11-Dec-2023

ବଲାଙ୍ଗୀର(ପ୍ରେରଣା ଖବର)- ଆୟକର ଫାଙ୍କି ଅଭିଯୋଗରେ କେନ୍ଦ୍ରୀୟ ଏଜେନ୍ସୀ ଆଇଟି ବିଭାଗ ଗତ ବୁଧବାରଦିନ ଠାରୁ ଆଜି ପର୍ଯ୍ୟନ୍ତ ବିହାରୀ ମଦବ୍ୟବସାୟୀଙ୍କ ମଦଭାଟି ଓ ଘରେ ଖାନତଲାସୀ ଚଳାଇଛନ୍ତି । ଏପର୍ଯ୍ୟନ୍ତ କେବଳ ବଲାଙ୍ଗୀର ଜିଲ୍ଲାର ସୁଦପଡାଭାଟି ଓ ଟିଟିଲାଗଡର ସଂଜୟ ସାହୁଙ୍କ ଘରୁ ୩୦୦କୋଟିରୁ ଉର୍ଦ୍ଧ୍ୱ ଟଙ୍କା ଜବତ କରିସାରିଛି । ଏହି ଘଟଣାକୁ ନେଇ ରାଜ୍ୟରୁ ଜାତୀୟସ୍ତର ପର୍ଯ୍ୟନ୍ତ ଆଲୋଚନାର ବିଷୟ ହୋଇଛି । ଆଜି ୬ଷ୍ଠ ଦିନରେ ମଧ୍ୟ ଆଇଟି ବିଭାଗ ସୁପଡା ଭାଟିରେ ଚଢାଉ କରିବା ସହିତ ଟିଟିଲାଗଡରେ ମଦବ୍ୟବସାୟୀ ସଂଜୟ ସାହୁଙ୍କର ଏକ୍ସିସ ବ୍ୟାଙ୍କରେ ଥିବା ୩ଲକରକୁ ଯାଞ୍ଚ କରାଯାଉଥିବା ସୂଚନା ମିଳିଛି । ଜବତ ନୋଟ ଗୁଡିକୁ ବଲାଙ୍ଗୀର ଷ୍ଟେଟବ୍ୟାଙ୍କରେ ଗଣତି କରାଯାଇଛି । କେହି କେହି ଜବତ ନୋଟଗୁଡିକର ମୂଲ୍ୟ ୩୦୦କୋଟି ଟଙ୍କା ଡେଇଁଥିବା କହୁଥିବା ବେଳେ ଆଉ କେହି କେହି ୪୦୦କୋଟି କହୁଛନ୍ତି । କିନ୍ତୁ ପ୍ରକୃତରେ କେତେ ଟଙ୍କା ଜବତ ହୋଇଛି ତାହା ଆୟକର ବିଭାଗ କିମ୍ବା ବ୍ୟାଙ୍କ କତ୍ତୃପକ୍ଷ ସ୍ପଷ୍ଟ କରୁନାହାଁନ୍ତି । କେହି କେହି ସୁଦପଡା ଅଣ୍ଡରଗ୍ରାଉଣ୍ଟ ରୁମରୁ ୬୦କିଲୋ ସୁନା ମଧ୍ୟ ଜବତ ହୋଇଥିବା କହୁଛନ୍ତି । କିନ୍ତୁ ଏହା କିଛି ସ୍ପଷ୍ଟ ହେଉନାହିଁ । ଗତକାଲିର ଷ୍ଟେଟବ୍ୟାଙ୍କରେ ନୋଟଗୁଡିକର ଗଣତି ପରେ ଆୟକର ବିଭାଗ କିମ୍ବା ବ୍ୟାଙ୍କ କତ୍ତୃପକ୍ଷ ଗଣମାଧ୍ୟମକୁ କିଛି ତଥ୍ୟ ଦେବା ବୋଲି ଆଶା କରାଯାଉଥିଲା । କିନ୍ତୁ ବିଳମ୍ବିତ ରାତି ପର୍ଯ୍ୟନ୍ତ ରାତି ପର୍ଯ୍ୟନ୍ତ ଷ୍ଟେଟବ୍ୟାଙ୍କରେ ଅଟକି ରହିଥିଲେ ହେଁ କେହି କିଛି କହିଲେ ନାହିଁ । ଗଣମାଧ୍ୟମରେ ଭିନ୍ନ ଭିନ୍ନ ସୂଚନାର ଖବର ପରିବେଷଣ ହୋଇଛି । ତେଣୁ ଜନସାଧାରଣରେ ଏନେଇ ବିଭ୍ରାନ୍ତି ସୃଷ୍ଟି ହୋଇଛି । ଏହି ବିପୁଳ ପରିମାଣର ନୋଟ ଜବତ ଘଟଣାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏକ୍ସରେ ତାଙ୍କର ମତ ରଖି ଦୁର୍ନିତୀଖୋରଙ୍କୁ ଧରି ଜେଲରେ ପୁରାଯିବ ବୋଲି କହୁଛନ୍ତି । ସେପଟେ ରାଜ୍ୟ ବିଜେପି ଏହି ଘଟଣାରେ ଶାସକଦଳକୁ ଟାର୍ଗେଟ ମଧ୍ୟ କରିଛି । କିନ୍ତୁ ରାଜ୍ୟ କଂଗ୍ରେସଦଳ ଏନେଇ ଏପର୍ଯ୍ୟନ୍ତ ମୁହଁ ଖୋଲିନାହାଁନ୍ତି । ବଲାଙ୍ଗୀର ଜିଲ୍ଲାରୁ ପିସିସି ସଭାପତି ଶରତ ପଟ୍ଟନାୟକ ଓ ବିଧାୟକଦଳର ନେତା ନରସିଂହ ମିଶ୍ର ରହିଥିଲେ ହେଁ ବଲାଙ୍ଗୀରରୁ ଏତେ ପରିମାଣର ନୋଟ ଜବତ ନେଇ ଚୁପ ରହିଛନ୍ତି । ବଲାଙ୍ଗୀର ବିଜେପି ସାଂସଦଙ୍କୁ ବିବାଦ ଭିତରେ ଟାଣିବାକୁ ବିଜେଡି ଚେଷ୍ଟା ଚଳାଇଥିବା ବେଳେ ବିଜେପିଦଳ ଟିଟିଲାଗଡର ବିଜେଡି ବିଧାୟିକା ତଥା ମନ୍ତ୍ରୀଙ୍କ ମଦ ବ୍ୟବସାୟୀଙ୍କ ସହିତ ଥିବା ସମ୍ପର୍କର ତଦନ୍ତ ଦାବି କରୁଛି । ତେବେ ବଲାଙ୍ଗୀର ସାଂସଦ ସଂଗୀତା କୁମାରୀ ସିଂଦେଓ ନିଜେ ସାମ୍ବାଦିକ ସମ୍ବିଳନୀ କରି ଏହି ଘଟଣାର ତଦନ୍ଦ ସିବିଆଇ କିମ୍ବା ଇଡି ବିଭାଗ କରିବାକୁ ଦାବି କରିଛନ୍ତି ।