-+91-9937148622 |
prerana_bgr@rediffmail.com |
Friday 19th April 2024 |
R.N.I. Regd No. ODIODI/2010/46693
Breaking News
09-Feb-2023
ବଲାଙ୍ଗିର/କଣ୍ଟାବାଞ୍ଜି,(ପ୍ରେରଣା ଖବର)-ବଲାଙ୍ଗୀର ଜିଲ୍ଲାରେ ନେତା ଓ ପ୍ରଶାସନ ମଧ୍ୟରେ କଥାକଟି ଓ ଏବେ ପ୍ରଶାସନର ରିଭେଞ୍ଜ ରିଏକ୍ସନକୁ ନେଇ କଣ୍ଟାବାଞ୍ଜି ତଥା ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି । ଗତ ମାସରେ ଜିଲ୍ଲାପରିଷଦ ବୈଠକରେ କଣ୍ଟାବାଞ୍ଜି ବିଧାୟକ ସନ୍ତୋଷ ସିଂସାଲୁଜା ସରକାରୀ ଅନୁଦାନ ଆବଣ୍ଟନ ନେଇ ଜିଲ୍ଲାପାଳ ଚଞ୍ଚଳ ରାଣାଙ୍କ ଉପରେ ଖୁବ ବର୍ଷିଥିଲେ । ଏହି ଘଟଣାକୁ ନେଇ ଜିଲ୍ଲା ତଥା ରାଜ୍ୟ ରାଜନୀତିରେ ଚର୍ଚ୍ଚାର ବିଷୟ ହୋଇଥିଲା । ତେବେ ଏହାର କିଛିଦିନ ପରେ ଲୋକଉତ୍ସବ ସମୟରେ ଉଭୟ କଣ୍ଟାବାଞ୍ଜି ବିଧାୟକ ଓ ଜିଲ୍ଲାପାଳ ମିଳିତ ପୋଜଦେଇ ଗଣମାଧ୍ୟମ ଆଗରେ ଫଟୋ ହୋଇଥିଲେ । ସମସ୍ତେ ଭାବିନେଇଥିଲେ ଉଭୟଙ୍କ ଭିତରେ ମିଳାମିଶା ହୋଇଗଲା । କିନ୍ତୁ ମାସଟିଏ ନଯାଉଣୁ ପ୍ରଶାସନର କଣ୍ଟାବାଞ୍ଜି ଅଞ୍ଚଳରେ ଘନଘନ ଚଢାଉ ଓ ଗିରଫ ଦାରିକୁ ଦେଖିଲେ ଏବେ ପ୍ରଶାସନ ରିଭେଞ୍ଜ ରିଏକ୍ସନ ଦେଖାଉଛି ବୋଲି ଆଲୋଚନା ହେଉଛି । ପୋଲିସ ବିଭାଗ ଗତ କିଛିଦିନ ତଳେ କଣ୍ଟାବାଞ୍ଜିର ଆଲିସାନ ସିନେମାହଲରେ ଗଣ୍ଡଗୋଳ କରିଥିବା ଅଭିଯୋଗରେ କଣ୍ଟାବାଞ୍ଜି ବିଧାୟକ କୁକୁସିଂଙ୍କ ପୁଅ ଅମିତ ଓରଫ ସେଜିସିଂଙ୍କ ସହ ୬ଜଣଙ୍କୁ ଗିରଫ କରି କୋର୍ଟଚାଲାଣ କରିଥିଲା । ଏକ ଛୋଟ ଘଟଣାକୁ ପ୍ରଥମେ ପୋଲିସ ସଲାସୁତୁରା କରି ପରେ ପୁଣି ଉପରମହଲର ନିର୍ଦ୍ଦେଶରେ ବଡଘଟଣା ଭାବରେ ଚିତ୍ରଣ କରି ଗିରଫଦାରି କରିଥିଲା । ସେଇଠୁ ରିଭେଞ୍ଜ ରାଜନୀତି ଆରମ୍ଭ ହୋଇଥିବା ଚର୍ଚ୍ଚାର ବିଷୟ ହୋଇଛି । ଏହା ପରେ ପରେ କୁକୁଙ୍କ ଜଣେ ସମର୍ଥକଙ୍କ ବିଦେଶୀମଦ ଦୋକାନ,ଆଉ ଜଣେ ସମର୍ଥକଙ୍କ ବ୍ୟବସାୟୀକ ପ୍ରତିଷ୍ଠାନରେ ଜିଏସଟି ଚଢାଉ ଓ ଏବେ ତୁରେକେଲା ବ୍ଲକର ଜଣେ ସମର୍ଥକଙ୍କ ଇଟାଭାଟି ଉପରେ ଚଢାଉ କରାଯାଇଛି । ଗତକାଲି ଟିଟିଲାଗଡ ଉପଜିଲ୍ଲାପାଳ ଦୟାମୟ ପାଢୀ ଓ କଣ୍ଟାବାଞ୍ଜି ତହସିଲଦାର ଅମୃତଲାଲ ବେହେରାଙ୍କ ନେତୃତ୍ୱରେ ଏକ ଟିମ ପୋଲିସ ଉପସ୍ଥିତିରେ ତୁରେକେଲା ବ୍ଲକ ବୁରୋମାଲ ଗ୍ରାମପଞ୍ଚାୟତର କୁକୁଡାହାଡ ସୁନାରୀପଡାରେ ଥିବା ହରିବନ୍ଧୁ ପଟେଲଙ୍କ ଇଟାଭାଟିରେ ଚଢାଉ କରିଥିଲେ । ଇଟାଭାଟି ଯୋଗୁଁ ପରିବେଶ ପ୍ରଦୁଷଣ ଓ ମୃତିକା କ୍ଷୟ ହେଉଥିବା କାରଣରୁ ବେଆଇନ ଇଟାଭାଟିଗୁଡିକୁ ଚଢାଉ କରାଯାଉଥିବା କୁହାଗଲା । ହରିବନ୍ଧୁ ପଟେଲଙ୍କ ଇଟାଭାଟିକୁ ଭାଙ୍ଗିବା ସହିତ ସେଠାରେ ପୂର୍ବରୁ ଥିବା ପ୍ରାୟ ୫୦ଲକ୍ଷ ଟଙ୍କାର ପୁରୁଣା ଇଟାଭାଟିକୁ ମଧ୍ୟ ବୁଲଡୋଜର ଲଗାଇ ଉପଜିଲ୍ଲାପାଳ ଭାଙ୍ଗି ଦେଇଛନ୍ତି । ଗତ ଦୁଇବର୍ଷ ପୂର୍ବରୁ କୁଆଡେ ରାଜସ୍ୱବିଭାଗକୁ ରୋୟାଲ୍ଟି ବୁଝାଇ କାର୍ତ୍ତିକ ପଟେଲ ସେହି ଇଟାଭାଟି କରିଥିଲେ । କିନ୍ତୁ ପ୍ରଶାସନ ତାକୁ ମଧ୍ୟ ବେଆଇନ କହି ବୁଲଡୋଜର ଲଗାଇଦେଇଛି । ଶୁଣାଯାଉଛି ଯେ,ଗତମାସରେ କଣ୍ଟାବାଞ୍ଜି ବିଧାୟକଙ୍କ ଜିଲ୍ଲାପାଳ କାର୍ଯ୍ୟାଳୟ ଘେରାଉ ବେଳେ ତୁରେକେଲା ଅଞ୍ଚଳରୁ କାର୍ତ୍ତିକ କଂଗ୍ରେସକର୍ମିଙ୍କୁ ଆଣିଥିଲେ ଓ ଘେରାଉରେ ସାମିଲ ହୋଇଥିଲେ । ସେହି କାରଣରୁ ଆକ୍ରୋଶମୂଳକ ଭାବରେ ତାଙ୍କର ପୁରୁଣା ଇଟାଭାଟିକୁ ପ୍ରଶାସନ ବୁଲଡୋଜର ଲଗାଇ ଭାଙ୍ଗି ଦେଇଛି ବୋଲି ଅଭିଯୋଗ ଉଠିଛି । ପ୍ରଶାସନର ଏଭଳି ରିଭେଞ୍ଜ ରିଏକ୍ସନକୁ ନେଇ ଏବେ ଜିଲ୍ଲାରେ ଚର୍ଚ୍ଚାର ବିଷୟ ହୋଇଛି । ଗତ କିଛିଦିନ ତଳେ ବିଧାୟକଙ୍କ ପୁଅ ସେଜିସିଂଙ୍କୁ ଗିରଫ କଲାବେଳେ ବିଧାୟକ ତୀବ୍ର ପ୍ରତିକ୍ରୀୟା ପ୍ରକାଶ କରିଥିଲେ । ନବ ଦାସ ହତ୍ୟାକାଣ୍ଡ ଘଟଣାରୁ ରାଜ୍ୟବାସୀଙ୍କ ଦୃଷ୍ଟି ହଟାଇବାକୁ ସରକାର ଏଭଳି ଛୋଟ ଘଟଣାକୁ ବଡ କରାଇ ବିରୋଧିଙ୍କ ମୁହଁକୁ ଚୁପ କରିବାକୁ ଅପଚେଷ୍ଟା କରୁଛି ବୋଲି ବିଧାୟକ ଅଭିଯୋଗ ଉଠାଇଥିଲେ । ତେବେ ଟିଟିଲାଗଡ ଉପଖଣ୍ଡ ଅଞ୍ଚଳରେ ଶହଶହ ବେଆଇନ ପଥରକ୍ୱାରୀ ସହିତ ବେଆଇନ ଇଟାଭାଟି ଥିଲେ ହେଁ ପ୍ରଶାସନ କେବଳ ବିରୋଧିଦଳର ଲୋକଙ୍କୁ ଟାର୍ଗେଟ କରୁଥିବା ଅଭିଯୋଗ ହେଉଛି । ଚଳିତବର୍ଷ ନିର୍ବାଚନୀ ବର୍ଷ ହୋଇଥିବା କାରଣରୁ ଠିକ ନିର୍ବାଚନ ପୂର୍ବରୁ ବିରୋଧିଙ୍କୁ ଟାର୍ଗେଟକରି ହତୋତ୍ସାହିତ କରିବାକୁ ସରକାରୀ କଳ ବ୍ୟବହାର ହେଉଥିବା ଅଭିଯୋଗ ହେଉଛି ।