18-Dec-2023

ବଲାଙ୍ଗୀର(ପ୍ରେରଣା ଖବର)-ବ୍ରହ୍ମକୁମାରୀ ଇଶ୍ୱରୀୟ ବିଶ୍ୱବିଦ୍ୟାଳୟ ପକ୍ଷରୁ ସର୍ବଭାରତୀୟ ସ୍ତରରେ ଏକ ଉନ୍ନତମାନର ସୁସ୍ଥସମାଜ ଗଠନ ପାଇଁ ଗଣମାଧ୍ୟମ ପ୍ରତିନିଧିଙ୍କୁ ସଚେତନତା କାର୍ଯ୍ୟକ୍ରମ କରାଯାଉଛି । ସେହିକ୍ରମରେ ଆଜି ବଲାଙ୍ଗୀର ଲାଲଟିକ୍ରାସ୍ଥିତ ବିଶ୍ୱ କଲ୍ଯାଣ ଭବନ ଠାରେ “ଆଧ୍ୟାତ୍ମିକତା ହେଉଛି ଉନ୍ନତ ସାମ୍ବାଦିକତାର ମୂଳମନ୍ତ୍ର” ଶୀର୍ଷକ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି । ବଲାଙ୍ଗୀର ଜିଲ୍ଲା ସଂଯୋଜକ ଡ.ଅଭିମନ୍ୟୁ ମିଶ୍ରଙ୍କ ସଭାପତିତ୍ୱରେ ଅନୁଷ୍ଠିତ ଏହି ଆଲୋଚନାଚକ୍ରରେ ଆଲୋଚକ ଭାବରେ ବ୍ରହ୍ମକୁମାରୀଙ୍କ ଜାତୀୟ ପ୍ରବକ୍ତା ତଥା ଜାତୀୟ ଗଣମାଧ୍ୟମ ସଂଯୋଜକ ବ୍ରହ୍ମକୁମାର ରାଜଯୋଗୀ ସୁଶାନ୍ତ ଯୋଗଦେଇ ଗଣମାଧ୍ୟମ ହେଉଛି ସମାଜର ଆତ୍ମା । ସମାଜରେ ଉତ୍କୃଷ୍ଟ ନାଗରିକ ସୃଷ୍ଟିକରିବା ସାମ୍ବାଦିକର ଧର୍ମ ବୋଲି ମତବ୍ୟକ୍ତ କରିଥିଲେ । ଏହା ସହିତ ଆଜିର ଯୁଗରେ ସାମ୍ବାଦିକତାକୁ ସ୍ୱଚ୍ଛ କରିବାକୁ ହେଲେ ସାମ୍ବାଦିକ ନିଜକୁ ମାନସିକ ଚାପମୁକ୍ତ କରିବାକୁ ପଡିବ । ସମାଜର କଳୁଷିତ ଜିନିଷର ପର୍ଦ୍ଦାଫାସ କରି ସତ୍ୟର ଉନ୍ମୋଚନ କରାଯାଉ । କିନ୍ତୁ ନିଜର ମନକୁ ଓ ଆତ୍ମାକୁ କେବଳ ଏକ ସାକ୍ଷ୍ୟ ଭାବରେ ରଖି ଏହାର ପ୍ରତିଫଳନ ସମାଜ ଉପରେ ଛାଡିଦିଆଯାଉ । ତେବେ ନେଗେଟିଭ ନ୍ୟୁଜ ଅପେକ୍ଷା ପଜିଟିଭ ନ୍ୟୁଜକୁ ଅଧିକ ଗୁରୁତ୍ୱ ଦିଆଯାଉ । ମେଡିଟେସନ କଲେ ମସ୍ତିସ୍କ ଶାନ୍ତ ରହିଥାଏ ଓ ମନରେ ଉତ୍ତମ ବିଚାର ଆସିଥାଏ ।  ଗତ ୮୫ ବର୍ଷ ହେଲା ବ୍ରହ୍ମକୁମାରୀ ଇଶ୍ୱରୀୟ ବିଶ୍ୱବିଦ୍ୟାଳୟ ପକ୍ଷରୁ ସମାଜରେ ସୁସ୍ଥତା ଓ ଶାନ୍ତି ପାଇଁ କାମ କରିଆସୁଛି । ଏବେ ଭାରତ ସହିତ ବିଶ୍ୱର ୧୪୭ଟି ଦେଶରେ ବ୍ରହ୍ମକୁମାରୀ ଶିକ୍ଷାଦାନ କରୁଛି । ବିଶ୍ୱରେ ଶାନ୍ତିର ବାର୍ତ୍ତା ଦେବାକୁ ହେଲେ ନିଜକୁ ସୁସ୍ଥ କରିବାକୁ ପଡିବ ଓ ବ୍ରହ୍ମକୁମାରୀ ଏହାର ଉତ୍ତମ ମାଧ୍ୟମ । ତେଣୁ ମାନସିକ ଚାପରୁ ମୁକ୍ତି ପାଇଁ ବ୍ରହ୍ମକୁମାରୀଙ୍କ ରାଜଯୋଗ ବା ମେଡିଟେସନ ହିଁ ଉତ୍ତମ ମାଧ୍ୟମ ବୋଲି ବି.କେ ସୁଶାନ୍ତ କହିଥିଲେ । ଏହି ଆଲୋଚନାଚକ୍ରରେ ବଲାଙ୍ଗୀର ରାଜଯୋଗ୍‌ କେନ୍ଦ୍ରର ମୁଖ୍ୟ ବ୍ରହ୍ମକୁମାରୀ ବିକେ ଉଷା ଯୋଗଦେଇଥିବା ବେଳେ ବଲାଙ୍ଗୀର ଜିଲ୍ଲାର ବରିଷ୍ଠ ସାମ୍ବାଦିକ ଗୋପବନ୍ଧୁ ଶତପଥି,ଅରୁଣ ମିଶ୍ର, ଆନନ୍ଦ ଚନ୍ଦ୍ର ସାହୁ, ପୂର୍ଣ୍ଣଚନ୍ଦ୍ର ପଣ୍ଡା, ବୀରେନ୍ଦ୍ର ଝାଙ୍କର, ଶରତ ମହାକୁର, ଚନ୍ଦ୍ରଭାନୁ ମୋଲାନା, ଜ୍ୟୋତ୍ସ୍ନାରାଣୀ ଦାସ, ତରୁଣ ସାହୁ, କରୁଣାକର ପଧାନ ପ୍ରମୁଖଙ୍କ ସହିତ ବ୍ରହ୍ମକୁମାରୀର ସଭ୍ୟ/ସଭ୍ୟା ଯୋଗ ଦେଇଥିଲେ ।