27-May-2024

ବଲାଙ୍ଗିର(ପ୍ରେରଣା ଖବର ): ବଲାଙ୍ଗୀର ଜିଲ୍ଲାରେ ଚଳିତବର୍ଷ ମାଟ୍ରିକବୋର୍ଡ ପରୀକ୍ଷା ରେଜଲ୍ଟ ଆଶାନୁରୂପ ହୋଇନଥିବା ଜଣାଯାଇଛି । ରାଜ୍ୟର ୩୦ଟି ଜିଲ୍ଲା ମଧ୍ୟରେ ବଲାଙ୍ଗୀର ଜିଲ୍ଲା ତଳପଟୁ ୩ନମ୍ବର ରହିଛି । ଜିଲ୍ଲାର ପାସହାର ମାତ୍ର ୯୪.୩୯% ରହିଛି । ତେବେ ଏ୧ ଗ୍ରେଡରେ ଜିଲ୍ଲାର ୨୬ଜଣ ରହିଥିବା ବେଳେ ସେଥିରୁ ୨୧ଜଣ ଏକ  ନିର୍ଦ୍ଦିଷ୍ଟ ଘରୋଇ ସଂଗଠନର ସ୍କୁଲ ରହିଥିବା ବେଳେ ସରକାରୀ ସ୍କୁଲରୁ ମାତ୍ର ୫ଜଣ ଛାତ୍ରଛାତ୍ରୀ ରହିଛନ୍ତି । ଜିଲ୍ଲାର ସରକାରୀ ସ୍କୁଲଗୁଡିକର ସ୍ଥିତି ଦେଖିଲେ ଅବିଭାବକଙ୍କ ମଧ୍ୟରେ ନୈରାଶ୍ୟ ଖେଳିଯାଉଛି । ସରକାର ଅନେକଗୁଡିଏ ଯୋଜନା କରି ସରକାରୀ ସ୍କୁଲରେ ଶିକ୍ଷାର ମାନ ବଢାଇ କ୍ୱାଲିଟି ଏଜୁକେସନ ଦେବାକୁ କହୁଛନ୍ତି । କିନ୍ତୁ ଗ୍ରାଉଣ୍ଡଜିରୋରେ ତାହା ଫେଲ ମାରିଯାଉଛି । ଶିକ୍ଷାବିଭାଗ ସୂତ୍ରରୁ ମିଳିଥିବା ତଥ୍ୟରୁ ଜଣାଯାଇଛି ଯେ,ଚଳିତବର୍ଷ ୨୦୨୪ ମାଟ୍ରିକବୋର୍ଡରେ ଜିଲ୍ଲାର ୩୬୫ଟି ସ୍କୁଲର ୨୪ହଜାର୪୧୭ଜଣ ଛାତ୍ରଛାତ୍ରୀ ପଞ୍ଜିକୃତ ହୋଇଥିଲେ । ସେଥିରୁ ୨୩ହଜାର୭୪୧ଜଣ ପରୀକ୍ଷାର୍ଥି ପରୀକ୍ଷା ଦେଇଥିଲେ । ସେଥିରୁ ସମୁଦାୟ ୯୪.୩୯% ପରୀକ୍ଷାର୍ଥି ପାସ କରିଛନ୍ତି । ବଲାଙ୍ଗୀର ସହରର କଦମପଡା ସରସ୍ୱତୀ ଶିଶୁମନ୍ଦିରର ଛାତ୍ରୀ ସୋହାନୀ ନାଏକ ମୋଟ୯୪.୬୬ % ମାର୍କ ରଖି ଜିଲ୍ଲାର ଟପ୍ପର ହୋଇଛନ୍ତି । ବଲାଙ୍ଗୀର ଜିଲ୍ଲାର ବିଭିନ୍ନ ସରସ୍ୱତୀ ଶିଶୁବିଦ୍ୟାମନ୍ଦିରର ୨୦ଜଣ ଓ ବିଶ୍ୱାତ୍ମାବିଦ୍ୟାମନ୍ଦିରର ୧ଜଣ,ସରକାରୀ ବିଦ୍ୟାଳୟ ମଧ୍ୟରେ ଦେଓଗାଁ ଧଣ୍ଡାମାଳ ପଞ୍ଚାୟତ ହାଇସ୍କୁଲରୁ ୨ଜଣ ,ସଇଁତଳା ବଡମାଳ ହାଇସ୍କୁଲରୁ ୧ଜଣ,କୁଇକେଡା ରେଙ୍ଗାଲି ହାଇସ୍କୁଲରୁ ୧ଜଣ,ଟିଟିଲାଗଡ ମହେଶ୍ୱର ହିନ୍ଦିହାଇସ୍କୁଲରୁ ୧ଜଣ ଏ୧ ଗ୍ରେଡରେ ରହିଥିବା ଜଣାଯାଇଛି ।