04-Sep-2023

ପାଟଣାଗଡ଼ (ପ୍ରେରଣା ଖବର) ସରକାର ସ୍ବଛ ଭାରତ ମିଶନ କରିବା ପାଇଁ ମନରେଗା ଯୋଜନାରେ ପଞ୍ଚାୟତ ଜରିଆରେ ଲୋକଙ୍କ ପାଖରେ ବାସନକୁସନ ମାଜିବା ଲାଗି ସକ୍ପିଟ ନିର୍ମାଣ କରିବାକୁ ଆଦେଶ ଦେଇଛନ୍ତି। କିନ୍ତୁ ଏଠି ପ୍ରଶାସନିକ ଅଧିକାରୀ ଓ ଠିକାଦାର ମାନେ ମିଶି ନିମ୍ନ ମାନର ସକ୍ପିଟ ନିର୍ମାଣ କରି ଟଙ୍କା ହଡପ କରିବା ଯୋଜନାରେ ଲାଗିଛନ୍ତି। ଯେପରି ସ୍ଵଚ୍ଛ ଭାରତ ମିଶନ ରେ ପାଇଖାନା ଦୁର୍ନୀତି ଚରମ ସୀମାରେ ପହଞ୍ଚିଥିଲା ଠିକ୍ ସେଭଳି ସକ୍ପିଟ ଦୁର୍ନୀତି ମଧ୍ୟ ଚରମସୀମା ରେ ପହଞ୍ଚିବ ଏଥିରେ ତିଳେ ମାତ୍ର ସନ୍ଦେହ ନାହିଁ ବୋଲି ଅନୁମାନ କରାଯାଏ। ସୂଚନାଯୋଗ୍ୟ ଯେ ବଲାଙ୍ଗିର ଜିଲ୍ଲା ବେଲପଡା ବ୍ଲକ ବାଲିଖମାର ପଞ୍ଚାୟତ ବାଲିଖମାର ଗାଁ ରେ କମ୍ପୋଷ୍ଟ ପିଟ ଓ ପଚାଶ ଜଣଙ୍କ ପାଇଁ ସକ୍ପିଟ ନିର୍ମାଣ ପାଇଁ ୩୫୦୦୦୦ ଟଙ୍କା ଆସିଥିବା ବେଳେ ଉକ୍ତ ଗାଁ ରେ ବାହାର ରାଜ୍ୟର ଶ୍ରମିକ ଆଣି ଠିକାଦାର ଏଣେତେଣେ ସକ୍ପିଟ ନିର୍ମାଣ କରିଥିବା ଦେଖିବାକୁ ମିଳିଛି। ଖାଲି ଗୋଟେ କି ଦୁଇଟି ନୁହେଁ ଗାଁର ସବୁ ଯାକ ସକ୍ପିଟ ନିମ୍ନ ମାନର ନିର୍ମାଣ ହୋଇଥିବା ବେଳେ କମ୍ ପରିମାଣରେ ନିର୍ମାଣ କରାଯାଇଛି। ଏକାଧିକ ଲୋକଙ୍କ ପାଇଁ ଗୋଟିଏ ଲେଖାଏଁ ନିର୍ମାଣ କରି ଅଧିକ କରାଯାଇଥିବା ଦର୍ଶାଯାଇଛି। ଏଠି ପ୍ରଶ୍ନ ଉଠୁଛି ଯେ ସୂଚନା ଫଳକ ରେ ଶ୍ରମିକ ମୂଲ୍ୟ ୩୮୪ ଟଙ୍କା ଧାର୍ଯ୍ୟ କରାଯାଇଥିବା ବେଳେ ଅଞ୍ଚଳର ଶ୍ରମିକ ନିୟୋଜିତ କରାଗଲା ନାହିଁ କାହିଁକି? ବାହାର ରାଜ୍ୟର ଶ୍ରମିକ ମାନଙ୍କୁ ଲଗାଇ କାର୍ଯ୍ୟ କରିବା ପାଇଁ କିଏ ପରାମର୍ଶ ଦେଇଛି ତାହା ତଦନ୍ତ ସାକ୍ଷେପ। ଗୋଟିଏ ହିତାଧିକାରୀ ପାଇଁ ଗୋଟିଏ ଲେଖାଏଁ ସକ୍ପିଟ ନିର୍ମାଣ କାର୍ଯ୍ୟ କରିବାକୁ ନିୟମ ଥିବା ବେଳେ ଗୋଟିଏ ରେ ଚାରୋଟି ସଂଯୋଗ କରିବା ର ଅର୍ଥ କ'ଣ? ଆହୁରି ଗୋଟାଏ କଥା ହେଉଛି କାମ ଏମିତି ହୋଇଛି ଯେ ଅଳ୍ପ ଦିନ ମଧ୍ୟରେ ତାହା ଭାଙ୍ଗିରୁଜି ଚୁର୍ମାର ହୋଇଯିବ।ଏ ବିଷୟରେ ବାଲିଖମାର ପଞ୍ଚାୟତ ର ସରପଞ୍ଚ ପ୍ରତିକ୍ରିୟା ନେବାକୁ ଗଲାବେଳେ ମେଡମ ପ୍ରତିକ୍ରିୟା ଦେବାକୁ ମନା କରିଦେଲେ ଓ ଚିହିଁକି ଉଠି କହିଥିଲେ କି ଆପଣଙ୍କୁ ଅଭିଯୋଗ କିଏ କରିଛି ତାକୁ ମୋ ପାଖକୁ ଆଣନ୍ତୁ। ପୁଣି ମେଡମ କହୁଛନ୍ତି ଏଥିରେ ମୋର କୌଣସି ସ୍ବାର୍ଥ ନାହିଁ ଠିକାଦାର ତା ହିସାବରେ କାମ କରୁଛି ମୋର କିଛି ଲାଭ ନାହିଁ। ଯଦି ସରପଞ୍ଚ ଙ୍କ କୌଣସି ସ୍ବାର୍ଥ ନାହିଁ ତାହେଲେ ସେ ଗଣମାଧ୍ୟମ ପ୍ରତିନିଧି ଆଗରେ ନିଜର ମନ୍ତବ୍ୟ ଦେବାକୁ ନାରାଜ କାହିଁକି? ଏଥିରୁ ସକ୍ପିଟ ଦୁର୍ନୀତି ବାଲିଖମାର ପଞ୍ଚାୟତ ରେ କିଭଳି ଚାଲିଛି ଆକଳନ କଲେ ଜାଣିପାରିବେ।ଏ ବିଷୟରେ ଏପିଓ ଙ୍କୁ ଯୋଗାଯୋଗ କରାଯାଇଥିବା ବେଳେ ମେଡମ କଲ୍ ଗ୍ରହଣ କରି ନଥିଲେ।ଏ ବିଷୟରେ ବିଡ଼ିଓ ଙ୍କୁ ପଚାରିବାରୁ ସେ କହିଲେ କି କାମ କରିବା ପାଇଁ ଲୋକ ମିଳୁନାହିଁ ତ ସେଥିପାଇଁ ବାହାର ରାଜ୍ୟର ଲୋକ ଦ୍ବାରା କାମ କରାଯାଉଅଛି। ଅନ୍ୟ ପକ୍ଷରେ ଲୋକ ମନରେଗା ଯୋଜନାରେ କାମ ନପାଇ ବିଡ଼ିଓ ଙ୍କୁ ଅଭିଯୋଗ କରୁଛନ୍ତି।ସରପଞ୍ଚ ଓ ପିଇଓ ଜରିଆରେ ଏ କାମ ହେଉଛି ଆଉ ଭଲ କାମ ହେଉଛି କି ନାହିଁ ସରପଞ୍ଚ ଓ ପିଇଓ ଙ୍କୁ ଅଭିଯୋଗ କରନ୍ତୁ ବୋଲି ବିଡ଼ିଓ ମନ୍ତବ୍ୟ ଦେଇଥିଲେ।ଏଥିରୁ ସ୍ପଷ୍ଟ ଜଣାପଡ଼ୁଛି ଯେ ମନରେଗା ଯୋଜନାରେ ସକ୍ପିଟ କାମ କିଭଳି ଦୁର୍ନୀତି ହେଉଛି। ଏଥିପ୍ରତି ଜିଲ୍ଲା ପ୍ରଶାସନ ଧ୍ୟାନ ଦେଇ ଉଚିତ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରିଛନ୍ତି।