13-Aug-2025

(ଅନୀଲ କୁମାର ତ୍ରିପାଠୀ)
ବଲାଙ୍ଗିର ଜିଲ୍ଲା ବଙ୍ଗୋମୁଣ୍ଡା ବ୍ଲକ ସିନ୍ଧେକେଲା ଅଞ୍ଚଳର ବରିଷ୍ଠ ବିଜେଡି ନେତା ଉମାକାନ୍ତ ସାହୁଙ୍କ ହଠାତ ପରଲୋକ ଶୁଣି ସମଗ୍ର ଅଞ୍ଚଳରେ ଗଭୀର ଶୋକର ଛାୟା ପ୍ରସାରିତ ହୋଇଛି । କିଛିଦିନ ପୂର୍ବରୁ ତାଙ୍କର ମା’ଙ୍କ ମୃତ୍ୟୁ ଘଟି ଆଜି ମଙ୍ଗଳବାର ଦଶାହ କାର୍ଯ୍ୟ  ଥିବା ବେଳେ ଗତକାଲି ସୋମବାର ବିଳମ୍ବିତ ରାତିରେ ତାଙ୍କର ହଠାତ ଦେହାବସାନ ଖବର ଲୋକମାନଙ୍କ ମନକୁ ଅତ୍ୟନ୍ତ ବିଷଣ୍ଣ କରିଦେଇଛି । ଶ୍ରୀ ସାହୁ ବିଗତ ମାସରେ ହୃଦଘାତ ରୋଗର ଅସ୍ତ୍ରୋପଚାର କରି ସୁସ୍ଥ ହୋଇ ଘରକୁ ଫେରିଥିଲେ । ଗତକାଲି ରାତିରେ ତାଙ୍କ ରକ୍ତଚାପ ନିମ୍ନ ହେବାରୁ ତାଙ୍କୁ ରାୟପୁର ନିଆ ଯାଉଥିବା ବେଳେ ରାସ୍ତାରେ ସେ ଶେଷ ନିଶ୍ୱାସ ତ୍ୟାଗ କରିଥିଲେ । ଉମାକାନ୍ତ ସାହୁ ବିଜେଡିରେ ଦୀର୍ଘଦିନ ଧରି ସକ୍ରିୟ ଓ ଦୃଢ଼ତା ର ସହିତ କାମ କରୁଥିଲେ । ସେ ପୂର୍ବରୁ ବିଧାୟକ , ରାଜ୍ୟସଭା ଓ ଲୋକସଭା ସାଂସଦଙ୍କ ପ୍ରତିନିଧି ଭାବେ କାମ କରିଥିଲେ ଏବଂ ବଲାଙ୍ଗିର ଜିଲ୍ଲା ବିଜେଡିର ଉପସଭାପତି ପଦରେ ମଧ୍ୟ ଦୀର୍ଘ ସମୟ ଧରି କାର୍ଯ୍ୟଭାର ତୁଲାଇ ଆସିଥିଲେ । ସେ ଅଞ୍ଚଳର ଅନେକ ସାମାଜିକ, ସାଂସ୍କୃତିକ ଓ ବିକାଶମୂଳକ କାର୍ଯ୍ୟରେ ଅଗ୍ରଣୀ ଭୂମିକା ନିଭାଉଥିଲେ ।ବିଶେଷକରି ସେ ଗ୍ରାମ୍ୟ ସ୍ତରରେ ଲୋକଙ୍କ ସମସ୍ୟା ନିବାରଣ ରେ ସବୁବେଳେ ଚେଷ୍ଟାରତ ଥିଲେ । ତାଙ୍କର ନେତୃତ୍ୱ ଓ ସମର୍ପଣରେ ବିଜେଡିର ସ୍ଥାନୀୟ ସଂଗଠନ ଶକ୍ତିଶାଳୀ ହୋଇ ପାରିଥିଲା। ଆଜି ମଙ୍ଗଳବାର ଗାଁ ଶ୍ମଶାନ ଘାଟରେ ତାଙ୍କ ଶେଷକୃତ୍ୟ କରାଯାଇଥିବା ବେଳେ ବଡ଼ ପୁଅ ସୁମିତ ସାହୁ ତାଙ୍କୁ ମୁଖାଗ୍ନି ଦେଇଥିଲେ । ଏହି ଅବସରରେ କଣ୍ଟାବାଞ୍ଜି ପୂର୍ବତନ ବିଧାୟକ ହାଜି ମହମ୍ମଦ ଆୟୁବ ଖାଁ , ଡା: ଅମଜତ ଖାଁ , ବରିଷ୍ଠ ବିଜେଡି ନେତା ଗିରିରାଜ ସିଂହ ମାଝୀ , ବିଜେଡି ରାଜ୍ୟ କାର୍ଯ୍ୟକାରିଣୀ ସଦସ୍ୟ ହଂସ ରାଜ୍ ଜୈନ , ବଲାଙ୍ଗୀର ଜିଲ୍ଲା ପରିଷଦ ଅଧ୍ୟକ୍ଷା ଦେବକୀ ସାହୁ , ଟିଟିଲାଗଡ଼ ବ୍ଲକ ସରପଞ୍ଚ ସଙ୍ଘ ସଭାପତି ବିରବର ସାହୁ , ବଙ୍ଗୋମୁଣ୍ଡା ସରପଞ୍ଚ ଅଜିତ ଯୋଶୀ , ବଙ୍ଗୋମୁଣ୍ଡା ପୂର୍ବତନ ଜିଲ୍ଲା ପରିଷଦ ସଦସ୍ୟ ଉଦ୍ଧବ ବେହେରା , ସିନ୍ଧେକେଲା ପୂର୍ବତନ ଜିଲ୍ଲା ପରିଷଦ ସଦସ୍ୟ ସନ୍ତୋଷ ନାଏକ , ଟିଟିଲାଗଡ଼ କଂଗ୍ରେସ ବିଧାୟକ ପ୍ରାର୍ଥୀ ବିରେନ୍ଦ୍ର ବାଗ , ଲୋକସଭା ସାଂସଦ ପ୍ରତିନିଧି ଅନିଲ ନାଏକ , ରାଜ୍ୟସଭା ସାଂସଦ ପ୍ରତିନିଧି ସୁବାଷ ଜୈନ , ସିନ୍ଧେକେଲା ସମିତି ସଭ୍ୟ ଭୋଲାନାଥ ବେହେରା , ସରପଞ୍ଚ ନରେଶ ଅଗ୍ରୱାଲ , ପୂର୍ବତନ ସରପଞ୍ଚ ରାଜେଶ ଜୈନ , ବିଜେଡି ବ୍ଲକ ସଭାପତି ଭକ୍ତ ବନ୍ଧୁ ବେହେରା ପ୍ରମୁଖଙ୍କ ସହ ବିଭିନ୍ନ ଦଳର ନେତାମାନେ ଅନ୍ତିମ ଯାତ୍ରାରେ ସାମିଲ ହୋଇଥିଲେ। ଅନ୍ୟ ମାନଙ୍କ ମଧ୍ୟରେ ବଲାଙ୍ଗୀର ଜିଲ୍ଲା ଓୟୁଜେ ଟ୍ରିବୁନାଲ ଅଧ୍ୟକ୍ଷ ଅନିଲ କୁମାର ତ୍ରିପାଠୀ, ସାମ୍ବାଦିକ ଦିନେଶ ଜୈନ, ସୁଶାନ୍ତ ଥନାପତୀ ପ୍ରମୁଖ ଶୋକ ବ୍ୟକ୍ତ କରିଛନ୍ତି।