16-Jun-2024

କଣ୍ଟାମାଳ, (ଜୟ କୁମାର ମହାରଣା )
 ଗତ ଶନିବାର ବିଳମ୍ବିତ ରାତ୍ରିରୁ ରବିବାର ମଧ୍ୟାହ୍ନ ପର୍ଯ୍ୟନ୍ତ କୌଣସି ସୂଚନା ନ ଥାଇ ସମ୍ପୂର୍ଣ୍ଣ ବିଦ୍ୟୁତ କାଟରେ ଅତିଷ୍ଠ କଣ୍ଟାମାଳବାସୀ  ଉତ୍ୟକ୍ତ ହୋଇ. ଆଜି ମନମୁଣ୍ଡା -ସିନ୍ଧୁଗୋରା 41ନମ୍ବର ରାଜ୍ୟ ରାଜପଥର ବିଦ୍ୟୁତ୍ ବିଭାଗ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛନ୍ତି  |  ଫଳରେ ରାସ୍ତାର ଉଭୟ ପାର୍ଶ୍ବରେ ଶହ ଶହ ଗାଡି ମୋଟର ଅଟକି ରହିଥିଲା | ବୌଦ୍ଧ ଜିଲ୍ଲା ମନମୁଣ୍ଡା ବିଦ୍ୟୁତ୍ ବିଭାଗ ଅଧୀନ କଣ୍ଟାମାଳ ଅଞ୍ଚଳରେ କ୍ରମାଗତ ଭାବରେ ଦୀର୍ଘ ଏକ ବର୍ଷରୁ ଉର୍ଦ୍ଧ୍ବ ହେବ ବିଦ୍ୟୁତ୍ ସମସ୍ୟା ଲାଗି ରହିଛି | ଗତକାଲି ରାତିରୁ କଣ୍ଟାମାଳ ଅଞ୍ଚଳରେ ବିଦ୍ୟୁତ ନ ଥିବା ବେଳେ ବାରମ୍ବାର କାର୍ଯ୍ୟାଳୟକୁ ଫୋନ୍ କରିଥିଲେ ମଧ୍ୟ କେହି ଶୁଣୁ ନାହାନ୍ତି | ଯାହା ଫଳରେ ଲୋକେ ଉତ୍ୟକ୍ତ ହୋଇ ରାଜ୍ୟ ରାଜପଥ କୁ ଅବରୋଧ କରିଥିଲେ | ଏ ନେଇ କଣ୍ଟାମାଳ ଅଞ୍ଚଳର ସହସ୍ରାଧିକ ବିଦ୍ୟୁତ୍ ଉପଭୋକ୍ତା ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିଲେ| ଏହାର ସମାଧାନ ନେଇ ଅନେକ ଥର ମନମୁଣ୍ଡା ସ୍ଥିତ ବିଦ୍ୟୁତ୍ କାର୍ଯ୍ୟାଳୟକୁ ଆସି ଉପଖଣ୍ଡ ଅଧିକାରୀ ଙ୍କୁ ସାକ୍ଷାତ କରି ଦାବିପତ୍ର ପ୍ରଦାନ କରିଛନ୍ତି | ହେଲେ ଆଜି ପର୍ଯ୍ୟନ୍ତ ଏହାର କୌଣସି ସମାଧାନ ହୋଇ ପାରି ନାହିଁ | ବିନା ସୂଚନାରେ ଅଘୋଷିତ ଭାବରେ ବିଦ୍ୟୁତ୍ କାଟ ଦେଉଥିବା ବେଳେ ସାଧାରଣ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି | ବାରମ୍ବାର ବିଦ୍ୟୁତ୍ ବିଭ୍ରାଟ ନେଇ ଅଭିଯୋଗ କଲେ ମଧ୍ୟ କେହି ଶୁଣୁ ନଥିବା ଅଞ୍ଚଳବାସୀ କହିଛନ୍ତି | ବିଦ୍ୟୁତ୍ ସମସ୍ୟା ସାଙ୍ଗକୁ ପ୍ରଚଣ୍ଡ ଖରା ଓ ଗୁଳୁଗୁଳି ଯୋଗୁଁ ଲୋକେ ତ୍ରାହି ତ୍ରାହି ଡାକୁଛନ୍ତି | ଅନ୍ୟପଟେ ପିଲା ମାନଙ୍କ ପାଠ ପଢାରେ ଅସୁବିଧା ହେଉଛି | ଏପରିକି ସାମାନ୍ୟ ବର୍ଷା କି ପବନ ହେଲେ ଦୀର୍ଘ ସମୟ ପର୍ଯ୍ୟନ୍ତ ବିଦ୍ୟୁତ୍ କାଟି ଦିଆ ଯାଉଥିବା ଅଭିଯୋଗ କରିଛନ୍ତି | ଦୀର୍ଘ ଏକ ବର୍ଷ ଧରି ଏହି ସମସ୍ୟା ଲାଗି ରହିଥିଲେ ସୁଦ୍ଧା ଏହାର କୌଣସି ସ୍ଥାୟୀ ସମାଧାନ କରା ଯାଉ ନାହିଁ | ଯାହା ଫଳରେ ବିଦ୍ୟୁତ୍ ନ ଥିବା ଯୋଗୁଁ ଚାଷୀ ମାନେ ଠିକ୍ ସମୟରେ ଜମିକୁ ପାଣି ମଡାଇ ପାରୁ ନାହାଁନ୍ତି | ଫଳରେ ଚାଷୀ ଫସଲ ନଷ୍ଟ ହେବା ସହ କ୍ଷତି ସହିବାକୁ ପଡୁଥିବା ଅଭିଯୋଗ କରିଛନ୍ତି | ବର୍ତମାନ ଯୁଗରେ ବିଦ୍ୟୁତ୍ ଲୋକଙ୍କ ଏକ ଅତ୍ୟାବଶ୍ୟକୀୟ ଜିନିଷ ହୋଇଥିବା ବେଳେ ଲୋକଙ୍କ ସୁବିଧା କୁ ଆଖି ଆଗରେ ରଖି ବିଦ୍ୟୁତ ସମସ୍ୟାର ସ୍ଥାୟୀ ସମାଧାନ କରିବାକୁ ଅଞ୍ଚଳବାସୀ ଦାବି କରିଛନ୍ତି | ସୁରକ୍ଷା ଦୃଷ୍ଟିରୁ କଣ୍ଟାମାଳ ପୋଲିସ ଘଟଣାସ୍ଥଳରେ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାଉଥିବା ବେଳେ ଘଟଣାର ଶାନ୍ତିପୂର୍ଣ୍ଣ ସମାଧାନ ପାଇଁ ପ୍ରୟାସ ଜାରି ରଖିଥିବା ଦେଖିବାକୁ ମିଳିଥିଲା  l  ସେହିପରି ବିଭାଗୀୟ ଅଧିକାରୀ ନ ଆସିଲେ ରାସ୍ତା ଅବରୋଧ ପ୍ରତ୍ୟାହାର ନକରିବା ନେଇ ବିକ୍ଷୋଭକାରୀ ନିଜ ଜିଦରେ ଅଡ଼ି ରହିଥିବା ଦେଖିବାକୁ ମିଳିଥିଲା |