18-Apr-2025

କର୍ଲାମୁଣ୍ଡା(ଜଗନ୍ନାଥ ନାଏକ): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ୍‌ ସମ୍ମିଳନୀ କକ୍ଷରେ ଗୁରୁବାର ନିରନ୍ତର ବିକାଶ ଲକ୍ଷ୍ୟ ସମ୍ପର୍କିତ ବ୍ଲକ୍‌ସ୍ତରୀୟ ତାଲିମ ଶିବିର ଅନୁଷ୍ଠିତ ହୋଇଯାଇଛି। ଏହି ତାଲିମ ଶିବିରରେ  ଶ୍ରୀକାନ୍ତ ଦଳେଇ,ଉପନିର୍ଦେଶକ, ଜିଲ୍ଲା ଯୋଜନା ଓ ପର୍ଯ୍ୟବେକ୍ଷଣ କାର୍ଯ୍ୟାଳୟ, କଳାହାଣ୍ଡି, କ୍ଷୁଦ୍ର ଯୋଜନା ଓ ଜୀବନ ଜୀବିକା  ବିଶେଷଜ୍ଞା ଡ. କୁମୁଦିନୀ ମିଶ୍ର ତାଲିମ ପ୍ରଦାନ କରିଥିଲେ  l  ବିଶେଷକରି ନିରନ୍ତର ବିକାଶର ଲକ୍ଷ୍ୟ, ଦାରିଦ୍ର୍ୟମୁକ୍ତ, କ୍ଷୁଧାମୁକ୍ତ, ସୁସ୍ଥ ଓ ନିରାମୟ ଜୀବନ, ଗୁଣାତ୍ମକ ଶିକ୍ଷା, ଲିଙ୍ଗଗତ ସମାନତା, ସ୍ଵଛ  ଜଳ ଓ ପରିମଳ, ସୁଲଭ ଓ ସ୍ବଚ୍ଛ ଶକ୍ତି, ମର୍ଯ୍ୟାଦାସମ୍ପନ୍ନ କାର୍ଯ୍ୟ ଓ ଅର୍ଥନୈତିକ ବିକାଶ, ଶିଳ୍ପ ଉଦ୍ଭାବନ ଓ ଭିତ୍ତିଭୂମି, ଅସମାନତା ହ୍ରାସ, ସହର ଓ ଜନ ସମୁଦାୟର ସ୍ଥାୟିତ୍ୱ, ଦୀର୍ଘସ୍ଥାୟୀ ଉତ୍ପାଦନ, ଜଳବାୟୁ ଭିତ୍ତିକ କାର୍ଯ୍ୟପନ୍ଥା, ଜଳ ଭିତରର ଜୀବନ, ସ୍ଥଳଭାଗରେ ଜୀବନ, ଲକ୍ଷ୍ୟ ହାସଲ ନିମନ୍ତେ ସହଭାଗିତାକୁ କିଭଳି ବିଭିନ୍ନ ବିଭାଗ, ଅନୁଷ୍ଠାନ ଜରିଆରେ ଯୋଜନା ପ୍ରସ୍ତୁତ କରି ସଫଳ କରାଯାଇପାରିବ ସେ ଦିଗରେ ତାଲିମ ପ୍ରଦାନ କରାଯାଇ ଥିଲା। ଏହି  ତାଲିମ ଶିବିର ରେ ଶ୍ରୀ ଦଳେଇ ନିରନ୍ତର ବିକାଶ ଲକ୍ଷ୍ୟ ର ଲୋକାଭିମୁଖୀ ଉପରେ ବିଶେଷ ଗୁରୁତ୍ୱ ଆରୋପ କରିଥିଲେ ଏବଂ ନିରନ୍ତର ବିକାଶ ଲକ୍ଷ୍ୟର ସୂଚକାଙ୍କ ଗୁଡିକୁ ଅଂଶଗ୍ରହଣକାରୀ ମାନଙ୍କୁ ପ୍ରାଞ୍ଜଳ ଭାବେ ବୁଝାଇଥିଲେ l 
ବ୍ଲକ୍‌ ଅଧ୍ୟକ୍ଷା, ଶ୍ରୀମତୀ  କୁନି ସାହୁ, ବ୍ଲକ୍‌ ଉପାଧ୍ୟକ୍ଷ ସୁରେନ୍ଦ୍ର ଭୋଇ, ଗୋଷ୍ଠୀ ଉନ୍ନୟନ ଅଧିକାରୀ , ଶ୍ରୀ ଦେବେନ୍ଦ୍ର କୁମାର ସାମଲ, ସୁରେଶ ଚୌଧୁରୀ ଓ ମହେନ୍ଦ୍ର ରଣା, ଜିଲା ପରିଷଦ ସଭ୍ୟ, ନରେନ୍ଦ୍ର ନାଏକ ଓ କାର୍ତ୍ତିକ ପଧାନ, ବରିଷ୍ଠ  ଅର୍ଥନୈତିକ ଅନୁସନ୍ଧାନକାରୀ ଜିଲ୍ଲା ଯୋଜନା, କଳାହାଣ୍ଡି, ପ୍ରମୁଖ ଯୋଗଦେଇଥିବା ଅଂଶଗ୍ରହଣକାରୀ ମାନଙ୍କୁ ଉତ୍ସାହିତ କରିଥିଲେ । ଏଥିରେ  ସମସ୍ତ ବ୍ଲକସ୍ତରୀୟ ବିଭାଗୀୟ ଅଧିକାରୀ ,ସରପଞ୍ଚ , ସମିତି ସଭ୍ୟ ଓ ସଭ୍ୟା ଏବଂ ଏନ୍‌ଜିଓ ଅଧିକାରୀ ଅଂଶଗ୍ରହଣ କରିଥିଲେ। କାର୍ଯ୍ୟକ୍ରମ ଜିଲା ପ୍ରଶାସନ ଓ ଜିଲ୍ଲା ଯୋଜନା ଓ ପର୍ଯ୍ୟବେକ୍ଷଣ କାର୍ଯ୍ୟାଳୟ, କଳାହାଣ୍ଡି, ର ମିଳିତ ଉଦ୍ୟମରେ ଅନୁଷ୍ଠିତ ହୋଇଥିଲା। ନରେନ୍ଦ୍ର ନାଏକ ପରିଶେଷରେ ଧନ୍ୟବାଦ ଅର୍ପଣ କରିଥିଲେ l