09-Dec-2025

ଅତାବିରା/ରେଙ୍ଗାଲିକ୍ୟାମ୍ପ,(ଆକାଶ ମିଶ୍ର): ଧାନର ଅଭାବି ବିକ୍ରି ପ୍ରତିବାଦରେ ଆସନ୍ତା କାଲି ରୁ ଯେ କୌଣସି ମୁହୁର୍ତ୍ତରେ ଜାତୀୟ ରାଜପଥକୁ ଓହ୍ଲାଇବେ ଚାଷୀ। ଅତାବିରାରୁ ଗୋଡ଼ଭଗା ଭିତରେ ଧାନ ବସ୍ତା ସହ ଏହି ଆନ୍ଦୋଳନ କରାଯିବ ବୋଲି ଓଡ଼ିଶା ରାଜ୍ୟ କୃଷକ ସଂଗଠନ ପକ୍ଷରୁ ଗୋଡ଼ଭଗାରେ ଅନୁଷ୍ଠିତ ଚାଷୀ ସମାବେଶରେ ଏହି ନିଷ୍ପତ୍ତି ହୋଇଛି। ସଂଗଠନର ଅତାବିରା ବ୍ଳକ ସଭାପତି ବୀରେନ୍ଦ୍ର କରଙ୍କ ସଭାପତିତ୍ବରେ ଅନୁଷ୍ଠିତ ସଭାରେ ଅତାବିରା ନିୟନ୍ତ୍ରିତ ବଜାର କମିଟି ଅଧିନସ୍ଥ ବିଭିନ୍ନ ମାିର୍କେଟ୍ ୟାର୍ଡରୁ ଶତାଧିକ ଚାଷୀ ଆସିଥିଲେ। ବିଗତ ଖରିଫ ଫସଲରେ ନଭେମ୍ବର ୧୦ ତାରିଖରୁ ମଣ୍ଡି ଖୋଲି ଡ଼ିସେମ୍ବର ବେଳକୁ ଧାନସଂଗ୍ରହ ଚରମ ସୀମା ଥାଏ, ଡ଼ିସେମ୍ବରରେ ଧାନ ସଂଗ୍ରହ ଶେଷ ହୋଇଥାଏ। କିନ୍ତୁ ଚଳିତ ବର୍ଷ ଡ଼ିସେମ୍ବରର ୮ ଦିନ ବିତି ଗଲାଣି। ଧାନ ସଂଗ୍ରହ ନାମକୁ ମାତ୍ର ହୋଇଛି। କେତେକ ମଣ୍ଡରେ ଧାନ ବିକ୍ରି ଆରମ୍ଭ ହୋଇନାହିଁ। ମାସେ ପରେ ଜାନୁଆରି ମକର ସଂକ୍ରାନ୍ତି ପରେ ହୀରାକୁଦ ସେଚାଂଚଳରେ ରବି ଫସଲ ପାଇଁ ଧାନ ରୁଆ ଆରମ୍ଭ ହୋଥାଏ। ଜାନୁଆରି ପହିଲାରୁ ଆଗାମୀ ଫସଲ ପାଇଁ ପ୍ରସ୍ତୁତ ହୋଇଥାଏ। କିନ୍ତୁ ଚଳିତ ବର୍ଷ ଧାନ ସଂଗ୍ରହରେ ଅଚଳାବସ୍ଥା, ମନ୍ଥରତା ନେଇ ଚାଷୀଙ୍କ ମଧ୍ୟରେ ବିଭିନ୍ନ ଦ୍ବନ୍ଦ, ଭାଲେଣି ପଡ଼ିଗଲାଣି। ବହୁ ଲୋକଙ୍କ ଟୋକନ୍ ଏ ପର୍ଯ୍ୟନ୍ତ ଆସି ନାହିଁ। ଟୋକନ କେବେ ଆସିବ କି ନାହିଁ ଚାଷୀ, ପ୍ୟାକ୍ସ କର୍ମଚାରୀ ମଧ୍ୟରେ କିଛି ସୂଚନା ନାହିଁ। ଧାନ ବିକ୍ରି ସମସ୍ୟା ନେଇ ଓଡ଼ିଶା ରାଜ୍ୟ କୃଷକ ସଂଗଠନ ଜିଲ୍ଲାପ୍ରଶାସନ ସହ ବହୁବାର ଆଲୋଚନା କରିଥିଲେ। କିନ୍ତୁ ଧାନ ସଂଗ୍ରହରେ କିଛି ସୁଧାର ନ ହେବାରୁ, ପ୍ରଶାସନର ଦିନ ପରେ ଦିନ ଗଡ଼ାଇବାରୁ ଶେଷରେ ଆଗାମୀ ଦିନରେ ରାଜପଥକୁ ଓହ୍ଲାଇବାର ନିଷ୍ପତ୍ତି ନିଆଯାଇଥିବା ସଗଂଠନ ପକ୍ଷରୁ କୁହାଯାଇଛି। କିଛି ମଣ୍ଡିରେ ନାମକୁ ମାତ୍ର ଧାନ ଉଠୁଥିବା ବେଳେ ଏଠାରେ ବିତିତ୍ର ଦୃଶ୍ୟ

ଦେଖିବାକୁ ମିଳୁଛି। ମଣ୍ଡିରୁ ମିଲ୍ ପଏଣ୍ଟକୁ ଧାନ ନେବା ଖର୍ଚ୍ଚ ଚାଷୀ ବୋହି ଓ ମିଲ୍ ପଏଣ୍ଟରେ କଟନିଛଟନି ହେବ ବୋଲି କିଛି ମିଲରର ଏଜେଣ୍ଟ କହୁଥିବା ଚାଷୀମାନେ ଅଭିଯୋଗ ଆଣିଛନ୍ତି। ସୋମବାର ଗୋଡ଼ଭଗା ମଣ୍ଡିରେ ହୋଇଥିବା ଚାଷୀ ବୈଠକରେ ଚାଷୀଙ୍କ ରୋଷ ଚରମ ସୀମାକୁ ପହଂଚିଯାଇଥିବା ଦେଖିବାକୁ ମିଳିଥିଲା। ଚାଷୀଙ୍କ ସହନଶୀଳତା ପରୀକ୍ଷା ସରକାର ନେଉଛନ୍ତି। ଧାନର ଅଭାବିବକ୍ରି ପ୍ରତିବାଦରେ ଆଗାମୀ କାଲିରୁ ଯେକୌଣସି ସମୟରେ ଉଚିତ ଜବାବ ଦେବେ ବୋଲି ଚାଷୀ ଓ ସଂଗଠନ ଚେତାଇ ଦେଇଛି।