27-May-2024

ବଲାଙ୍ଗୀର(ପ୍ରେରଣା ଖବର ): ସାହିତ୍ୟ,ସଂସ୍କୃତି ଓ କଳାର ମାଟି ମେଣ୍ଡାଗଡଜାତ ଅଞ୍ଚଳରେ ଶିକ୍ଷାର ବିକାଶ ହୋଇଛି । ଦିନେ ଏହି ଅଞ୍ଚଳରୁ ପାଠପଢିବା ପାଇଁ ବାହାର ସ୍କୁଲକଲେଜକୁ ଯିବାକୁ ପଡୁଥିଲା । କିନ୍ତୁ ଆଜି ମେଣ୍ଡା ହାଇସ୍କୁଲ ଓ କଲେଜର ପିଲା କମାଲ କରୁଛନ୍ତି । ମୁଖ୍ୟତଃ ଅଞ୍ଚଳର ଗରୀବ ଘରର ଝିଅ ଓ ଦଳିତବର୍ଗଙ୍କ ପାଇଁ ଅନୁଷ୍ଠାନ ଗୁଡିକ ବରଦାନ ସଦୃଶ ହୋଇଛି । ଚଳିତବର୍ଷ ମାଟ୍ରିକବୋର୍ଡ ପରୀକ୍ଷା ଓ ଯୁକ୍ତଦୁଇ କଳାରେ ଝିଅମାନେ ପୁଅମାନଙ୍କଠାରୁ ଆଗରେ ରହିଛନ୍ତି । ମେଣ୍ଡା ହାଇସ୍କୁଲର ଦଶମଶ୍ରେଣୀ ଛାତ୍ରୀ ସୁଲଗ୍ନା ଫରିକାର ମୋଟ ୫୪୦ ମାର୍କ(୯୦%) ରଖି ଅଞ୍ଚଳର ଗୌରବ ବଢାଇଛନ୍ତି । ସହରାଞ୍ଚଳରେ ଅନେକସ୍କୁଲରେ ସରକାରୀ ସ୍କୁଲରେ ଏ୧ ଗ୍ରେଡରେ ଜଣେ ମଧ୍ୟ ଛାତ୍ରଛାତ୍ରୀ ନଥିବା ବେଳେ ମେଣ୍ଡା ହାଇସ୍କୁଲରୁ ଗତବର୍ଷ ୩ଜଣ ଓ ଚଳିତବର୍ଷ ଜଣେ ଛାତ୍ରୀ ରହିଥିବାରୁ ଅଞ୍ଚଳବାସୀ ଖୁସିବ୍ୟକ୍ତ କରୁଛନ୍ତି । ଠିକ ସେହିପରି ଯୁକ୍ତଦୁଇ ବୋର୍ଡରେ ମହର୍ଷି ବୁଦ୍ଧରାମ ଜୁନିୟର କଲେଜର ସରଶ୍ୱତୀ ମେହେର-୪୯୦(୮୧.୬୭%) ମାର୍କ , ସୀମରନ ପଧାନ-୪୮୫(୮୦.୮୩%) ମାର୍କ ,ଝରଣା ବାଗ-୪୮୩(୮୦.୫୦%) ମାର୍କ ଓ ମୋନାଲିସା ମେର୍ଲି- ୪୭୬ (୭୯.୩୩%) ମାର୍କ ରଖି କଲେଜ ତଥା ଅଞ୍ଚଳର ଗୌରବ ବଢାଇଛନ୍ତି । କେବଳ ସେତକି ନୁହେଁ ଏମବିଆର ଜୁନିୟର କଲେଜର ୨୩ଜଣ ଛାତ୍ରଛାତ୍ରୀ ପ୍ରଥମ ଶ୍ରେଣୀ ଓ ୨୮ଜଣ ଛାତ୍ରଛାତ୍ରୀ ଦ୍ୱିତୀୟ ଶ୍ରେଣୀରେ ପାସ କରିଛନ୍ତି । ତେବେ ପୁଅଙ୍କଠାରୁ ଝିଅମାନେ ଅଧିକ ମାର୍କ ରଖିଛନ୍ତି ଓ ଶିକ୍ଷାନୁଷ୍ଠାନର ଗୌରବକୁ ବଢାଇଥିବାରୁ ଅଞ୍ଚଳରେ ଖୁସିର ମାହୋଲ ରହିଛି । ଛାତ୍ରୀମାନଙ୍କର ଏହି ସଫଳତା ପାଇଁ ପରୀକ୍ଷାର୍ଥି ,ତାଙ୍କ ସ୍କୁଲ ଓ କଲେଜର ଶିକ୍ଷକ/ଅଧ୍ୟାପକ ତଥା ଅଭିଭାବକମାନଙ୍କୁ ଅଞ୍ଚଳବାସୀ ଅଭିନନ୍ଦନ ଜଣାଇଛନ୍ତି । ପ୍ରକାଶ୍ୟ ଯେ,ମେଣ୍ଡାରେ ୧୮୮୭ ମସିହାରୁ ପ୍ରାଥମିକ ସ୍କୁଲ ରହିଥିଲା । ପରେ ସ୍ୱାଧିନତା ପରେ ୧୯୬୩ ମସିହାରେ ହାଇସ୍କୁଲ ଖୋଲିଥିଲା । ଏହା ପୂର୍ବରୁ ଏହି ଅଞ୍ଚଳର ଛାତ୍ରଛାତ୍ରୀ ତରଭା,ସୋନପୁର କିମ୍ବା ବଲାଙ୍ଗୀରକୁ ପାଠପଢିବାକୁ ଆସିବାକୁ ପଡୁଥିଲା । ହାଇସ୍କୁଲ ଆରମ୍ଭ ହେବା ପରେ ମେଣ୍ଡା ଅଞ୍ଚଳର ଶିକ୍ଷା,କ୍ରୀଡା ଓ ସଂସ୍କୃତି କ୍ଷେତ୍ରରେ ଦୃତ ବିକାଶ ହୋଇଥିଲା । କିନ୍ତୁ ତଥାପି ଉଚ୍ଚଶିକ୍ଷା ପାଇଁ ଏହି ଅଞ୍ଚଳରୁ ଛାତ୍ରଛାତ୍ରୀ ବାହାରକୁ ଯିବାକୁ ପଡୁଥିଲା । ଫଳରେ ଗରୀବ ଘରର ପିଲା ତଥା ମୁଖ୍ୟତଃ ଝିଅମାନଙ୍କ ପାଠପଢାରେ ଘୋର ସମସ୍ୟା ହେଉଥିଲା । ଝିଅମାନଙ୍କ ତଥା ଗରୀବ ଦଳିତବର୍ଗର ଛାତ୍ରଛାତ୍ରୀଙ୍କର ଉଚ୍ଚଶିକ୍ଷା ପାଇଁ ୧୯୯୪ ମସିହାରେ ମେଣ୍ଡାଠାରେ ମହର୍ଷି ବୁଦ୍ଧରାମ ମହାବିଦ୍ୟାଳୟ ଆରମ୍ଭ କରାଯାଇଥିଲା । ସେହିଦିନରୁ ପ୍ରତିବର୍ଷ ଶହଶହ ସଂଖ୍ୟାରେ ଛାତ୍ରଛାତ୍ରୀ ପାଠପଢି ଆଗକୁ ବଢୁଛନ୍ତି । ଏଠାରୁ ପାଠପଢି ବିଭିନ୍ନ ଚାକିରିରେ ସୁଯୋଗ ପାଇଛନ୍ତି ଓ ନିଜକୁ ସ୍ୱାବଲମ୍ବି କରିପାରିଛନ୍ତି । ପରେ ପରେ ଏକ ଡିଗ୍ରୀ କଲେଜ ମଧ୍ୟ ଖୋଲାଯାଇଛି । ପ୍ରଥମେ ସମ୍ବଲପୁର ବିଶ୍ୱବିଦ୍ୟାଳୟ ଓ ଏବେ ରାଜେନ୍ଦ୍ର ବିଶ୍ୱବିଦ୍ୟାଳୟ ଅନୁବନ୍ଧିତାରେ ଏହି କଲେଜ ପରିଚାଳିତ ହେଉଛି । ଡିଗ୍ରୀ କଲେଜରେ ମଧ୍ୟ ମୋଟ ଛାତ୍ରଛାତ୍ରୀଙ୍କ ମଧ୍ୟରୁ ୫୦% ଛାତ୍ରୀ ପାଠପଢୁଛନ୍ତି ଯାହାକି ଅଞ୍ଚଳବାସୀଙ୍କ ସ୍ୱପ୍ନକୁ ସାକାର କରୁଛି ।