15-Dec-2020

ଭୁବନେଶ୍ୱର,(ଶୁଭାଶିଶଷ ନାୟକ) :କଟକ ପୋଲିସର ଏକକାଳୀନ ଚାରି ଜାଗାରେ ଚଢାଉ। ପୋଲିସର ଏକ ସ୍ପେଶାଲ ସ୍କ୍ୱାର୍ଡ ଆଜି କଟକର ଚାଉଳିଆଗଞ୍ଜ, ଜଗତପୁର, ମାଲଗୋଦାମ ଓ ମର୍କତନଗର ଠାରେ ଚଢାଉ କରିଛନ୍ତି । ଚଢାଉ ବେଳେ ୭ଟି ବନ୍ଧୁକ, ୩୫ ଅଫୁଟା ଗୁଳି ଏବଂ ଗୋଟିଏ ଇନୋଭା ଗାଡି ଜବତ ହୋଇଛି । ଆଉ ଏଥିରେ ୧୨ ଜଣଙ୍କୁ ଗିରଫ କରିଛି ପୋଲିସ । ତେବେ ଏମାନଙ୍କ ନାଁରେ ଆଗରୁ ଅନେକ କ୍ରିମିନାଲ ରେକର୍ଡ ଥିବା ବେଳେ ଏମାନେ ଡି ବ୍ରଦର୍ସଙ୍କ ସହ ଲିଙ୍କ୍ ରେ ଥିବା ସନ୍ଦେହ କରୁଛି ପୋଲିସ । 

ସୂଚନା ଅନୁଯାୟୀ, ପୋଲିସ ଆଜି ବିଶେଷ ସୂତ୍ରରୁ ଖବର୍ ପାଇ କଟକର ଚାଉଳିଆଗଞ୍ଜ, ଜଗତପୁର, ମାଲଗୋଦାମ ଓ ମାର୍କତନଗର ଠାରେ ଚଢାଉ କରିଥିଲା। ତେବେ ଚାଉଳିଆଗଞ୍ଜ ରେ ହୋଇଥିବା ଚଢାଉରେ ୨ଟି ବନ୍ଧୁକ ଏବଂ ୯ଟି ଅଫୁଟା ଗୁଳି ଜବତ କରାଯାଇଛି। ଆଉ ସେଠାରୁ ତିନି ଜଣଙ୍କୁ ଗିରଫ କରାଯାଇଛି। ସେହିପରି ମାଲଗୋଦାମ ପୋଲିସ ଷ୍ଟେସନ ଅଞ୍ଚଳରୁ ଗୋଟିଏ ବନ୍ଧୁକ, ୯ଟି ଅଫୁଟା ଗୁଳି ଓ ଗୋଟିଏ ଇନୋଭା କାର୍ ଜବତ ହୋଇଥିବା ବେଳେ ତିନିଜଣଙ୍କୁ ଗିରଫ କରାଯାଇଛି । ସେହିପରି ଜଗତପୁରରୁ ଦୁଇଟି ବନ୍ଧୁକ ଏବଂ ୧୨ଟି ଅଫୁଟା ଗୁଳି ଜବତ କରାଯାଇଥିବା ବେଳେ ସେଠାରୁ ତିନିଜଣଙ୍କୁ ଗିରଫ କରିଛି ପୋଲିସ । ମାର୍କତନଗର ରେ ହୋଇଥିବା ଚଢାଉରେ ଗୋଟିଏ ପିସ୍ତଲ, ଗୋଟିଏ ଏୟାର୍ ବନ୍ଧୁକ, ଦୁଇଟି ଅଫୁଟା ଗୁଳି, ଗୋଟିଏ ବାଇକ୍, ୧୨୫୦ ଟଙ୍କା ଏବଂ ଦୁଇଟି ମୋବାଇଲ୍ ଫୋନ୍ ଜବତ କରାଯାଇଛି । ଏଠାରୁ ମଧ୍ଯ ତିନିଜଣଙ୍କୁ ଗିରଫ କରିଛି ପୋଲିସ । 
ତେବେ ପ୍ରାଥମିକ ତଦନ୍ତରୁ ଜଣାପଡିଛି ଯେ, ଗିରଫ ହୋଇଥିବା ଅଭିଯୁକ୍ତ ମାନେ ଅନେକ ଅସାମାଜିକ କାମରେ ଲିପ୍ତ ଅଛନ୍ତି ଏବଂ ଅସ୍ତ୍ରଶସ୍ତ୍ର ଚୋରା କାରବାରରେ ମଧ୍ଯ ଜଡିତ ଅଛନ୍ତି । ଏମାନେ ଡି-ବ୍ରଦର୍ସଙ୍କ ସହିତ ଲିଙ୍କ୍ ରେ ଥିବା ମଧ୍ଯ ପୋଲିସ ସନ୍ଦେହ କରୁଛି ଏବଂ ସେମାନଙ୍କ ନିର୍ଦ୍ଦେଶ ଅନୁଯାୟୀ ଅସ୍ତ୍ରଶସ୍ତ୍ର ଚୋରା ଚାଲାଣ କରୁଛନ୍ତି ।