27-Nov-2025

ବଲାଙ୍ଗୀର(ପ୍ରେରଣା ଖବର)-ସୁବର୍ଣ୍ଣପୁର ଜିଲ୍ଲା ଖଲିଆପାଲି ସ୍ଥିତ ସନ୍ଥକବି ଭୀମଭୋଇଙ୍କ ସମାଧିପୀଠର ବିକାଶ ପାଇଁ ଜିଲ୍ଲାପ୍ରଶାସନ ତତ୍ପର ହୋଇଛି । ଗତ ଅଗଷ୍ଟ ୧୫ ତାରିଖଦିନ ରାଜ୍ୟ ଭାଷା,ସାହିତ୍ୟ,ସଂସ୍କୃତି ଓ ଉଚ୍ଚଶିକ୍ଷା ବିଭାଗର ମନ୍ତ୍ରୀ ସୁରଜ ସୂର୍ଯ୍ୟବଂଶୀଙ୍କ ଖଲିଆପାଲି ପରିଦର୍ଶନ ସମୟରେ ଏହି ପୀଠର ବିକାଶ ପାଇଁ ପ୍ରତିଶୃତି ଦେଇଥିଲେ । ରାଜ୍ୟସରକାର ଙ୍କ ନିର୍ଦ୍ଦେଶରେ ସୁବର୍ଣ୍ଣପୁର ଜିଲ୍ଲାପାଳ ଡ,ନୃପରାଜ ସାହୁ ଏବେ ଏହି ପୀଠର ବିକାଶ ପାଇଁ ପ୍ରସ୍ତୁତି ଚଳାଇଛନ୍ତି । ଭୁବନେଶ୍ୱରରୁ ଏକ ଆର୍କିଟେକ୍ଟ ଦଳକୁ ଡକାଇ କିଭଳି ବିକାଶ କାମ କରାଯାଇପାରିବ ସେନେଇ ପ୍ରସ୍ତୁତି ଚଳାଇଛନ୍ତି । ଆଜି ନିଜେ ଜିଲ୍ଲାପାଳ ଡ.ସାହୁ ସୁବର୍ଣ୍ଣପୁର ପୂର୍ତ୍ତବିଭାଗର ଅଧିକ୍ଷଣ ଯନ୍ତ୍ରୀ ଇଂ.ବିଜନକୁମାର ଜେନାଙ୍କ ସହିତ ଏହି ଟେକ୍ନିକାଲ ଟିମକୁ ନେଇ ସମାଧିପୀଠ ପରିଦର୍ଶନ କରିଛନ୍ତି । ଏହି ଟିମ ସନ୍ଥକବିଙ୍କ ସମାଧିପୀଠ ସମେତ ଗ୍ରାମର କିଛିଅଞ୍ଚଳ ମଧ୍ୟ ବୁଲି ଦେଖିଛନ୍ତି । ଏହି ପର୍ଯ୍ୟଟନସ୍ଥଳୀରେ ପର୍ଯ୍ୟଟକମାନଙ୍କ ସୁବିଧା ପାଇଁ ପାନ୍ଥନୀବାସ,ମହିମାସାଧୁଙ୍କ ପାଇଁ ଧୂନୀମନ୍ଦିର ଓ ଆଶ୍ରୟ ସ୍ଥଳୀ ତଥା ଅନ୍ୟାନ୍ୟ ଆନୁଷଙ୍ଗିକ ବ୍ୟବସ୍ଥା କରାଇବାକୁ ଡିପିଆର ପ୍ରସ୍ତୁତ ଚାଲିଛି । ଜିଲ୍ଲାପାଳଙ୍କ ସହିତ ଏହି ଟିମର ପରିଦର୍ଶନ ସମୟରେ ଭୀମଭୋଇ ସମାଧି ପୀଠର ମୁଖ୍ୟ ପରିଚାଳକ ସନ୍ୟାସୀ ବାବା, ଟ୍ରଷ୍ଟର ମେନେଜିଂ ଟ୍ରଷ୍ଟି ଛତ୍ରଧାରୀ ଅଗ୍ରୱାଲ,ସଂପାଦକ ଜନ୍ମେଜୟ ସ୍ୱାଇଁ ତଥା ଅନ୍ୟାନ୍ୟ ଟ୍ରଷ୍ଟ ସଭ୍ୟମାନେ ଉପସ୍ଥିତ ଥିଲେ । ପ୍ରକାଶ ଯେ, ସୁବର୍ଣ୍ଣପୁର ଜିଲ୍ଲାର ଖଲିଆପାଲି ହେଉଛି ସନ୍ଥକବି ଭୀମ ଭୋଇଙ୍କର ସାଧନା,ସିଦ୍ଧି ଓ ସମାଧିପୀଠ। ସନ୍ଥକବି ଏଠାରେ ସାଧନାକରି ସିଦ୍ଧିଲାଭ କରିଥିଲେ ଓ ଶେଷରେ ସମାଧିସ୍ଥ ମଧ୍ୟ ହୋଇଥିଲେ । ୧୮୭୭ ମସିହାରୁ ସେ ଏଠାରେ ମହିମାଆଶ୍ରମ ସ୍ଥାପନ କରି ଜଗତ କଲ୍ୟାଣ ଉଦ୍ଦେଶ୍ୟରେ ମହିମାଡାକ ଦେଉଥିଲେ । ଜଗତ କଲ୍ୟାଣ ପାଇଁ ତାଙ୍କ ଲିଖିତ ମହାନବାଣୀଗୁଡିକ ଆଜି ସାରା ବିଶ୍ୱରେ ପ୍ରଚାରିତ ହେଉଛି । ତାଙ୍କର ସେହି ମହାନକୃତି ସ୍ତୁତିଚିନ୍ତାମଣୀର ମହାନବାଣୀ “ମୋ ଜୀବନପଛେ ନର୍କେପଡି ଥାଉ,ଜଗତ ଉଦ୍ଧାରହେଉ” ଏହି ପୀଠରୁ ଉଦଘୋଷିତ ହୋଇ ଥିଲା । ୧୮୯୫ ମସିହାରେ ସନ୍ଥକବୀଙ୍କର ମହାପ୍ରୟାଣ ପରେ ତାଙ୍କ ଭକ୍ତମାନଙ୍କ ପକ୍ଷରୁ ଏକ ଭବ୍ୟମନ୍ଦିର ନିର୍ମାଣ କରାଯାଇ ତାଙ୍କୁ ଏଠାରେ ସମାଧିସ୍ଥ କରାଯାଇଥିଲା । ତେବେ ପ୍ରାୟ ୧୦୦ ବର୍ଷ ପର୍ଯ୍ୟନ୍ତ ଅବହେଳିତ ହୋଇ ଏହିପୀଠ ପଡିରହିବା ପରେ ୧୯୯୯ ମସିହାରେ ଭୀମଭୋଇ ସମାଧିପୀଠ ଟ୍ରଷ୍ଟ ଗଠନକରି ଜିଲ୍ଲାପ୍ରଶାସନର ଉଦ୍ୟମରେ ଏହି ପୀଠର ବିକାଶ ଆରମ୍ଭ ହୋଇଥିଲା । ଏବେ ଆଗକୁ ଏହାର ଆହୁରି ବିକାଶ ହେବାକୁ ଯାଉଛି ।