05-Feb-2026

ବଲାଙ୍ଗିର(ପ୍ରେରଣା ଖବର)ସରକାରଙ୍କ ତୃଟିପୂର୍ଣ୍ଣ ଧାନକିଣା ବ୍ୟବସ୍ଥା ଯୋଗୁଁ ବଲାଙ୍ଗୀର ଜିଲ୍ଲା ଆଗଲପୁର ବ୍ଲକ ନଅଗାଁ (କ)ର ଜଣେ ଯୁବଚାଷି ବଳରାମ ପଧାନଙ୍କ ମୃତ୍ୟୁ ହୋଇଗଲା । ସୁଦୂର କେରଳରେ ଥିବା ତାଙ୍କର ଏକ ଅଚଳ ବ୍ୟାଙ୍କ ଆକାଉଣ୍ଟରେ ଧାନବିକ୍ରୀ ଟଙ୍କା ପଡିଲା ଓ ସେହି ଆକାଉଣ୍ଟକୁ ସଚଳ କରିବାକୁ କେରଳ ଯାଇ ବଳରାମଙ୍କର ମୃତ୍ୟୁ ହୋଇଗଲା । ରବିବାର ଦିନ ବଳରାମ ପଧାନଙ୍କର କେରଳରେ ମୃତ୍ୟୁ ହୋଇଥିବା ବେଳେ ଦୀର୍ଘ ୪ଦିନ ପରେ ଆଜି ରାତି ୮.୩୦ରେ ଗାଁକୁ ପହଞ୍ଚିଛି । ସବୁଠାରୁ ବିଡମ୍ବନାର ବିଷୟ ହେଲା ନଅଗାଁ(କ) ହେଉଛି ଲୋଇସିଂହା ନିର୍ବାଚନମଣ୍ଡଳି ଅନ୍ତର୍ଗତ ଆଗଲପୁର ବ୍ଲକ ଓ ରାଜ୍ୟର ସ୍ୱାସ୍ଥ୍ୟମନ୍ତ୍ରୀ ଡ.ମୁକେଶ ମହାଲିଙ୍ଗଙ୍କ ନିର୍ବାଚନମଣ୍ଡଳିର । ଜଣେ ଯୁବଚାଷିଙ୍କ ଅକାଳରେ ମୃତ୍ୟୁବରଣ କରିଥିବାରୁ ଆଗଲପୁର ବ୍ଲକଅଞ୍ଚଳରେ ଶୋକର ଛାୟା ଖେଳିଗଲା । କିନ୍ତୁ ନିଜନିର୍ବାଚନମଣ୍ଡଳିର ଜଣେ ଚାଷିର ମୃତ୍ୟୁରେ ସ୍ୱାସ୍ଥ୍ୟମନ୍ତ୍ରୀ କୌଣସି ପ୍ରକାର ସହଯୋଗ କରିନଥିବାରୁ ତାଙ୍କର ସମ୍ବେଦନହୀନତାକୁ ନେଇ ବିଭିନ୍ନ ମହଲରେ ସମାଲୋଚନା ହେଉଛି । ଯେଉଁ ଭୋଟରଙ୍କ ଭୋଟପାଇ ସେ ଆଜି ମନ୍ତ୍ରୀ ହୋଇଛନ୍ତି ସେହି ଚାଷିଭୋଟରଙ୍କ ଅସମୟରେ ସମବେଦନା ଜଣାଇ ସହଯୋଗର ହାତଟିଏ ବଢାଇ ପାରୁନାହାଁନ୍ତି ବୋଲି ଅଭିଯୋଗ ହେଉଛି । ଯେଉଁଦିନ ଚାଷି ବଳରାମଙ୍କ କେରଳରେ ମୃତ୍ୟୁହେଲା ତାଙ୍କର କିଛି ସମର୍ଥକ କହିଲେ ମନ୍ତ୍ରୀ ହସ୍ତକ୍ଷେପ କରୁଛନ୍ତି ଖୁବଶୀଘ୍ର ଶବର ପୋଷ୍ଟମର୍ଟମ କରାଯାଇ ଶବକୁ ଅଣାଯିବ । କିନ୍ତୁ ମନ୍ତ୍ରୀଙ୍କୁ ଭରସା କରି ଦୁଇଦିନ ଚାଲିଗଲା । ସେ କୌଣସି ପଦକ୍ଷେପ ନେଲେ ନାହିଁ । ଶେଷରେ ତାଙ୍କର ସମ୍ପର୍କିୟମାନେ ଆସି ସୋମବାରଦିନ ଜିଲ୍ଲାପରିଷଦ ସଭାପତି ଦେବକୀ ସାହୁଙ୍କ ସହିତ ବଲାଙ୍ଗୀର ଜିଲ୍ଲାପାଳ ଓ ଏସପିଙ୍କୁ ଭେଟି ଘଟଣା ବିଷୟରେ ଅଭିଯୋଗ କରି ଶବ ଆଣିବାରେ ସାହାର୍ଯ୍ୟ କରିବାକୁ ଗୁହାରିକଲେ । ବଲାଙ୍ଗୀର ଜିଲ୍ଲାପାଳ ଓ ଏସପିଙ୍କ ନିର୍ଦ୍ଦେଶରେ  ଗ୍ରାମବିକାଶ ନାମକ ଏକ ସ୍ୱେଚ୍ଛାସେବୀ ସଂଗଠନର କର୍ମକର୍ତ୍ତା କେରଳରେ ପୋଲିସ ଡାକି ଇନକ୍ୱେଷ୍ଟ କରାଇ ଶବର ବ୍ୟବଚ୍ଛେଦ କରାଇଲେ । ମଙ୍ଗଳବାର ଦିନ ସକାଳୁ ପୋଷ୍ଟମର୍ଟମ ହେଲା । ହେଲେ ଶବ ଆସିବ କେମିତି ? ଏୟାରଲିଫ୍ଟରେ ଅଣାଯିବାକୁ କଥାଉଠିଲା । କିନ୍ତୁ ଏୟାର ଟିକେଟର ଦାମ ଅଧିକ ଥିଲା ଓ ବଳରାମଙ୍କ ସାଙ୍ଗରେ ଯେଉଁ ଯୁବକ ଥିଲେ ତାଙ୍କ ପାଖରେ ଅର୍ଥ ନଥିଲା । ଶେଷରେ ଜିଲ୍ଲାପରିଷଦ ସଭାପତି ଦେବକୀ ସାହୁଙ୍କ ସମେତ ମୃତ ବଳରାମଙ୍କର ଜଣେ ସମ୍ପର୍କିୟ ପୁତୁରା ତଥା ଭିଣୋଇଙ୍କ ଟଙ୍କାରେ ବଳରାମଙ୍କ ଶବକୁ କୋଚୀରୁ ଭୁବନେଶ୍ୱର ପର୍ଯ୍ୟନ୍ତ ଏୟାରଲିଫ୍ଟ କରାଯାଇ ଅଣାଗଲା । ଭୁବନେଶ୍ୱରରୁ ବଲାଙ୍ଗୀର ଜିଲ୍ଲାର ନଅଗାଁ(କ)କୁ ଏକ ମହାପ୍ରୟାଣ ଗାଡିରେ ଶବକୁ ଅଣାଯାଇ ବୁଧବାର ରାତିରେ ଗ୍ରାମବାସୀ ତଥା ବନ୍ଧୁପରିଜନଙ୍କ ଉପସ୍ଥିତିରେ ଶବସତ୍କାର କରାଗଲା । କିନ୍ତୁ ବିଡମ୍ବନାର ବିଷୟ ଯେ,ବୁଧବାର ଦିନବେଳା ନିଜେ ସ୍ୱାସ୍ଥ୍ୟମନ୍ତ୍ରୀ ଡ.ମୁକେଶ ମହାଲିଙ୍ଗ ତାଙ୍କ ସୋସିଆଲ ମିଡିଆ ଫେସବୁକରେ ପୋଷ୍ଟକଲେ ଯେ,ମୁଖ୍ୟମନ୍ତ୍ରୀଙ୍କ ସହଯୋଗରେ ଶବକୁ ଏୟାରଲିଫ୍ଟରେ କେରଳରୁ ଓଡିଶାକୁ ଅଣାଯାଇ ତାଙ୍କ ପରିବାରକୁ ହସ୍ତାନ୍ତର କରାଯାଇଛି । ଏହି ଘଟଣାକୁ ନେଇ ଆଗଲପୁର ବ୍ଲକ ଅଞ୍ଚଳରେ ମନ୍ତ୍ରୀଙ୍କ ସୋସିଆଲ ମିଡିଆ ପୋଷ୍ଟକୁ ନେଇ ତୀବ୍ର ପ୍ରତିକ୍ରୀୟା ପ୍ରକାଶ ପାଉଛି । ଏବେ ପ୍ରଶ୍ନଉଠୁଛି ମୁଖ୍ୟମନ୍ତ୍ରୀଙ୍କ ସହାୟତାରେ ମୃତଚାଷିର ଶବର ଏୟାରଲିଫ୍ଟ ହେଲା ନା ତାଙ୍କ ପରିବାର ଓ ହିତାକାଂକ୍ଷୀଙ୍କ ସହାୟତା ଅର୍ଥରେ ଆସିଲା ? ମନ୍ତ୍ରୀଙ୍କର ଏଭଳି ଦାୟିତ୍ୱହୀନ ପୋଷ୍ଟକୁ ନେଇ ଜିଲ୍ଲାପରିଷଦ ସଭାପତି ଦେବକୀ ସାହୁ ତୀବ୍ର ପ୍ରତିକ୍ରୀୟା ପ୍ରକାଶ କରି ସମାଲୋଚନା କରିଛନ୍ତି । ସରକାରୀ ବ୍ୟବସ୍ଥାରେ ତୃଟି ଓ ପରେ ଶବ ଅଣାଯିବାରେ ଅବହେଳାକୁ ସେ ତୀବ୍ର ସମାଲୋଚନା କରିଛନ୍ତି । ତେବେ ଶବକୁ ଅଣାଗଲା ପରେ ଆଜି ଜିଲ୍ଲାପ୍ରଶାସନ ପକ୍ଷରୁ ବଳରାମଙ୍କ ପରିବାରକୁ ରେଡକ୍ରସ ପାଣ୍ଠିରୁ ୩୦ହଜାର ଟଙ୍କାର ସହାୟତା ପ୍ରଦାନ କରାଯାଇଛି । ଖୋଦ ସ୍ୱାସ୍ଥ୍ୟମନ୍ତ୍ରୀଙ୍କର ନିଜ ନିର୍ବାଚନମଣ୍ଡଳିର ଜଣେ ଯୁବ ଚାଷି ମୃତ୍ୟୁବରଣ କଲା ଅଥଚ ତାଙ୍କର କୌଣସି ଜଣେ ପ୍ରତିନିଧି ମଧ୍ୟ ଆଜି ଶବସତ୍କାରରେ ଉପସ୍ଥିତ ନଥିଲେ । ଏବେ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ମୃତ ଚାଷିଙ୍କ ପରିବାରକୁ ୪ଲକ୍ଷ ଟଙ୍କାର ସହାୟତା ରାଶି ପ୍ରଦାନ କରିବାକୁ ବଳରାମଙ୍କ ପରିବାର ତଥା ଜିଲ୍ଲାପରିଷଦ ସଭାପତି ଦେବକୀ ସାହୁ ଦାବି କରିଛନ୍ତି ।