18-Mar-2023

ବଲାଙ୍ଗୀର/ ରାଜ୍ୟରେ ଶାସକ ବିଜେଡିଦଳ ୨୩ବର୍ଷ ଶାସନରେ ଥିଲେ ହେଁ ଦଳର ପତିଆରା ଅକ୍ଷୁର୍ଣ୍ଣ ରଖିଛି । ଏବେ ଅନ୍ୟଦଳରୁ ଆହୁରି ଲୋକ ଆସି ବିଜେଡିରେ ସାମିଲ ହେଉଛନ୍ତି । ନବୀନ ପଟ୍ଟନାୟକଙ୍କ ଆଦର୍ଶ ଓ ବଲାଙ୍ଗୀରର ପୂର୍ବତନ ସାଂସଦ କଳିକେଶନାରାୟଣ ସିଂଦେଓଙ୍କ ନେତୃତ୍ୱକୁ ସମର୍ଥନ ଜଣାଇ ଆଜି ଲୋଇସିଂହା,ପାଟଣାଗଡ ଓ କଣ୍ଟାବାଞ୍ଜି ନିର୍ବାଚନମଣ୍ଡଳିର ଶତାଧିକ କର୍ମୀ ଆସି ବିଜେଡି ଦଳରେ ଯୋଗ ଦେଇଛନ୍ତି । ସବୁଠୁ ବଡଝଟକା ଲାଗିଛି  କଂଗ୍ରେସଦଳକୁ । କଂଗ୍ରେସଦଳର ବରିଷ୍ଠନେତା ନରସିଂହ ମିଶ୍ରଙ୍କ ଜଣେ ଦୃଢସମର୍ଥକ ରହିଆସିଥିବା ତଥା ଗତ ୨୦୧୯ରେ ଲୋଇସିଂହା ବିଧାସଭାକ୍ଷେତ୍ରରେ କଂଗ୍ରେସପ୍ରାର୍ଥି ହୋଇଥିବା ନବକିଶୋର ନାଏକ ଆଜି କଂଗ୍ରେସଦଳ ତ୍ୟାଗ କରି ବିଜୁଜନତାଦଳରେ ସାମିଲ ହୋଇଛନ୍ତି । ସେ ତାଙ୍କର ଶତାଧିକ ସମର୍ଥକଙ୍କ ସହିତ ଏକ ବିଶାଳ ଶୋଭାଯାତ୍ରାରେ ଆସି ବଲାଙ୍ଗୀର ଶୈଳଶ୍ରୀ ପ୍ୟାଲେସରେ ଆୟୋଜିତ ମିଶ୍ରଣପର୍ବରେ ଯୋଗଦେଇଛନ୍ତି ଓ ଆଗାମୀ ଦିନରେ ସେ ବିଜେଡିଦଳ ପାଇଁ କାମ କରିବେ ବୋଲି କହିଛନ୍ତି । ନବକିଶୋର ଲୋଇସିଂହା ଅଞ୍ଚଳର ଜଣେ ଅମାୟିକ ବ୍ୟକ୍ତିତ୍ୱ ହୋଇଥିବା ବେଳେ ଏବେ ସେ ଲୋଇସିଂହା ପଞ୍ଚାୟତର ସରପଞ୍ଚ ମଧ୍ୟ ରହିଛନ୍ତି । ଆଗାମୀ ଦିନରେ ଲୋଇସିଂହା ଅଞ୍ଚଳର ହଜାର ହଜାର ସମର୍ଥକ ବିଜେଡିରେ ସାମିଲ ହେବେ ବୋଲି ସେ ସୂଚନା ଦେଇଛନ୍ତି । ଆଜି ଅନେକସଂଖ୍ୟାରେ ମହିଳାମାନେ ମଧ୍ୟ ଆସି ବିଜେଡିଦଳରେ ଯୋଗଦେଇଛନ୍ତି । 
           

     ଆଜି ବଲାଙ୍ଗୀର ଶୈଳଶ୍ରୀ ପ୍ୟାଲେସଠାରେ ଏକ ବଡଧରଣର ମିଶ୍ରଣପର୍ବ ଆୟୋଜିତ ହୋଇଥିଲା । ପୂର୍ବତନ ସାଂସଦ ତଥା ରାଜ୍ୟ ହାଉସିଂବୋର୍ଡ ଅଧ୍ୟକ୍ଷ ଥିବା କଳିକେଶନାରାୟଣ ସିଂଦେଓଙ୍କ ନେତୃତ୍ୱରେ ହଜାର ହଜାର ସଂଖ୍ୟାରେ କର୍ମି ମଧ୍ୟ ସାମିଲ ହୋଇଥିଲେ । ବିଜେଡିର ବରିଷ୍ଠନେତା ଭବାନୀଶଙ୍କର ହୋତାଙ୍କ ସଭାପତିତ୍ୱ ଓ ଜିଲ୍ଲା ଯୁବବିଜେଡି ସଭାପତି ରାଜେନ୍ଦ୍ର ହୋତାଙ୍କ ସଂଯୋଜନାରେ ଅନୁଷ୍ଠିତ ଏହି ମିଶ୍ରଣପର୍ବରେ ପୂର୍ବତନ ସାଂସଦ କଳିକେଶନାରାୟଣ ସିଂଦେଓ,ଜିଲ୍ଲା ବିଜେଡିର କାର୍ଯ୍ୟକାରୀ ସଭାପତି ଅଶୋକ ମହାନ୍ତି,ବରିଷ୍ଠନେତା ଲକ୍ଷ୍ମଣକୁମାର ମେହେର,ଉମାଶଙ୍କର ସିଂ,ସୁଶୀଳ ଚାନ୍ଦ,ବିଜେଡି ମହିଳା ସଭାନେତ୍ରୀ ଦମୟନ୍ତି ବାଘ,ଅଜୟ ଦାସ,ଟିମା ମହାନ୍ତି,ଜିଲ୍ଲା ପରିଷଦ ସଭାପତି ଦେବକୀ ସାହୁ,ପୌରାଧ୍ୟକ୍ଷା ଲିକା ସାହୁ,ଉପାଧ୍ୟକ୍ଷା ଗାୟତ୍ରୀ ଭୋଇ,

ଦେଓଗାଁ ବ୍ଲକଅଧ୍ୟକ୍ଷ ଦୟାନିଧି ଖମାରୀ,ସଦର ବ୍ଲକ ଅଧ୍ୟକ୍ଷା ସରିତା ବାଗ,ଜିଲ୍ଲା ପରିଷଦ ସଭ୍ୟା ଅନାମିକା ହୋତା,ମମତା କୁମୁରା,ତୁରେକେଲା ବ୍ଲକ ସଭାପତି ଅରସାଦ ଖାନ,ଟୁନା ସ୍ୱାଇଁ,ବନମାଳି ଖମାରୀ,ଅଜିତ ଯୋଷୀ,ହଂସରାଜ ଜୈନ ପ୍ରମୁଖ ମଞ୍ଚାସୀନ ହୋଇ ଆଗାମୀଦିନରେ ଜିଲ୍ଲାରେ ବିଜେଡିଦଳ କିଭଳି ଆହୁରି ମଜବୁତ ହେବ ସେବିଷୟରେ ବକ୍ତବ୍ୟ ରଖିଥିଲେ । କଳିକେଶ ତାଙ୍କ ବକ୍ତବ୍ୟରେ ବଲାଙ୍ଗୀର ନିର୍ବାଚନମଣ୍ଡଳିରେ କଂଗ୍ରେସ ବିଧାୟକ ନିର୍ବାଚିତ ପୌରକାଉନସିଲକୁ ଭାଙ୍ଗିଦେବାକୁ ଧମକ ଦେଉଛନ୍ତି । ବିଜେଡିଦଳର ଲୋକପ୍ରୀୟତାରେ କଂଗ୍ରେସ ଭୟଭୀିତ ହୋଇଯାଇଛି ଓ ପୌରନିର୍ବାଚନରେ ଶୋଚନୀୟ ପରାଜୟକୁ ଗ୍ରହଣ କରିନପାରି ବିଧାୟକ ଏଭଳି ବକ୍ତବ୍ୟ ଦେଉଥିବା କହିଛନ୍ତି । ଗତ କିଛିଦିନ ତଳେ ବିଧାୟକଙ୍କ ଉପସ୍ଥିତିରେ ତାଙ୍କର ଗୁଣ୍ଡାମାନେ ବିଜେଡିର ଜଣେ ମହିଳା କାଉନସିଲରଙ୍କୁ  ଯେଭଳି ଆକ୍ରମଣ କଲେ ତାହାକୁ କଳିକେଶ ନିନ୍ଦା କରିଥିଲେ ।