର  ସମାଧାନ ହେଉନାହିଁ। ଉଭୟ ସେତୁ ଏବଂ ସଂଯୋଗକାରୀ ରାସ୍ତାର ଅବସ୍ଥା ଏବେ ଅତ୍ୟନ୍ତ ବିପଦଜନକ ହୋଇ ରହିଥିବାରୁ ଜାତୀୟ ରାଜପଥ କର୍ତ୍ତୃପକ୍ଷ ଏବଂ ବାଙ୍କୀ ପୂର୍ତ୍ତ ବିଭାଗ ତୁରନ୍ତ ଏଥିପ୍ରତି ଧ୍ୟାନ ଦେଇ ଏକ ସ୍ଥାୟୀ ମରାମତି କରିବାକୁ ସାଧାରଣରେ ଦୃଢ଼ ଦାବି ହେଉଛି।