22-Oct-2025

ବିନିକା(ହିମାଂଶୁ ଶେଖର ପୁଟେଲ) ସୁବର୍ଣ୍ଣପୁର ଜିଲ୍ଲା ବିନିକା ଏନଏସି ଅନ୍ତର୍ଗତ ଉଲ୍ଲେ ଗ୍ରାମର ସମ୍ମାନିତ ଓ ଜନପ୍ରିୟ ଅବସରପ୍ରାପ୍ତ ଶିକ୍ଷକ କୁନୁ ପଣ୍ଡାଙ୍କ(୮୪) ଆଜି ବାର୍ଦ୍ଧକ୍ୟ ଜନିତ ରୋଗରେ ଦେହାବସାନ ଘଟିଛି।ଖବର ପ୍ରଚାରିତ ହେବାମାତ୍ରେ ସମଗ୍ର ବିନିକା  ଅଞ୍ଚଳରେ ଶୋକର ଛାୟା ଖେଳିଯାଇଛି।ଶ୍ରୀକୁନୁ ପଣ୍ଡାଙ୍କ ଜନ୍ମ ୧ ଜାନୁଆରୀ ୧୯୪୨ରେ ହୋଇଥିଲା। ସେ ତାଙ୍କ ଜୀବନର ବଡ଼ ଅଂଶ ଶିକ୍ଷାକ୍ଷେତ୍ରକୁ ଉପହାର ଦେଇଥିଲେ।ପ୍ରକାଶ ଥାଉକି ଏହି ବ୍ଲକ ଅନ୍ତର୍ଗତ ତୁଲୁଣ୍ଡୁପାଲି,ଚରଦା, ଫୁଲମୁଠୀ,ମଉଳିମାଲ,ଅନ୍ତର୍ଡ଼ା ଓ ବାବୁପାଲି ଅଞ୍ଚଳରେ ଶିକ୍ଷକ ଭାବେ କାର୍ଯ୍ୟରତ ରହି ସମସ୍ତଙ୍କ ପ୍ରିୟ ହୋଇଥିଲେ । ତାଙ୍କ ନିଷ୍ଠା, ପଡେଇବାର ଦକ୍ଷତା,ସେବା ଓ ଉପଦେଶ ଅନେକ ଛାତ୍ରଛାତ୍ରୀଙ୍କ ଭବିଷ୍ୟତ ଜୀବନ ଗଢ଼ିବାରେ ପ୍ରମୁଖ ଭୂମିକା ନେଇଥିଲେ। ସେହିପରି ନିଜସ୍ଵ ଉଦ୍ୟମରେ ଦୀର୍ଘ ୪୦ବର୍ଷରୁ ଉର୍ଦ୍ଧ୍ବ ସମୟ ଧରି ଭାଗବତ ପାଠ କରି ଭାଗବତ କୋଠୀ ପରିଚାଳନା କରି ଆସୁଥିଲେ । ଆଧ୍ୟାତ୍ମିକ ମାର୍ଗ ନେଇ ଯାହାକି ଆଜି ବି ତାହା ସମସ୍ତଙ୍କ ସାକ୍ଷୀ ହୋଇରହିଛି ।ସ୍ବର୍ଗତ 
କୁନୁଙ୍କ ମରଶରୀରକୁ ଏକ ଶୋଭାଯାତ୍ରାରେ ନିକଟ ପାପକ୍ଷୟ ଘାଟକୁ ନିଆଯାଇଥିଲା ।ସେଠାରେ ବଡ଼ପୁଅ ଅରୁଣ ପଣ୍ଡା ମୁଖାଗ୍ନି ଦେଇଥିଲେ। ତାଙ୍କ ପରିବାର କହିଲେ ସ୍ତ୍ରୀ,ସାନପୁଅ ଅର୍ଜୁନ ପଣ୍ଡା, ପୁତ୍ରବଧୂ,ନାତି ଓ ନାତୁଣୀ ଅଛନ୍ତି।
ତାଙ୍କ ଦେହାବସାନରେ ସମଗ୍ର ଅଞ୍ଚଳରେ ଶୋକର ଛାୟା ଖେଳି ଯାଇଥିବାବେଳେ ସ୍ଥାନୀୟ ଲୋକେ ଓ ପୂର୍ବତନ ଶିଷ୍ୟମାନେ ତାଙ୍କ ପରିବାରଙ୍କୁ ସାନ୍ତ୍ୱନା ଜଣାଇଛନ୍ତି ଓ ତାଙ୍କ ଆତ୍ମାର ଶାନ୍ତି ପାଇଁ ପ୍ରାର୍ଥନା କରିଛନ୍ତି।