13-Mar-2025

ବରଗଡ଼:(ନିରଞ୍ଜନ ତ୍ରିପାଠୀ)- ବରଗଡ଼  ରାଣା ପ୍ରତାପ ସ୍କୁଲ ଠାରେ ସ୍ଥାନୀୟ ଭାରତୀ ଶିଶୁ ସାହିତ୍ୟ ସଂସଦ ଓ ଯୁଗୋପଯୋଗୀ ସୁବର୍ଣ୍ଣ ଦୀପ ପ୍ରକାଶନୀର ମିଳିତ ଆନୁକୁଲ୍ୟରେ ବିଶିଷ୍ଟ ଲେଖିକା ରାଧାରାଣୀ ପଟ୍ଟନାୟକଙ୍କ ରଚିତ ଅଷ୍ଟମ କବିତା ସଂକଳନ "ମୌସୁମୀ" ଉନ୍ମୋଚିତ  ହୋଇ ଯାଇଛି । ଭାରତୀ ଶିଶୁ ସାହିତ୍ୟ ସଂସଦର ସଭାନେତ୍ରୀ ଛାତ୍ରୀ ଧରିତ୍ରୀ ରାଉତଙ୍କ ଅଧ୍ୟକ୍ଷତାରେ ଅନୁଷ୍ଟିତ ଏହି ଉତ୍ସବରେ ସ୍ଵଭାବ  କବି ଗଙ୍ଗାଧର ମେହେରଙ୍କ ବଂଶଜ ବିଶିଷ୍ଟ ସାହିତ୍ୟକ ମନୋରଞ୍ଜନ ମେହେର ମୁଖ୍ୟ ଅତିଥି ଭାବେ ଯୋଗ ଦେଇ "ମୌସୁମୀ"  କବିତା ସଂକଳନ ପାଠକ ମାନଙ୍କ ମନରେ  ସାହିତ୍ୟର  ମୌସୁମୀ ସୃଷ୍ଟି କରୁ ବୋଲି କାମନା କରି ଏହି କବିତା ସଂକଳନର ପାଠକୀୟ ଆଦୃତି ବୃଦ୍ଧି ପାଉ ବୋଲି ଆଶା ପ୍ରକାଶ  କରିଥିଲେ । ଶିଶୁ ସାହିତ୍ୟ ସଂସଦ  ର ସମ୍ପାଦିକା ଛାତ୍ରୀ ଶାଲିନି ସା କାର୍ଯ୍ୟକ୍ରମକୁ ସଂଯୋଜନା କରିଥିବା ବେଳେ ସମ୍ମାନିତ ଅତିଥି ଭାବେ ଯୁଗୋପଯୋଗୀ ସୁବର୍ଣ୍ଣଦୀପ ପତ୍ରିକାର ସମ୍ପାଦକ ପ୍ରଦୀପ୍ତ କୁମାର ଭାନୁ ମହାନ୍ତି ପ୍ରଧାନ ଶିକ୍ଷକ ସୁଦୀପ କୁମାର ରଥ ଶିକ୍ଷକ ଗୋପବନ୍ଧୁ ପୁରୋହିତ ପ୍ରମୁଖ ଯୋଗ ଦେଇ ଏହି କବିତା ସଂକଳନର ସମୀକ୍ଷା କରିଥିଲେ । ଏହି ଅବସରରେ ଉପସ୍ଥିତ ଛାତ୍ର ଛାତ୍ରୀ "ମୌସୁମୀ " କବିତା ସଂକଳନର କବିତା ପାଠ କରିଥିବା ବେଳେ ସୁବର୍ଣ୍ଣ ଦୀପ ଓ ଭାରତୀ ଶିଶୁ ସାହିତ୍ୟ  ସଂସଦ ତରଫରୁ ଲେଖିକା  ରାଧାରାଣୀ ପଟ୍ଟନାୟକଙ୍କୁ ସମ୍ବର୍ଦ୍ଧିତ କରାଯାଇଥିଲା ।