24-Dec-2022

କଟକ(ପପ୍ରଣା ଖବର)-କଟକର ବିଜୟିନୀ ପବ୍ଲିକେସନ ପକ୍ଷରୁ ଲେଖିକା ମୀରା ବେଉରା ଙ୍କ ପ୍ରବନ୍ଧ ସଂକଳନ ‘ଜୀବନ ଜିଇଁବାର କଳା’ ଲୋକାର୍ପିତ ହୋଇଯାଇଛି । କଟକ ରାମଚନ୍ଦ୍ର ଭବନ ଠାରେ ଆୟୋଜିତ ଏକ ବର୍ଣ୍ଣାଢ଼୍ୟ ଉତ୍ସବରେ ଅଧ୍ୟକ୍ଷତା କରି  ଓଡ଼ିଶା ହାଇକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ ଏଏସ୍ ନାଇଡୁ ପୁସ୍ତକକୁ ଉନ୍ନୋଚିତ କରିଥିଲେ । ଲେଖିକା ମୀରା ବେଉରାଙ୍କ ଲେଖନୀ ସ୍ପଷ୍ଟ, ଶକ୍ତିଶାଳୀ ଓ ସମାଜନିଷ୍ଟ ହୋଇ ସମାଜକୁ କିଭଳି ପରିବର୍ତ୍ତନ କରିବା ପାଇଁ ଆଶା ରଖିଛି ସେ ସଂପର୍କରେ ଜଷ୍ଟିସ ଶ୍ରୀ ନାଇଡୁ ନିଜର ବକ୍ତବ୍ୟ ରଖିଥିଲେ । ମୁଖ୍ୟ ଅତିଥି ଭାବରେ ପ୍ରଫେସର  ଡଃ. ନଟବର ଶତପଥୀ ଯୋଗ ଦେଇ ଲେଖିକା ମୀରା ବେଉରାଙ୍କ ମର୍ମସ୍ପର୍ଶୀ

ରଚନା ଉପରେ ଆଲୋକପାତ କରିବା ସହ ମଣିଷ କିପରି ପ୍ରତି ମୁହୂର୍ତ୍ତରେ ନିଜ ସହ ଲଢ଼ି ଜୀବନ ଜିଇଁବାର କଳା ଶିଖିଥାଏ ତା ଉପରେ ପାଠକ ମାନଙ୍କୁ ବୁଝାଇଥିଲେ । ମୁଖ୍ୟବକ୍ତା ଭାବେ ଡଃ ବାବାଜୀ ଚରଣ ପଟ୍ଟନାୟକ ମଂଚାସୀନ ଥିଲେ ।  ସମ୍ମାନିତ ଅତିଥି ଭାବରେ ବରିଷ୍ଠ ସାମ୍ବାଦିକ ତଥା ସମାଜର ପୂର୍ବତନ ସଂପାଦକ ଡଃ ସତ୍ୟ ରାୟ ଯୋଗ ଦେଇଥିଲେ । ପ୍ରକାଶକ ଦିଲୀପ ବେଉରା ଉନ୍ମୋଚିତ ହୋଇଥିବା ପୁସ୍ତକ ସଂପର୍କରେ ସୂଚନା ଦେଇଥିଲେ । ଲେଖକୀୟ ଅଭିବ୍ୟକ୍ତିରେ ଲେଖିକା ମୀରା ବେଉରା ସାଂପ୍ରତିକ ସମାଜର ସମସ୍ୟା ଉପରେ ରେଖାପାତ କରି ସଂଘର୍ଷମୟ ଜୀବନରେ ସାଧାରଣ ମଣିଷ ଟିଏ ଦୁଃଖ ଯନ୍ତ୍ରଣାକୁ ଭୁଲି କିପରି ଜୀବନ ଜିଇଁବାର କଳା ଶିଥାଏ ସେ ସଂପର୍କରେ ନିଜର ମତ ରଖିଥିଲେ ।

ସଭା ପ୍ରାରମ୍ଭରେ ଡଃ ରାଜୀବ କୁମାର ଷଡଙ୍ଗୀ ସ୍ୱାଗତ ଭାଷଣ ଓ ଅତିଥି ପରିଚୟ ପ୍ରଦାନ କରିଥିଲେ । ଏହି ଲୋକାର୍ପଣ ଉତ୍ସବରେ କଟକ ଓ ଭୁବନେଶ୍ୱର ର ବହୁ କବି, ଲେଖକ, ସ୍ତମ୍ବକାର ଓ ସାହିତ୍ୟପ୍ରେମୀ ଯୋଗ ଦେଇଥିଲେ । ସଭା ଶେଷରେ ଡଃ ହେମନ୍ତ କୁମାର ପରିଡା ଧନ୍ୟବାଦ ଅର୍ପଣ କରିଥିଲେ ।